Bruk pak jan dok hu urang khik ramik mbiah tal harei ni 

Hu ong Đồng Sơn, akaok Mban ngak bruk Mặt trận palei Cam, ban sit Lạc Tánh meyaih khan, khaol dahlak nao tal sang ong Thông Ảnh, tuk ong daok samar tangin pak jan jaik blaoh piah samu jao ka urang blei jeng daok dalam palei Cam. Mboh khaol  dahlak tatuak drei tuk mboh ong daok khik bruk pak jan ini, ong Thông Ảnh samar drah khan brei thau: bruk ngak ini hu meng lavik mai tui jalan “ame pato, anek tui”. Dahlau diah di palei Cam ini hu biak rilo urang ngak bruk pak jan, min urak ini daok tok sa baoh sang ong lac daok khik. Dom urang karei tok blei mai pandar oh daok eng drei pak jan tra. Meng tuk daok sit ong Thông Ảnh bhian mong iek ame di drei pak jan saong tui tabiak kraong, tabiak craoh trah jan mek ikan. Prong tagok hu ame pato veik bruk ngak ini. Meng nan tal ini ong Ảnh ngak bruk pak jan hu 10 thun. Ong ngak piah pandar saong thei blei ye ong pablei. Meyah dahlau diah bahrau bac ye sa bilan ong ngak tok hu sa baoh jan, ye urak ini 7 harei lac ngak salah.

Ong Đồng Sơn brei thau: Palei Cam pak ini hu 360 baoh sang gam haong 1.559 urang. Mikva Cam pak ini rilo meng ngak nong. Tuk lahaiy, urang likei, kuhria gam urang kamei bhian duah jien meng rilo bruk ngak meng kan yau menyim  jih dalah, parah jan mek ikan, veih jan mek ikan… piah patagok jien mek tame saong duah pandap mbang ka yaok harei. Kayua yau nan, dalam 360 baoh sang ye hu jaik 70% baoh sang hu jan piah mek ikan.

Ong Đồng Tuyền sa urang daok di palei Cam ini labaih 30 thun ngak bruk taong mek ikan angaok kraong La Ngà, craoh Cát saong danao Biển Lạc,… brei thau: Ong ngak bruk ini oh bhian, min tuk ba  jan nao ye hu ikan piah mbang. Urak ini, daok tame bilan hajan pak halei jeng hu aia nan ye ikan nyu nao tal rilo labik, tukvak ini parah jan takik hu ikan. Tame bilan thu, tuk aia  trun, dom danao kavei, kraong, craoh aia takik, nan lac tuk parah jan mek hu rilo ikan di abih. Hu van, page galam jan nao, tal jala pandiak mai hu sa gui ikan. Ikan gui hu rilo janih yau: ikan patih, kuak phi, ikan kan, ikan padok, ikan halang… prong sit hu abih. Meyah tame dom craoh dalam ceik, gaok mai parah jan mek hu gam ikan ghin, janih ikan hu yaom biak glaong. Harei halei mek hu rilo, ye pablei piah duah jien, takik ye caik ka sang mbang.

Bruk pak jan brei hu  tangin gheih ngak, tari taring meng bac megru hu. Tuk pak jan oh caik ka nyu khut, kayua nyu khut ye kan talaih tabiak hu. Dalam tuk pagam pasei tame pabah jan, brei hu ilamu, gheih tangin ngak habar ka nyu samu gauk, caik tuk drei parah pabah jan peih prong, vin samu gauk. Yaom lac yaok baoh jan ngak salah blaoh tok hu yaom 1 triệu đồng, dalam tuk jien blei halam, pasei piah ngak jeng abih 500.000 đồng. Piah hu sa baoh jan gheih, mekre abih 7 harei meng ngak blaoh. Kuhria tabiak yaok harei pak jan tok  hu  70.000 đồng.

Yaom lac jien mek tame takik, min kayua ini lac bruk ngak “ame pato, anek tui” nan ye ong Thong Ảnh jeng daok khik bruk ngak ini saong daok pato veik ka anek likei di drei, plaih ka bruk pak jan lahik nao./.

Urang lang: Jasi -26/9