Thun ini, harei Rija Nưga peih meng harei 16/4 saong dalam dom harei tapa, bruk uan raok thun bahrau di 2 palei Cam Như Bình saong Như Ngọc xa Phuoc Huu, tinh Khanh Hoa mboh chreih chai bui sambai meng akaok jalan tal pabah mbang sang. Meng mblang di sang tal mblang dat caoh blong, labik halei jeng yava tagok sap ragam ragu, sap ndom klao ngak jeng sa thaik binguk biak siam gheih anak dom harei roya mai tal.

 Amuk Đàng Thị Cửa sa urang kumei daok di palei Như Bình, xa Phuoc Huu brei thau, labaih 1 adit blaoh tapa, dom adei sa-ai kumei dalam palei pataom gauk veik piah pathram tamia kuhria caga ka melam adaoh tamia. Ini lac jalan khik ramik saong pambak prong janih ilamo siam gheih di bangsa.

Oh sa janih di dom sa-ai dom anai hu mbaok tame bruk pathram baloh daok hu biak rilo anek saih, gru pato di puk palei. Yaom lac biak tawi tawak jan van haong bruk bac megru min tapi thei jeng rami ramik tukvak masa piah hu mbaok tame ginup abih dom waktu pathram adaoh tamia.

Sa-ai Chị La Thị Kim Huyên bui sambai mayai ndom lac, ta-eng sa-ai jeng yau mikva dalam palei thei thei jeng ba abih hatai hajai tame pathram peih pamere duh ka danak dak uan raok thun bahrau di palei Cam.

Kadha bahrau di harei roya thun ini hu bruk pambuak gauk di adat cambat tanarakun meng kan saong dom bruk ngak ilamo padhih jaman barau ini. Langiu di dom adat yau kakuh Yang Patau, Po Nai, 2 palei ini daok peih ma-in taong balaong valei, melam adaoh tamia saong abih di nyu hu lac bruk adaoh tamia prong ngan haong jaik 400 urang bhap bani. Mbang akaok mereip sa bruk ngak brei mboh gilac tukvak dak padang saong cak rok patagok di palei Cam Như Bình saong Như Ngọc hu dak padang biak siam. Dom dalikan ndom ka rai diuk bhian harei, ndom ka bruk khik ramik ilamo meng kan hu khan gilac meng sap ndom di san khau nan ye biak chreih biak jaik taphia.

Amuk Quảng Thị Thanh Thoảng daok di xa Phuoc Huu, tinh Khanh Hoa brei thau, kadha mbluak di bruk padang ngak ini nan lac manuac urang khan dak rai care dalikan di dua palei Như Bình saong Nhu Ngọc meng kan mai. Ngan haong bruk hu mbaok di 400 urang tamia hu ba mai ka bhap bani dalam palei sa thun bahrau biak bui sambai saong haniem phol.

Harei roya Rija Nưgar oh tok lac sa janih bruk ngak ilamo yang mabang, hatai jia biak prong bo daok lac dang talei pambuak pagam bhap bani. Ini lac tukvak piah ka rai rah nao dahlau pato tacei gilac veik ka anek kamuan dom yaom ilamu meng kan meng adaoh tamia tal adat cambat tanarakun.

Di dalam rai diuk bahrau harei ini, bruk khik ramik saong cak rok patagok asal ilamo bangsa dak mboh hu makna jang tuk halei.

Ong Quảng Đại Lê, daok di xa Phuoc Huu, tinh Khanh Hoa khan brei thau, piah hu danak dak uan raok thun bahrau 2026 di urang bangsa Cam, jaik sa bilan ini mikva pataom gauk pathram ba mai dom kadha adaoh tamia siam gheih di abih saong jeng lac piah meyaih khan ka tuai damuai atah jaik hu thau tal ilamo di urang Cam dalam tukvak uan raok  thun bahrau.

Harei roya barau gilac mai, negar palei gilac chreih chai bui sambai jeng ye ndung bak dom kadha asal ilamo. Langiu di nan daok nyu daok brei thau lac kadha hadah mbaok hadah meta di bhap bani palei pala urang bangsa Cam tuk ilamo bangsa bhap bini meng kan mai jeng daok hu khik ramik, iek prong eik glaong tapa dom rai rah mai./.