Dalam dom harei ini, ar thak di palei Cam Binh Hoa, xa Bac Binh, tinh Lam Ndong chreih chrai bui sambai jang. Hadei di 3 ragam gar yava tagok meng sang megik jeng lac tuk dom urang kamei Cam ndua talam salao kaya mbang tame dalam sang megik.

 Angaok dom canah jalan nao tame sang megik yau me-om bak sambo ban meng dom blah ao dhai meng kan di dom urang kamei dara Cam gam haong bingu hala di talam salao daok ndua angaok akaok. Dalam sang megik, dom urang halau janeng hu mbaok ginup abih piah ngak adat cambat di drei. Gah lingiu yaok rituh urang pataom mbaok kakuh likau. Amuk Bá Thị Hiếu, daok di palei Binh Thang, xa Bac Binh khan lac: “Mikva biak chreih pataom mai …anek taco oh klak adat drei hu”

Dalam dom harei ini, sang halei jeng hu srap gap kuhria caga pandap panda kaya mbang, aia menyum piah taduan raok tuai damuai daok atah mai ma-in sambai. Ong Lâm Minh Đoan daok di palei Binh Hoa, xa Bac Binh brei thau, yaom lac njauk pambak dom mbang ribuk aia sua bahrau tapa, min ngan haong hatai jum pataom, daong pambak gauk, mikva di dom palei karei jeng tapa mai bui ma-in sambai harei Suk Yeng haong mikva pak ini, gam gauk menyum sa ly tea, mbang sa klaih har...  

 Suk Yeng tui sap Cam nan ieu lac “harei suk pa-yeng win”. Kayua yau nan ye harei Suk Yeng daok iew yau Yuen lac “Kinh hội xoay vòng”, hu peih ngak yaok thun sa mbang di harei suk dalam adit tame jaik dom bilan 10, 11 sakawi urang Cham Bini.

 Harei Suk Yeng di urang Cam Bani tinh Lam Ndong hu peih mbaok meng sang megik di palei Dik Binh Hòa (xa Bac Binh) saong tamat di sang megik palei Caraih Chau Hanh (xa Hong Thai). 

 Ong Imum Tal, sa urang halaw janeng daok di palei Binh Minh, xa Bac Binh, tinh Lam Ndong brei thau, ini oh lac tukvak masa piah ka mikva Cam daok di dom palei karei mai rivang, tadhau ayug gauk, bo daok lac vaktu piah pok dua 2 ong Car tagok ngak Khotip saong Imum. Blaoh di nan, dua urang bahrau pok ngak ini meda dang tabiak peih ngak taong abih adat dalam bilan eik Ramưwan anak tal.

Karei tui mikva urang Cam Bani di tinh Lam Ndong, mikva Cam Bani di tinh Khanh Hoa peih ngak harei Suk Yưng 3 thun sa mbang. Saong thun ini, harei Suk Yưng daok hu peih ngak di dom sang megik di 7 palei Cam Awar di tinh Khanh Hoa.

 Pak ini, harei Suk Yưng hu peih akaok di sang megik palei Thanh Tin (xa Ninh Phuoc) hadei di nan tal dom palei Cam: Ram Van Lam (xa Thuan Nam), Baoh Dhang  Phu Nhuan (xa Ninh Phuoc), Luong Tri (phuong Ndo Vinh), Pablap Klak An Nhơn saong Pablap Biraw Phuoc Nhon (xa Xuan Hai) saong puac abih nan lac palei Patuh Tuan Tu (xa Phuoc Dinh).      

Tui adat meng kan, harei Suk Yưng oh lac tukvak masa piah ka dom Po Gru, Po Acar saong urang Cam Bani kakuh likau saong pok paling pandap panda kaya mbang ka ong akaok ong akei, blaoh daok lac tukvak piah pataom iek veik, ginum biai nao mai dom bruk ngak pambuak pagam tal agama.    

Meng kan diah, langiu di dom Po Gru saong Po Acar, daok hu dom halaw janeng gah Ahier yau Po Adhia saong Basaih tapa mai hu mbaok piah gam gauk ramik veik, yasa sakawi saong dom adat cambat tanarakun di dua agama, ngan haong jalan ngak ralai pagam Am - Duong dom agama di bangsa Cam.

Tui thun bilan, makna di harei Suk Yưng takik rilo hu salih bahrau, labik ngak saong tukvak peih ngak jeng hu karei di gauk tui dom bhum palei, min mbluak di abih, ini jeng lac tukvak siam gheih piah ka bhap bani Cam Bani pahadar tal ong akaok ong akei; piah ka dom halaw janeng saong urang Cam Awar gam gauk kakuh likau brei ka taneh aia hu sron mbuan, angin siam hajan laghaih.

Kadha biak karei di harei Suk Yưng nan hu lac bruk pa-yeng palei di nyu. Mai meng nan ye hu palaghaih ka dam dara, likei kamei di dom palei Cam taom gaok gauk, ndom glai nao mai haong gauk piah kak kajap jang bruk gul pataom di palei pala. Langiu di nan, nan jeng lac tukvak masa piah peih ngak bruk agama, hatai jia jhul patagok bruk pambuak pagam bhap bani saong pambuak pagam nao mai di dua agama di urang Cam./.