Page ini, di Pasak Darak pataom Pablei salih pakat Negar, Ha Noi rah tabiak harei peih pakak labik Parang “80 thun Bruk Doc lap – Tu do – Hanh phuc”. Thaik thaot 54 bangsa adei sa-ai daok haong gauk dalam baoh sang negar Viet Nam – jeng lac sa asal kadha hu makna ka bruk peih pakak labik Parang. 80 thun – nan lac jalan nao meng hatai caong takre Doc lap, ngak jeng Tu do, pataom abih di nan ngak jeng Hanh phuc dalam yaok cambuai klao, dalam yaok baoh sang di grauk dalam negar. Di harei raya, Tong Bi thu Tô Lâm, Thu tuong Rajaei Phạm Minh Chính saong dom urang ngak praong dalam Ndang, Karja hu ngak adat tut tangin peih pakak Danak dak Parang salam uan harei pahadar 80 thun harei Bangsa Negar Cong hoa Xa hoi Chu nghia Viet Nam. (VOV)

Di Labik inem krung Jayak palei Ấp Bắc (xã Tân Phú), page ini Mban thuong vu Tinh uy Dong Thap peih bruk alin brei Huy hieu Dang bingun pahadar harei bangsa negar 2 bilan 9 ka dom urang dang umo thun praong. Labaih 60 urang  ndang umo thun praong di tinh Dong Thap hu alin Huy hieu meng 55 thun Dang tagok brei mboh bui sambai, thau dhar phol Dang saong halan hatian rik prein ka bruk ngak katmang, ka bruk dak padang bhum palei, taneh ia. Bingun ini, Tinh uy Dong Thap khang hatai alin brei saong alin ka 1.018 Huy hieu Dang ka dom urang dang umo praong naih gheih.

Kuhria bilan 10 anak tal, tinh Gia Lai brei peih bruk padang he thong ribaong kraong ia Mơ, tuh ka labaih 2.000 ha taneh pala drak di rahra xa tapen negar Ia Mơ. He thong ribaong kraong atah labaih 30 km, ngan haong taong abih jien buh tame labaih 209 ty dong. Dom jalan ribaong kraong brei ba halau ia tuh hu ginup tal hamu padai bo meng nan ini mai tok ngak hu sa mbang, yuak hu takik. Tuk danak dak hu salah blaoh dalam thun 2026, mikva bhum palei meda hu ngak 2-3 mbang padai ia yaok thun, paglaong bruk ngak mbang, parilo jien mek tame saong tani tanat raidiuk.

Jalan ar tathik gah Pei di tinh Ca Mau atah labaih 108 km urak ini oh lac bruk pacang riyak, pacang ia sre  bo hu jeng jalan praong, jhul patagok dom medil tapen tathik  cakrok patagok samar, taong abih gah saong khang kajap. Tukvak tapa, hu bruk daong di T.Ư, bruk daong dom pakat karja, bhap bini, rilo danak dak  pacang khik ar tathik gah Pei Ca Mau hu peih ngak. Urak ini hu labaih 52 km ar pacang hu ngak khang kajap, labaih 56 km ar taneh, ar pacang tapen tathik  atah hu jaik 80km.

Dalam taong abih 624 danak dak pabak ia pataom di labik palei pala tinh Lam Dong urak ini tok hu 285 danak dak ngak hu karo kajap saong hu siam lagaih gap mbiah, labaih 40 danak dak ngak bruk oh lagaih saong hu jaik 300 danak dak brei padeih ngak bruk. Kayua hu labaih meteh danak dak pabak ia pataom di tinh ini ngak bruk oh siam lagaih, brei padeih ngak bruk kayua bruk pasang iek bruk ngak oh gheih.

Kong ty SpaceX di urang kaya meda Elon Musk atah klak bruk cuh Starship meng Texas kayua kan kandah ka mblang cuh. Starship  glong 123m, Starship lac ten lua praong saong khang abih di dunya, njauk padang ngak piah pandar veik hu. Ini lac bruk praong di mbang cuh ten lua di SpaceX jeng caong khin tagok patuh Sao Hỏa di Elon Musk, min danak dak ini dang anak oh lac takik kan kandah dalam thun ini.

Rajaei Sec daok pandar gah ngak mbang pablei salih di Thu tuong dahlau diah Andrej Babis brei bayar gilac 200 trieu euro jien daong gah ngak nong. Bruk mbaoh tangin ini hu ba tabiak hadei rilo bruk yak khan bo kapul Agrofert brei ciuk kayua hu pambuak tal dom paok jien daong tuk ong Babis daok ngak thu tuong. Yaom lac hu brei ka Agrofert jeng dua kadung jien jao brei, min gandi jeng brei ka ong Babis patui veik pasang iek bruk ngak mbang pablei salih, lac kongti oh hu ginup kein lagaih piah mek hu paok jien daong.

Pakistan peih bruk panduan ba praong hu labaih 150.000 urang tabiak truh dom labik mbuan gaok bala, tapen kraong di tinh Punjab kayua ia hajan sua trak abih dalam sajarah. Dom urang kuhria mboh dahlau hajan praong  daok rah tabiak dalam rilo harei anak tal, ba tal kan kandah jang. Tapa yaok kuhria mboh, thun ini Pakistan hu labaih 800 urang metai, labaih 1.000 urang njauk rambuac dalam negar, dalam nan hu rilo uranaih ia ba theik.