Mbang akaok meti hu nao tal palei Cam, hu mboh di mata, hu dang diuk, main maiec harei harei di dalam dom baoh sang meng kan, saai Khánh Ngọc gam saong anek saih Văn Lang Banraya Hồ Chí Minh oh war hu.

“Tuk adei dak kakai tal ini, tapen di dom baoh sang urang bangsa Cam daok khik ramik biak siam ini. Adei mboh ini lac dom baoh biak siam piah khik ramik dom drap ar ilamu bangsa Cam piah patagok jirah rivang brei ka urang thau tal ilamu bangsa urang Cam’’.

Daok ayut sahabat Phan Đường Bảo Hân oh padauk hu hatai chreih tuk rivang ieik sang danaok bimon kalan Cam: “Sang danaok urang bangsa Cam oh sa janih brei ngak bisa bhian yau baoh sang karei blaoh nyu daok yau yau drap ar ilamu brei pachreih tuai damuai langiu nagar mai rivang piah thau ralo jang”.

Bimon kalan Pô Klong Garai hu brei angan inum ilamu glaong pakat nagar meng di thun 2016. Nyu daok ieu lac sa baoh bimon kalan Cam dang akaok di dom baoh bimon brei ka bruk peih harei raya di urang bangsa Cam. Nyu gam hu brei khik ka bimon kalan Pô Klong Garai janih gheih ghang kan lavik dalau blaoh daok bam ai rai diuk hu prein barau brei ka bimon kalan ini. Ralo tuai damuai mai jeng mboh chreih chrai ngan saong bimon kalan di ini kayua daok yau tamo di dom baoh bimon kalan inum krung di bimon kalan Cam di Việt Nam. Ông Lê Long Vĩnh, urang jirah mai meng tỉnh Vĩnh Long khan brei thau lac: “Dom bimon kalan Cam urang Cam ngak tabiak nyu, hu di angaok rup dom rup patau phù điêu, baoh binguk bimon kalan peit bingu ila dom po yang mabang, dom baoh bingu ila angaok bimon kalan ngak ka drei oh var hu. Dalam dalam nan hu dom baoh kriak hu umur labia ribau thun, jeng daok drah sang dang di hajung mbuan hala. Drei Akau biak dang hatai brei ka drap ar ilamu bimon kalan ini’’.

Nai Tài Công Thùy Diễm, Pasak Caga khik inum krung tỉnh Khánh Hòa brei thau, dalau diah, dom kapul mai jirah apah urang ba lang yah brei ka bimon kalan, urak ini khol hulin brei urang ba langyah hu ilmu bac magru tantu brei lang yah khan brei thau oh mek jien ka tuai damuai gam meng sang Viet gam meng sang Engrik.

“Tuk tagok bimon kalan khol hulin brei ba lang yah tal ilamu bangsa Cam. Tuk hu tuai damuai langiu nagar ye khol dahlak lang yah meng sap engrik brei ka tuai jirah paham thau ilamu bangsa Cam’’.

Oh sa janih sang danaok urang bangsa, dom baoh bimon kalan Cam yau ye daok tamo, gam saong dom harei rija raya saong dom palei ngak bruk yau meng kan yau ye palei manyim jih dalah Mỹ Nghiệp, palei ngak gaok glah Bàu Trúc, mayah tahu dak ngak nyu mada jeng sa labik jirah biak siam gheih chreih chrai, daong ka Khánh Hòa pok glaong drap ar ilamu bangsa Cam tui jalan karo kajap, daong tame bruk ngak mbang padang rai diuk urang bangsa Cam. Sa-ai Huỳnh Hoàng Quý, sa urang tuai damuai meng banraya HCM mboh biak tatuak drei brei ka ilamu urang bangsa Cam daok khik siam yau daok tamo:

“Ilamu urang bangsa Cam ralo janih ralo kadha oh lac sa janih bimon kalan Cam, janih brei ka palei ngak gaok glah mayim jih dalah, dom adat cambat ilamu meng kan caik maim ayah tahu roh duah, thau dak caik rami ramik ba tame bruk siam lagaih nyu mada praong tame bruk patagok jirah rivang piah thau ralo jang drap ar ilamu urang bangsa Cam”.

Gam saong dom baoh kadha jirah hu sagait di Khánh Hòa, jirah roh duah thau ilamu bangsa Cam jeng sa kadha oh kurang hu di urang tuai damuai mai jirah tal Khánh Hòa. Drap ar ilamu Cam mayah thau pambuak thau pagam ka njauk ka lagaih nyu mada ngak ka palei ngak bruk tui muk kei meng kan hu patagok. Meng di nan mada daong khik caga jeng ye patagok yaom kaom ilamu bangsa di dalam jaman barau ini./.