Khaol dahlak mai rivang amuk Châu Thị Đông daok di palei Xóm Mới gam haong ong Dương Tấn Kiểm, Bí thư Chi bộ palei Phú Nhuận. Ong Kiểm brei thau, amuk Đông sa urang kamei Cam gheih ghang, urang ba akaok nao dahlau dalam bruk jak ba mikva kham merat ngak mbang, dak padang rai diuk trei sil, rik daong ba puk palei mek hu tanut asal palei ngak nong barau pakat glaong. Amuk jeng lac sa urang kamei akaok mereip daok di palei Baoh Dhang thau puac, thau vak cih akhar Cam, patui di nan amuk Bong daok kham merat roh duah, pato tacei ilamu cuak Ariya ka dom urang dalam kapul Hala Paneng (Trầu Cau) saong dam dara dalam palei. Urak ini, gah ilamo daok ngak harak gar piah likau pok brei angan Nghệ nhân Ưu tú dalam gah inem krung ilamo oh mboh di meta.

Amuk Châu Thị Đông thun ini hu umur 76 thun, gait prong tagok di bhum palei Baoh Dhang daok hu angan Phú Nhuận. Meng di dom thun 60 abap, binah prong urang kamei di palei ini thei jeng bang akhar huruh, kayua lac njauk jan van haong bruk ngak hamu apuh, ngak mbang ngak huak. Yau nan min, amuk Đông gilac lac urang kamei hu ilamu bac megru.

Lac sa urang kamei Cam salut mbut gheih ghang, amuk gam haong pasang di drei caoh rok labaih 3ha taneh pala tangeiy, ratak di labik Hòn Khô (xã Phước Vinh), langiu di 5 sào padai ngak dua mbang dalam sa thun di mblang taneran di palei. Mai meng tari tareng, amuk raong pato glang 9 urang anek bik prong jeng manuac jeng urang, dalam nan hu dua urang lac nghệ sĩ daneiy angan di Kapul nyaom daoh tamia bangsa tỉnh Ninh Thuận klak: Thập Văn Đa (daok hu angan lac Thập Ariya) saong Thập Hữu Lưu.

 Tuk anek bhik prong abih, bruk mbang angui di baoh sang hu tani tanat, thun 1999, amuk peih panuac likau Kapul nyaom urang kamei xã Phước Thuận dak padang Klup kapul Trầu Cau, hu 11 urang nan lac dom urang kamei naih gheih dalam palei. Lac urang dang akaok, amuk patagok baoh jeng siam mekre bruk ngak jak ba, pachreih dom urang daok dalam klup kapul khik ramik dom yaom ilamo meng kan .

Oh thei saneng tal urang kamei umo labaih 70 ini blaoh gilac hu rup thaik nao mai sami samar, panuac cuak Ariya saong sap daoh bhap bani Cam biak jangaih, ngak bui hatian manuac urang pang.

Hadei di tuk dak padang kapul hala paneng, amuk Đông saneng lac: “Kayua yau habar urang kamei Cam gilac oh thau akhar Cam?” Amuk brei thau, akhar Cam yaom lac mong dreh yau ula inegirai, min meyah urang likei bac hu ye urang kamei jeng bac hu.

Ngan haong hatai caong khin bac hu tapuk ong akaok ong kei caik veik, amuk kham merat bac akhar huroh. Dom urang dalam klup kapul sa hatung hatai haong gauk blei mbut talam, mek sa-ai Thập Văn Đa – anek likei di drei, anek saih di gru Thuận Ngọc Liêm dang pato. Tukvak akaok meti camereip, kayua huac kanda manuac urang ndom tame ndom tabiak, dom amuk padauk tapuk sipau dalam ao, nao tal sang gru meng khin mek tabiak piah pathram cih vak.

Hadei di bac megru tuk melam, yaom lac tal bac klaih klaoh kayua gru Thập Văn Đa daok nao adaoh, amuk Đông jeng ndam gam haong tal bac. Mai meng bruk pachreih bac, amuk samar drah thau tapoh hu akhar, vak saong pagam ine akhar Cam.

Meng daok ngak anek saih, amuk hu jeng urang dang pato akhar huruh Cam brei ka labaih 10 urang kamei dalam kapul, langiu di nan Muk daok jak ba hu dua urang likei tame bac yau ye  ong Đổng Hộ saong ong Đạo Văn Linh. “Akhar ong akaok ong kei yau hu suan yav. Bac blaoh, drei biak anit ranam nyu. Nao tabiak hamu buac hareik jeng bac, nao yuak padai jeng bac, akhar Cam tui dahlak nao tame dalam tuk ndih”, muk Đông khan mayai lac yau nan.

Thau akhar Cam, amuk patui veik tame bruk roh duah, puac cuak Ariya saong daoh dom kadha daoh bhap bani Cam kayua nghệ nhân Đàng Thị Khóa saong Đàng Tấn daok di palei Baoh Dhang dang pato. Dalam van page di puk palei, di kreh pahe padai Đông Xuân sah tapa, khaol dahlak hu tui pang amuk Đông cuak Ariya Cam-Bani angaok blah ba-ar cih vak meng akhar Cam.

Kadha hu 118 panuac ariya ayat nam ayat dalipal, khan brei thau ka bruk duh hatai di urang likei Cam Avar saong urang kamei Ahier, njauk neh rabha kayua karei gauk kayua di agama. Dalikan ini padeih tamat dalam drut druai duh hatai tuk urang likei dam padhau tame mbuk apui metai gam haong urang kamei drei ranam. Amuk gam cuak Ariya, gam lang tapa akhar Yuan piah ka urang pang thau cambaih dom asal dom kadha dut drua dalam yaok panuac yaok ine akhar.

Oh lac thau sa janih bac puac thau cuak, amuk daok adaoh pang biak lai la-ar dom kadha daoh bhap bani Cam yau Cam - Bani, Thei mai, Paik njam... Amuk peih tal pato ka dom anek ranaih dalam palei…

Amuk Đông khan mayai lac “Dahlak biak takre dom asal kadha di dom kadha Ariya, kayua nan lac ilamo bhap bani biak hu yaom di urang Cam. Daok pren yava ye dahlak daok roh duah, daok dang pato akhar Cam saong ilamu cuak ariya ka anek taco dalam talei but pajaih, ka mikva bhap bani urang bangsa Cam. Nan ieu lac hatung hatai di urang kamei Cam gam bruk khik ramik, cak rok patagok ilamo bangsa drei”./.