Kadha vak “khik ramik, patagok bruk manyim khan bai di urang Cam” di Nguyễn Thành hu ba tagok mbao Bangsa bhum ceik:

Yau rilo urang kumei Cam, saai La Thị Đăng Trăng ngak randap haong bruk manyim khan bai hu amaik pato veik meng tuk umo 10 thun saong thau manyim biak naih tuk jeng dara. Saai Trăng khan lac, bruk manyim khan bai di mikva bangsa Cam dahlau deih kayua urang kumei eng drei ngak, meng caga pandap tamo piah ngak tal tuk jeng khan bai, năng suất oh glaong. Hadei di nan, saai salih tapa ngak ka sa labik manyim di gauk gar dalam palei.

Tui saai La Ha Ta Ma Ri, po sa labik manyim khan bai dalam palei Mỹ Nghiệp, tuai kakei blei biak rilo, manyim meng tangin oh samu, nan ye sang hu blei jamraik mai manyim. Urak ini, xưởng hu 6 urang ngak meng 6 jamraik. Prein manyim tui kuhria di yaok urang lac 35m khan bai sa harei. Manyim meng jamraik jeng khik hu dom bingu la di khan bai meng kan. Min, ngan haong dom janih bingu la biak kan ye hu ngak meng tangin.

Meng samar, drah, tangin gheih ngak, saai Bình Thị Khoen buh jien tame blei 12 jamraik manyim mateh jamraik mateh tangin piah ngak, pachreih hu rilo urang kumei Cam dalam palei ngak. Ndem ka dom bruk salih bahrau meng di tuk hu jamraik, saai Khoen brei thau, piah ngak tabiak sa blah khan bai praong 70 cm, atah 200 cm, urang manyim abih dua harei meng blaoh, urak ini manyim meng jamraik lac dalam 1 harei meda manyim hu 20m khan bai tamo. Piah maraik gauk  haong khan bai ngak meng công nghiệp di darak pasa, labik ngak bhian roh duah, pataom mek, pabak dom janih bingu hala, sambo mau karei di gauk piah lagaih haong yaok tuai damuai.

Ong Trượng Lắc, akaok Mban ngak bruk Mặt trận khu phố Mỹ Nghiệp brei thau, salih tapa manyim meng jamraik, urang ngak jeng daok khik ramik, ba tame pandap dom bingu la di urang Cam. Mỹ Nghiệp urak ini hu labaih 440 baoh sang ngan haong labaih 2.110 urang, tal urak ini hu 15 baoh sang pandar jamraik manyim tame bruk manyim khan bai, sang hu takik jeng lac 4 tal 5 jamraik, sang rilo abih jeng hu tal yaok piluh jamraik, ba bruk ngak ka rilo urang kumei Cam. Pandap panda di dom labik manyim meng jamraik biak rilo janih meng blah khan bai tamo tal rilo janih khan aw, khan ma-aom, khan tauk ban, kadung teik, blah phui, thảm...

Anak meta mboh lac, dom labik manyim ai buh jien tame blei jamraik piah paglaong siam lagaih di bruk ngak, lac jalan njauk ngak piah patagok. Min, ngan haong dom janih bingu hala hu ngak biak kan, yau ye inegirai, cim trạo, thần Shiva… dom nghệ nhân Cam biak glaih glar meng pasiam veik hu, ngak gilac veik. Mayah oh hu jalan piah khik ramik, dom janih bingu la ini mbuan lahik nao, oh thei ngak gilac. Bruk manyim meng kan di mikva bangsa Cam lahik nao dom gheih, mekre.

Bruk karei gauk gah năng suất, yaom kaom, chất lượng pandap panda, di khik ramik saong cak rok patagok bruk manyim khan bai meng kan ngak ka rilo urang di palei manyim Mỹ Nghiệp biak suh sah hatai. Ong Phú Văn Ngòi, Yam ndok Hợp tác xã dịch vụ, ngak tabiak, pablei salih manyim khan bai di palei Cam Mỹ Nghiệp brei thau, Hợp tác xã urak ini hu 70 urang hu mbaok tame pambuak gauk manyim khan bai meng tangin. Menyim taong abih meng tangin, bruk catang, lamin, gheih, mekre di yaok pandap jeng tui hatai caong saong bruk saneng duah di urang ngak. Bruk manyim meng tangin, nan ye pandap ngak tabiak abih rilo tukvak jang, yaom kaom kan maraik gauk haong dom pandap manyim meng jamraik. Ini lac bruk kan kandah ba tabiak ka dom hợp tác xã, kayua năng suất ngak tabiak meda ngak kan kandah tapak tal jien mek tame di urang kak kajap haong bruk ngak.

Tui ong Lê Huyền, Phó akaok UBND tỉnh Ninh Thuận, piah khik ramik saong cak rok patagok dom bruk ngak, palei ngak, UBND tỉnh hu ba tabiak Jalan ngak cak rok patagok palei ngak tukvak 2021 - 2030. Ngan haong palei manyim Mỹ Nghiệp, tỉnh hu rilo danak dak, dự án daong khik ramik saong cak rok patagok palei manyim khan bai meng kan di mikva bangsa Cam, yau ye buh jien tame padang ngak cơ sở hạ tầng palei ngak, dom jalan mbak nao mai, padang ngak hợp tác xã, sang ngak tabiak parang iek, pasiam veik bingu la meng kan, peih dom tal pato bruk ngak, cak rok patagok du lich rivang jirah palei ngak./.