Tal urak ini, dom halau janieng urang Cam jeng daok pandar dalam bruk hành chính, vak harak hamu taneh, adat hukum, ariya saong kinh kệ. Min, urak ini daok mbuan lahik nao harak gar kinh sách hala agal bac ini. Dalam kadha dom bangsa adei saai harei ini, kol dahlak hulin hu kadha vak ndem ka bruk khik ramik tapuk hala agal bac di urang Cam. Kadha vak di Minh Truyền hu ba tagok mbao Bangsa saong patagok

Ong Nại Cao Liêm - Phó Cả sư di Palei Pabhan (Vụ Bổn), xã Phước Ninh, huyện Thuận Nam, tỉnh Ninh Thuận daok khik piah baoh tapuk kinh sách agal bac. Ong brei thau: Urak ini, bruk pablei pandap klak meng kan ngak kinh sách agal bac gam gam lahik nao di dalam rahra, dom blah kinh sách agal bac daok veik biak takik. Dalam tuk nan, ilamo vak akhar di mangaok blah agal bac di urang Cam daok hu takik menuac thau. Di Pasak Roh duah Ilamo Cam tỉnh Ninh Thuận tok daok khik piah 12 blah thư tịch vak di mangaok agal bac. Miuyim tỉnh Ninh Thuận hu 7 bộ kinh agal bac daok khik piah saong pabak ka bruk parang iek, yaih khan. Di Pasak parang iek ilamo Cam tỉnh Bình Thuận daok khik piah 4 blah thư tịch agal bac. Daok Miuyim tỉnh Bình Thuận khik piah 5 baoh tapuk agal bac.

Urang roh duah Nguyễn Ngọc Ẩn daok di ban Phan Thiết, Bình Thuận hu jaik 100 baoh thư tịch meng kan. Dalam nan, hu 4 baoh thư tịch vak meng sap Cam di mangaok agal bac. Jalan sahaneng di dom miuyim, sang parang iek, urang roh duah, maong iek agal bac di urang Cam lac pandap meng kan nan ye ba tabiak yaih khan duh ka tuai mai rivang iek. Urang oh ngak bruk roh duah, peih bruk puac saong langyah asal kadha hu vak dalam baoh tapuk kinh sách agal bac.

Anak bruk mbuan lahik nao kinh sách agal bac, dom Pasak khik piah pakat negar, Gilang tapuk negar, Miuyim saong dom labik agama daok peih bruk roh duah, khik ramik kinh sách agal bac tapa dom nyaom biai ilamo, truyền thông, danak dak khik ramik thư tịch quý hiếm. Min, baoh tapuk agal bac di urang Cam lac biak takik hu urang roh duah ilamo caik hatai sangka tal asal kadha saong duah thau ilamo ngak tabiak. Dom baoh tapuk kinh sách agal bac di urang Cam daok lahik nao, tabiak truh bhap bini, jeng harak gar quý hiếm, lac pandap meng kan.

Piah khik ramik saong patagok dom yaom glaong inem krung tapuk agal bac di urang Cam saong abih di nyu nan lac di Việt Nam, dahlau di abih lac brei hu bruk pasang iek, duah thau saong yaok pataom dom baoh tapuk agal bac daok pandar urak ini. Meng nan, hu jalan piah ngak số hóa, daong ka bruk khik piah saong khik ramik inem krung tapuk agal bac ka rai hadei. Langiu di nan, njauk số hóa lac jalan daong ka dom baoh tapuk agal bac daok khut, tahak, maok mbang, halak halin palai kaik saong khut tahak  tui thun bilan.

Taphia di nan, njauk peih tal pato ilamo vak akhar di mangaok agal bac ka dom halau janieng, urang hu mbaok tame bruk ngak adat ieu yang, dom urang ngak di miuyim, urang roh duah ilamo Cam piah ka dom urang ini pato veik ka rahra.

Dom urang ilamo, urang khik ramik saong dom halau janieng njauk pambuak gauk dalam bruk puac, langyah saong patabiak dom asal kadha hu vak di mangaok blah hala agal bac piah pabak harak gar ka dom halau janieng ngak adat ieu yang; patagok yaom glaong sajarah, ilamo di tapuk agar bac hu ngak tabiak meng yaok ratuh thun dahlau; paglaong hatai sahaneng di rahra dalam bruk khik ramik sap ndem panuac puac saong akhar vak di urang Cam./.