Dahlau diah, dom urang ngak lan yau amuk Trượng Thị Gạch tok thau ngak dom janih pandap lan duh ka bruk pandar yaok harei. Min urak ini, tuk mikva dalam palei Hamu Craok salih tapa ngak lan mỹ nghệ, ye amuk Gạch kham merat nao duah thau ka darak pasar saong pasiam veik bingu hala, ngak tabiak rilo mẫu mã, paglaong chất lượng pandap lan ngak tabiak, meng nan pandap lan kayua amuk saong dom urang dalam HTX lan am Cam Hamu Craok ngak tabiak jeng hu mboh tangin sanya blei veik abih. Amuk Trượng Thị Gạch, daok di Palei Hamu Craok, ban sit Phước Dân, huyện Ninh Phước khan lac: " Dahlak ngak gaok, meng ngak gaok dahlak meng hu mbang hu ngui yau harei ini..."

Oh lac tok hu urang kamei, bo rilo likei Cam jeng hu mbaok tame bruk ngak lan, rik daong khik ramik ilamu gheih mekre di lan am Cam meng kan. Piah hu dom harak pambuak bruk pablei lan, bhap bani haong dom gah chức năng hu jhul khang bruk meyaih khan angan je, padang Website meyaih khan palei ngak, brei thau angaok Facebook, Zalo. Ong Phú Hữu Minh Thuần, Urang dang Akaok HTX lan am Cam Hamu Craok, ban sit Phước Dân brei thau: "Meng rilo jalan yaih khan ka lan am Cam, gam haong bruk ngak lan am tui panuac kakei di urang blei bo hu dom janih pandap hu urang kakei blei yaom meng 30 tal 40 triệu đồng".   

Bruk caga dahlau dalam ngak tabiak lan tui panuac kakei di urang blei, rilo meng lac dom janih lan bahrau hu yaom glaong jang dut haong dom janih lan bhian mboh dahlau daih, hu daong ka rai diuk di mikva tagok glaong jang. Bhap bani palei lan am Cam Hamu Craok tuk halei jeng saneng tal bruk khik ramik ilamu hadah mekre hu caik veik meng hadom zaman ini mai di bruk ngak lan am. Bruk kham merat di dom nghệ nhân, bruk daong ba di dom gah, dom pakat, lan am Cam Hamu Craok dak harei dak hu jeng janih pandap piah pablei salih, brei mboh angan je, paglaong jien mek tame ka urang ngak lan./.