Sang ong Dương Tài Tin hu labik du lịch sinh thái Sen Araphat di palei Mỹ Nghiệp, ban sit Phước Dân, huyện Ninh Phước, tỉnh Ninh Thuận. Dom harei ini, dom menuac dalam sang ong pataom tame ngak pasiam dom sang kadom, cakak dhar phun cảnh, pala bingu... piah taduan raok tuai mai rilo jang dalam tuk Tết. Ong Tin brei thau ka bruk ngak du lịch sinh thái: “Drei ramik ngak pasiam, yam tapa thun bahrau drei brei ngak ka nyu siam veik. Tuk tuai mai mboh hacih sa-at urang meng takre, meng tame.”

Dom thun jaik ini, mblang hamu pala caraih gah likuk palei Mỹ Nghiệp lac labik du lịch sinh thái bahrau, dui pachreih hu rilo kapul tuai damuai. Dalam nan, hu gam SV dom sang bac ĐH mai duah thau ilamu di urang Cam. Tuai mai tal ini langiu di bruk maong iek mblang caraih mekre daok hu tame menyim iek khan bai, hu daok dalam labik bak ilamu, meng dom bimaong kalan tal dom puk, palei di urang Cam. Ong Quảng Đại Thính, Akaok palei Mỹ Nghiệp, ban sit Phước Dân, huyện Ninh Phước brei thau, dalam palei hu 448 sang, rilo meng ngak khan bai, pala padai, raong glang saong hu 4 sang ngak du lịch sinh thái pambuak haong mblang hamu caraih, homestay piah tuai meda daok veik: “Di palei Cam Mỹ Nghiệp ini daok khik hu rilo labik ilamu, dalam nan hu Kut Chăm …..Langiu di khik ramik bruk menyim meng kan, di pak ini daok hu ngak du lịch pambuak haong palei ngak.”

Daok di xã Phước Bình, huyện Bác Ái lac labik dhaong di Bein pakat negar Phước Bình ye hu langik tasik la-an bingi, hu rilo bein phun mbang baoh hijao mekre. Dom thun mai ini, rilo sang khang hatai buh jien tame ka bein phun piah ngak du lịch bhap bini. Sa-ai K’tơ Chinh, urang bangsa Raglai brei thau, dahlau daih sang sa-ai pala kruac bhung, durian… pablei ka urang blei salih. Meng harei palei jak ba mikva pala phun mbang baoh pambuak haong ngak du lịch bhap bini piah cakrok kinh tế ye sa-ai khang hatai ngak tui. Sa-ai K’tơ Chinh brei thau, labik du lịch Tagu Galamping di kapul di sa-ai, thun 2023 taduan raok labaih 1.000 mbang tuai, bhian mai di harei padeih puac adit saong harei lễ. “Labik Tagu Glamping rilo meng taduan raok tuai mai tui kapul nyaom piah duah thau, piah mbang dom janih pandap mbang di urang Raglai yau ye menuk am cuh, lisei lam, ikan mek meng craoh, ralow pabui kahon dalam nding kreim, lac dom pandap mbang di palei. Tapa nan jeng hu ba bruk ngak mbang ka dom baoh sang. Dahlau daih puk palei drei takik hacih sa-at, urak ini hu tuai meng atah mai ini ravang iek puk palei, meng nan mikva sahneng mboh lac, yaok sang njauk puh ramik hacih sa-at sang danaok, jalan mbak ka nyu siam mekre jang duk saong dahlau daih.”

Xã Phước Bình urak ini hu labaih 60 sang ngak sang yau baoh sang meng kan di urang Raglai pambuak haong bein phun mbang baoh piah ngak du lịch. Ong Phạm Phùng Bảo Châu, Chủ tịch UBND xã Phước Bình, huyện Bác Ái brei thau: “Sang nan piah caik ka tuai mai ravang iek blaoh daok veik padeih padei. Palei ba tabiak 2 bruk praong lac, pala phun mbang baoh pambuak haong ngak du lịch bhap bini. Daok dom siam lagaih piah ngak du lịch ye di pak ini hu dom labik yau ye: Bẫy đá Pi Năng Tắc, kali Cha-pót, labik raong ikan tầm, bò tót di bein pakat negar Phước Bình.”

Amuk Phạm Thị Thanh Hường, Phaok Yam ndok Sở Ilamu - Thể thao saong Du lịch Ninh Thuận brei thau, gah du lịch tỉnh daok daong ka mikva cakrok du lịch bhap bini, du lịch sinh thái: “Kol dahlak daong ngak labik mekre, ngak bảng tacei jalan ka tuai thau lac mai tal ini lac palei du lịch bhap bini, atau peih praong jalan palei. Urak ini palei jeng biak sangka nan ye kol dahlak mboh jalan tame Phước Bình urak ini biak mekre, nao mai mbuan lagaih, tuai tame jeng hu mbuan jang.”

Piah ka bruk ngak du lịch di mikva hu khang kajap saong dak harei dak siam jang, anak tal, dom pakat ủy, karja di tỉnh Ninh Thuận daok brei jhul khang bruk pathau khan, paglaong hatai sahneng, jak ba rahra jum pataom gauk, ba gauk tame ngak. Gam haong nan, meng dom prein khang daong brei, patui bruk padang ngak dom jalan mbak, hạ tầng saong paglaong siam mekre pandap du lịch; jhul khang bruk brei thau ka du lịch saong pato pakai menuac ngak du lịch ka dom kapul, nyaom bhap bini./.