Mai rivang sang amuk Thị Kỳ dalam dom harei ini, khaol drei hu maong iek bein măng tây hijao that siam ala pandiak di dom harei akaok thun bahrau. Amuk Kỳ tangin gam kak dom phun măng tame gheng piah khik ka phun nyu dang tapak gam khan lac: sang amuk hu padang ngak di thun 2019, klau thun hadei di tuk tame HTX, abih jaik 700 triệu đồng. Taong abih urang dalam sang mai ini daok piah lagaih mong iek phun măng tây, oh daok dalam baoh sang klak taik tahak dalam palei tra. 

Amuk Kỳ brei thau, dahlau di thun 2015, amuk pala ratak lo, njam sabei, akaok lasun... min năng suất biar, yaom kaom tuk trun tuk tagok. Thun 2016, amuk hu HTX Tuấn Tú daong pajaih saong ilamu, sang amuk khang hatai nao mesre di gilang pariak 50 triệu đồng piah pala măng tây.

Phun măng tây di palei Tuh ngak ka mikva kak kajap haong hamu puh. Atah bein măng tây di amuk Thị Kỳ oh hadom, lac bein măng tây di amuk Châu Thị Trâm. Amuk Trâm brei thau, akaok mereip bahrau pala biak glaih glar. Meng pabam asal ka nyu pacah meta, phun anek prong jeng phun amaik, meng phun amaik meng ndaih tabiak akaok măng tây piah ka drei kaoh pablei. Pala măng tây jeng abih rilo pren yava oh mbuan sanang yau drei saneng. Harei halei jeng nao kak phun, tỉa phun, pruh aia yau raong anek kamar.

Amuk Trâm khan lac, pajaih măng tây meng Hà Lan brei năng suất glaong saong chất lượng siam, phun pala sa mbang, min meda kaoh pablei dalam jaik pluh thun hadei. Măng tây praong tagok saong kaoh mek hu biak samar. Sa phun măng tamuh glaong meng 12 tal 15cm yaok melam saong kaoh mek gam dalam klau bilan meng padeih sa bilan. Langiu di bruk mong iek 5 sào phun măng tây, amuk Trâm daok hu mbaok tame ngak bruk di HTX Tuấn Tú.

Meng ilamu ngak kaya meda meng phun măng tây, sa-ai Kỳ saong amuk Trâm hu nao tal yaok baoh sang piah jak ba adei sa-ai kamei pambuak gauk pala phun măng tây hijao piah cak rok patagok kinh tế. Harei ini, sambo hijao di măng tây hu jeng sambo màu oh lac di palei Tuh bo nyu daok pambak prong tabiak abih xã An Hải, salih ka sambo màu thaik binguk di bhum “taneh metai” thu lagu ngan haong dom mbuan daruai xương rồng.

 Meng 1ha pala iek măng tây thun 2010, tal harei ini xã An Hải hu labaih 110 ha, dalam nan palei Tuh hu labaih 87ha saong tui sarak di Đảng ủy xã ba tabiak ka 300ha njam hacih sa-at. Urak ini, karja palei daok pachreih mikva buh jien tame  ngak saong ngak ka nyu siam veik bein măng tây, ngak tui chuẩn VietGAP, pandar ilamu công nghệ glaong saong parilo janih pandap meng phun măng tây.

Ong Hồ Thanh Phong, Phaok akaok UBND xã An Hải, huyện Ninh…? ndom lac, meng tuk pala măng tây, rai diuk mikva urang Cam cak rok patagok siam jang, khang kajap jang. Tuấn Tú lac palei hu 100% mikva urang Cam min hu rai diuk saong an ninh tani tanat, baoh sang kathaot dahlau diah meblah labaih 30%, urak ini trun daok ala 5%: “Gah karja palei jeng hu daong binah halei ka pajaih, daong ilamu, peih tal pato pathram bruk kaoh mek saong blei veik abih ka mikva urang nong. Langiu di bruk daong di Karja, dom kapul nyaom, kadung jien daong ka urang nong, kadung jien daong ka urang kamei, hu daong palagaih ka sang kathaot blei pajaih măng tay, cak rok patagok kinh tế khang kajap ngan haong njam patam hacih sa-at saong abih di nyu lac phun măng tay.”

Meng palih ruah njauk janih phun, padang hu bruk ngak nong cak rok patagok khang kajap, rilo adei sa-ai kumei Cam di palei Tuh  daok ngak kaya meda pak di mangaok mblang taneh kan kandah di palei drei./.