Pathau mikva saong grauk ayut!

          Mai tal Chùa Dơi (daok iew lac baha Sêrây Techo Mahatup, atau baha Mã Tộc) di ban sit Sóc Trăng, tỉnh Sóc Trăng, gam saong bruk rivang iek kiến trúc baha yao klak meng kan tapa dom sarak, dom, bingula biak gheih karei di urang bangsa Khmer saong danei angar ngan saong yaok ribau cim dhur mai daok, tuai damuai daok hu pang lagam lagu meng kan di bangsa Khmer kayua kapul di baha main.

Lagu lai la-ar taong tagok meng dom alat ragam meng kan di bangsa Khmer ngak brei tuai damuai caik hatai tuk mai rivang baha Dơi, sa dalam dom Inem mek sajarah dakrai pakat negar, hu meng labaih 400 thun. Meda lac, thei jeng caik hasit tukvak piah iek saong pang dom alat ragam biak karei ini tuk nao tapa kapul main alat ragam nan. Rilo tuai damuai mboh biak takre meta saong dom janih lat ragam yau Trô-So, Khum atau Chapay - đon - veng…Ong Phua Suông, akaok kapul alat ragam brei thau, kapul hu padang tabiak meng thun 2009, hu 9 urang jeng lac urang taha, umo glaong, yaok urang mai meng sa bhum palei karei di gauk. Rilo urang daok atah labaih 10 mbaik jalan mai baha piah ma-in alat ragam bangsa drei. Sa urang sa labik, min dreih yau gauk di labik lac takre lagu lagam. Meng nan mai mbiah tal harei ini, yaok harei dom urang dalam kapul jeng hu mbaok di baha piah main alat ragam brei ka tuai damuai mai maong iek. Ong Phua Suông daok brei thau lac: 

« Di Sóc Trăng hu dom labik urang padang kapul main alat ragam meng kan ini, min oh hu suai lavik. Urang tok main tuk hu rija roya, tuk urang da-a nao, sa thun hu 1 tal 2 mbang. Daok khol dahlak main yaok harei meng 7tuk meteh tal 4tuk biar harei, tuk halei  tuai  damuai nao abih khol dahlak meng padeih. »

Ong Trà Vinh, urang umo taha di abih dalam kapul, thun ini umo 87 thun, palei daok di  xã Tham Đôn, huyện Mỹ Xuyên brei thau, dahlau diah, ong daok dalam kapul nghe thuat bhap bini. Min, oh hu suai lavik kapul tayah nao, ong mai Tham Đôn daok. Tuk taha, ong tuk halei jeng caong khin hu main veik dom alat ragam ini. Nan ye, tuk hu da-a tame kapul alat ragam piah main brei ka tuai damuai pak di baha, ong taduan panuac chip. Urak ini, page halei ong jeng nao, biar harei mai piah hu main dom janih alat ragam bo drei takre:

“Dahlak taha ye, min mboh drei daok main hu alat ragam ye mai ini main. Ilamu meng kan di urang Khmer oh mbuan hu, dom rairah dam dara hadei ini jeng oh daok takre bac, tok daok urang taha yau drei min. Alat ragam di urang Khmer hu meng amuk kei caik veik. Baha hu alat ragam ye drei padang kapul main, dahlak tapa mai ini gam main gam pato ka urang birau bac, caong khin ilamu ini juai lahik nao.”

Oh lac ta-eng ông Trà Vinh, bo rilo urang karei dalam kapul jeng mai meng dom kapul nghe thuat bhap bini dahlau diah, saong brei nao dom mbaik jalan piah mai ini me-in alat ragam. Maong ia mbaok dom urang dalam kapul, khol dahlak yau mboh hu bruk bui sambai, hadah mbaok meta kayua lagu lagam drei main hu rilo urang mai maong iek pang yaom. Min haniem phol praong abih ngan saong urang oh lac hu main dom alat ragam di bangsa bo drei takre meng lavik mai, bo tapa nan brei mboh hatai anit ranam ilamu bangsa biak praong; caong khin khik ramik, rik prein yawa tame khik ramik ilamu meng kan biak karei di bangsa oh lac harei ini bo piah ka anek taco harei hadei.