Tapa 5 mbang pataom pakat dunya Võ cổ truyền, yaok thun, yaok ribau gru pato võ, saih bac taong võ  di dunya mai tal  taneh võ Bình Định piah klah rabha ilamu, duah gru bac megru. Meng bruk takre võ thuật, dom gru pato võ, urang taong võ di dunya mboh anit jang ka ilamu, sajarah saong anek manuac Viet Nam. Jeng meng ini nyu caik tabiak bruk khik ramik inem krung ini.

          Jaik 10 thun tapa, kuhria meng mbang pataom võ cổ truyền camereip di abih, võ cổ truyền Bình Định – Việt Nam dak harei dak pambak praong. Tapa yaok mbang pataom, hu rilo jang dom gru pato võ, urang bac taong võ negar langiu mai tal bhum taneh võ. Võ sư Hồ Hoa Huệ nan lac sa dalam dom urang camereip di abih yaih khan võ cổ truyền Viet Nam di Châu Âu atah di ini labaih 40 thun  saong jeng lac urang hu panuac brei peih Harei pataom pakat dunya võ cổ truyền Viet Nam.  Võ sư Hồ Hoa Huệ brei thau, dalam tuk pasram võ, amuk iew dom saih bac sap Viet saong meyai ndem saong gauk meng sap Viet. Meng tuk padang tagok, môn phái Tinh võ đạo kayua amuk padang tabiak hu labaih 10 ribau saih bac mai meng 8 taneh ia di dunya. Bac taong võ meng tuk umo 5 thun, mbiah tal ini umo thun taha ye daok nao duah patoa veik võ thuật di grauk labik dalam dunya, võ sư Hồ Hoa Huệ daok suh sah tuk Võ cổ truyền Viet Nam oh ka jeng Võ di taneh ia:  "Yaom lac jeng njauk hatai hasit tuk ba hu dom ayut di dunya mai piah tame Nyaom roya 5 mbang di labik ini. Dahlak nao pato di negar halei jeng mboh urang hu võ di negar drei, kayua habar võ Viet Nam drei hu angan je yau nan bo oh padang angan võ Viet Nam. Kadha nan ngak ka dahlak biak suh sah dalam hatai". 

          Luac raidiuk pambuak pagam saong bruk taong võ, gru Hồ Hoa Huệ jeng sahaneng kuhria tal bruk khik ramik võ cổ truyền  Bình Định - Việt Nam. Mai tal dom bhum taneh võ yau Tây Sơn, Tuy Phước, An Nhơn di tỉnh Bình Định, thei thei jeng thau angan di dom gru pato võ hu angan yau Phan Thọ, Hồ Sừng, Hồ Ngạnh, Phi Long Vịnh, Hà Trọng Sơn, Hà Trọng Hùng… ngan saong dom kadha taong haveiy, kadha “ quyền” dane angan, min mbiah tal harei ini oh thei patui veik bruk hào hùng nan, yau nan ye yaok rituh thế võ daok lahik nao.

          Võ sư Hà Trọng Thắng, Pasak Unessco Patagok Ilamu saong The thao brei thau, hu padang bloh mBan roh duah, khik ramik saong patagok võ Bình Định – Việt Nam, dalam nan mBan cố vấn  lac dom võ sư, gru pato võ praong thun dalam taneh ia: " Khol dahlak hu ginum biai saong dom gru, caong khin dom gru ngak habar khik hu dom siam mekre nan,  pato veik ka dom rairah dam dara. Oh lac thei drei jeng pato hu, min khol drei brei palih ruah anek saih piah pato. Khol drei brei pato ka dom anek saih piah ka dom anek saih patoa veik ka dom rai hadei. Yau nan võ ini  meng khik hu saong daok miat miat".

Daok ong Mai Thanh Thắng, Phó Akok Ủy ban bhap bini tỉnh Bình Định brei thau:

" Khol dahlak jeng hu ba tabiak danak dak khik ramik, patagok dom lò võ, abih di nyu nan lac dom võ độc đáo. Khol dahlak jeng hu sarak daong, yaok gru pato võ yau nan hu daong jien yaok bilan sumu jien bilan cơ bản. Khol dahlak  jeng ba mbuan lagaih piah peih praong cơ sở vật chất, padang  sang pasram ka nyu siam jang".

Di Mbang pataom pakat dunya võ cổ truyền Bình Định hu Mentri Ilamu thể thao saong Du lich pok brei harak inem krung ilamu phi vật thể pakat negar. Mbang ini, Liên đoàn Võ thuật Viet Nam jeng brei padang Liên đoàn quốc tế võ cổ truyền Việt Nam. Ini lac jalan mbuan lagaih piah ka dom jabat khik iek Karja saong dom puk palei jhul pakhang bruk khik ramik, patagok võ cổ truyền di bangsa./.