Pathau mikva saong taong abih gauk! Mai veik palei, hu oh takik urang dahlau daih ngak bol lin bak angaok rup dom thương tật, min meng hatung hatian di bộ đội cụ hồ, thau saneng, khin ngak, ralo urang dahlau daih ngak boll in hu jeng dom kreih camin dalam bruk ngak mbang, pablei salih saong kham merat dak padang palei negar. Di huyện taphia negar Chư Prông, tỉnh Gia lai, daok hu sa klup kapul urang dahlau daih ngak boll in, hub hap bini ieu lac “klup kapul urang dahlau daih ngak boll in tỷ phú”. Urang oh lac joi ngak kinh tế bo daok hu ralo rik daong ka bruk ngak mbang pablei salih joi di puk palei, daong ka ayut sahabat  saong bhap bini dalam palei.   

Urang dahlau daih ngak bol lin angan Nguyễn Anh Tuấn (daok di xã Ia Drăng, huyện Chư Prông, tỉnh Gia Lai), hu tukvak nao mesruh metak di mblang mesruh Campuchia. Hadei di tuk luai ngak lin di thun 1984, ong tabiak truh palei Duy Tiên, Hà Nam nao padang mbang ngui di bhum taphia negar Chư Prông. Hadei di labaih 30 thun, meng dua plak tangin saoh, diuk pasang ong padang hu trang trại praong labaih 21 ha, pala ameriah kalu, cao su, cà phê saong raong athur. Yaok thun, trang trại ba jien tame hu jaik 5 tỷ đồng. Hu jien, ong daong dom baoh sang kan kathaot dalam palei yam tagok. Yaok baoh sang kan kathaot hu ong brei mesraiy meng 200 tal 600 triệu đồng oh mek laba piah ngak mbang. Ong daok buh tabiak yaok tỷ đồng piah dui điện ngak mbang, truac hadah ka palei, ngak jalan menyek piah nao mai mbuan palagaih. Ong Nguyễn Anh Tuấn brei thau, dom bruk ngak pahala bo ong ngak harei ini langiu bruk piah daong, daok piah bayar dhar phon ka mikva dalam palei hu gam saong sang ong yam tapa tukvak kan kandah dahlau daih: 

“patagok phun công nghiệp, phun cà phê, phun cao su, phun ameraih kalu ye tal urak ini  sang hu drap ar ye dahlak njauk daong veik ka adei saai. Kayua bản chất saai bộ đội cụ hồ, urak ini drei ngak mbang hub o oh daong adei saai ye sahneng mboh oh jeng”.

Jeng xuất ngũ, tabiak truh palei nao ngak kinh tế di Tây Nguyên, urang dahlau daih ngak bol lin angan Nguyễn Văn Gác hu jak jeng tuk mai daok di palei Grang, xã Ia Phìn, huyện Chư Prông. Hadei di 30 thun kham merat, ong padang hut rang trại praong jaik 60 ha pala cà phê, ameraik kalu saong cao su. Trang trại di ong urak ini hu 30 urang ngak, lac anek kamuan di urang dahlau daih ngak bol lin saong mikva gaok kan kandah dalam palei, tui yaom jien bilan 4 triệu đồng sa urang sa bilan. Ngan saong dom baoh sang gaok kan kandah, ong halan hatian brei mesraiy oh mek laba. Rilo baoh sang meng nan bo tabiak truh kan kathaot saong yam tagok ngak kaya meda. Tui ong Nguyễn Văn Gác, daong ka dom urang gaok kan kandah lac bruk bui sambai saong jeng brei mboh ilamu siam mekre meng kan. 

“drei dahlau daih biak rambah rambup, tal urak ini hu tani tanat. Ngan saong dahlak, yaom lac oh kaya meda hagait min jeng hu jang urang karei hasit. Tuk drei cadu jang dahlak hu saneng lac urang VN halan siam pacang hala tahak”.

5 thun dahlau, dom urang dahlau daih ngak bol lin jak jeng dalam bruk pala drak, ngak mbang, pablei salih yau ong Nguyễn Anh Tuấn, Nguyễn Văn Gác … hu pataom gauk veik, padang jeng klup kapul urang dahlau daih ngak bol lin ngak mbang pablei salih joi di huyện Chư Prông. Ini lac klup kapul urang dahlau daih ngak bol lin ngak mbang pablei salih naih joi akaok meti di tỉnh Gia Lai. Bhap bini dalam huyện bhian ieu klup kapul ini lac klup kapul “urang dahlau daih ngak boll in tỷ phú”, kayua taong abih urang dalam kalup kapul jeng hu jien mek tame yaok tỷ đồng yaok thun. Tal urak ini, klup kapul hu jaik 50 urang. Gam saong bruk klah rabha ilamu, bac megru saong daong bag auk dalam bruk ngak mbang, pablei salih, yaok urang  dalam klup kapul, meng ilamu, meng pren yava drap ar di drei, daong ka dom urang dahlau daih ngak bol lin dalam tổ hội, chi hội di puk palei. Tapa nan, daong palagaih ka dom urang dahlau daih ngak bol lin kan kandah, dom baoh sang kan kathaot yam tagok. Ong Mai Khắc Tuấn, Chủ nhiệm klup kapul, Chủ tịch kapul urang dahlau daih ngak bol lin huyện Chư Prông lac:

 “dom bruk ngak ini, kapul urang dahlau daih ngak boll in hu peih tabiak dalam huyện piah pambak praong kreih camin naih joi. Tapa pambak praong kreih camin naih joi ini hu ralo urang hội daong ka urang hội kan kathaot mesraiy phun jien. Dalam nan, praong di abih dalam bruk daong ba gauk patruh eik patrun kathaot lac xã Ia Phìn saong xã Ia Đrăng. Kol dahlak kham merat palahik abih baoh sang kan kathaot”.

Meng hatai kham merat saong akaok sahneng hadah krah, ralo urang dahlau daih ngak boll in di huyện Chư Prông, tỉnh Gia Lai daok jeng dom kreih camin dalam bruk ngak mbang, pablei salih. Dom urang lin bộ đội cụ hồ khang hatai mesruh metak, urak ini saman sron mbon, daok patui jalan patagok hatung hatain siam mekre, rik daong dak padang bhumk taphia negar Chư Prông kaya meda khang kajap./.