Bol lin sangka kuhria Tết ka bhap bini

Dom harei jaik Tết, angaok dom jalan di tỉnh Kon Tum hu biak rilo radaih patui gauk “ba Tết” mai ka bhap bini bhum atah bayah, bhum taphia negar kan kandah di tỉnh. Lac sa dalam 200 anek saih di sang bac Phổ thông Bangsa bán trú Tiểu học Đăk Nên, xã Đăk Nên, huyện Kon Plông hu taduan pandap Tết meng Danak dak “Tết bui sambai ka anek saih kathaot bhum glaong”  uan raok Xuân thun anek sak Kubao 2021, adei Y Lan, bangsa Xơ đăng, bac tal 5A bui sambai lac: “ Kamuan bui sambai lo kayua hu dom cei, dom anai alin brei kamuan ao la-an. Kamuan thau dhar phol dom cei, dom anai biak ralo. Kamuan hu ao la-an blaoh kamuan kham bac naih joi, pang tui amaik ame, tui dom sa-ai likei kumei.”

  Xã Đăk Nên, huyện Kon Plông, tỉnh Kon Tum lac xã biak kan kandah saong atah di ban Kon Tum labaih 140km. Tui gru Lê Tấn Trường Anh, Akok sang bac Phổ thông Bangsa Bán trú Tiểu học Đăk Nên, sang bac hu 17 tal bac gam saong 249 anek saih saong taong abih dom adei lac bangsa Xơ đăng. Bruk Danak dak “Tết bui sambai ka anek saih kathaot bhum glaong” uan raok Xuân Tân Sửu 2021 mai saong dom adei lac bruk pachreih ba biak praong: “Dom anek saih di labik bhum atah, bayah biak kan kandah kurang sap janih, meng kalik juak di takai, ao cuk atau dom pandap pambuak tal bruk bac da-a di dom adei. Harei ini, dom sa-ai ba mai ka dom adei ao la-an cuk di bilan la-ar jaik Tết. Nan lac bruk hu makna biak praong”.

  Gam saong dom xã bhum atah, bhum urang bangsa takik kan kandah, dom harei ini, di 13 xã bhum taphia negar di 4 huyện  Đăk Glei, Ngọc Hồi, Sa Thầy saong Ia H’Drai di tỉnh Kon Tum jeng peih ngak rilo bruk sangka kuhria Tết ka bhap bini. Di huyện Ia H’Drai, dom harei jaik tame thun birau, UBMT negar Việt Nam huyện hu jao 7 baoh sang jum pataom yaom abih tih 390 triệu đồng brei ka 7 baoh sang kan kandah ka sang daok. Ong Nguyễn Tiến Dũng, Phó Chủ tịch UB bhap bini huyện Ia H’Drai khan brei thau: huyện hu parabha labaih 700 triệu đồng piah sangka daong Tết ka sang kan kathaot, sang hu raidiuk kan kandah. Meng rilo phun jien karei daong ka yaok sa xã labaih 100 triệu đồng piah blei pandap mbang Tết saong gauk ka mikva dom palei.

“Bruk sangka kuhria Tết ka bhap bini dalam huyen hu khol dahlak biak caik hatai, hu pakat ủy, karja palei ba tangin tame bruk. Khol dahlak daok kham peih ngak. Harei pataom ahar tapei nung hijao jeng hu pablak tame piah ngak habar nan lac Harei pataom papaok ahar tapei nung hijao di labik bhap bini daok. Plaih ngak mengak, oh hu lagaih. Gam peih ngak dom melam daoh tamia Xuân biên cương blaoh  uan Đảng, uan Xuân, uan tabuan taneh ia salih birau.”

Pambak praong bruk klak rabha anit ranam daong kuhria Tết ka urang daok di labik taphia negar, Kapol urang kumei tỉnh Kon Tum saong Bộ Chỉ huy Bol lin Biên phòng tỉnh, Kapol urang kumei ban Ha Noi peih ngak rilo bruk rah tui jalan taphia negar atah labaih 292 km jaik Lào saong Campuchia. Dom “ Tết bak hatai anit ranam”; jao brei sang anit ranam; pakacah papaok ahar bánh chưng saong ngak dom ahar meng kan; darak zero jien; daong bruk cak rok patagok  kinh tế di urang kumei hội, jao brei paok jien bac ka anek saih, alin pandap Tết…ngan saong phun jien kuhria anih tih dom danak dak labaih 500 trieu dong hu ba mai rilo bui sambai ka urang labik bhum taphia negar.

Meng hatai kham merat oh caik ka baoh sang halei kurang Tết, UB bhap bini tỉnh Kon Tum brei buh tabiak jaik 11 tỷ đồng daong ka baoh sang kathaot, sang jaik jathaot uan raok Tết Nguyên đán anek sak kubao 2021. Tui nan, labaih 12.000 baoh sang kathaot di tỉnh, Tết ini yaok baoh sang hu daong 600.000 đồng, labaih 2.000 baoh sang kathaot tui tanut kurang dịch vụ xã hội saong jaik kathaot  hu daong 300.000 đồng. Dalam dom harei ini, bruk bui sambai Tết daok pambak praong tal dom bhum atah bayah,  bhum kan kandah abih di tỉnh Kon Tum./.

Urang lang: Aí Nghiêm - 5/2/2021