Nan lac sa boh sang prong bo tuk hu urang halei gaok kan kandah bruk hagait ye tong abih gauk tame dong brei. Tuk hu harei buidalam sang  biak haniem phol. Dalam kadha “Kreih camin palei negar” harei ni, daa mik va song tong abih gauk pang kadha vak angaok harak mbao Dân Việt hu khan ka kreih camin hadah krah di boh sang prong Oi Nhít ni.

Oi Nhít lac hata palei Lé A, xã Krông Pa, huyện bhum ceik Sơn Hòa, tỉnh Phú Yên. Ong lac sa urang hadah krah dalam boh sang saong biak hu angan je dalam puk palei. Ong Ra HLan Y Rin, sa urang daok dalam palei ni lac: “Oi Nhít hu anek, hu taco biak rilo di palei ni. Ong tuk halei jeng tacei pato anek taco diuk rai siam mekre, kham merat ngak mbang nan ye anek halei jeng hu meng 2 tal 3 ha blei plom, tabau song rong hu labaih 10 drei limo, kinh tế boh sang hu tani tanat”. Ong muk Oi Nhít - Tun Nhít angan biak lac Rô Y Sát - K Pắ HRiêu, urang Ê Đê, thun ni umo 94 thun, dok di palei Lé A. Ong muk hu 4 urang anek, song hu abih tih 40 taco, tacaik nội ngoại. 4 urang anek di ong Oi Nhít padang ngak sang dok dalam mblang taneh di ong prong labaih 500m2. 

Daok kreh 4 boh sang nan hu sa baoh sang atah labaih 20m, lac labik taduan raok tuai damuai song lac labik pataom mbaok di dom urang dalam boh sang prong Oi Nhít tuk hu bruk hagait prong. Urang anek kacua di Oi Nhít lac amuk K Pắ Hgiáp, umo 64 thun, tok pasang hu 9 urang anek song 13 urang taco nội ngoại, amuk brei thau: “adei saai khol hulin thei jeng hu duik hu pasang min dok jiak amaik ame. Meyah khol hulin nao dok atah, tuk ong muk ruak kik ye ngak habar drei iek glang hu.

Ong Y Cách, akaok palei Lé A brei thau “Duik pasang Oi Nhít hu anek taco iek glang siam lo. Urak ni ong muk dok song urang anek kamei taluac angan H Zét, umo 37 thun, lac Akaok kapul urang kamei xã Krông Pa”.

Tui ong Rơ Ô BLê – urang jakar Mban ilamu thông tin xã Krông Pa, duik pasang di urang bangsa Ê Đê takik kamlah gauk, pato pakai anek taco oh tuk halei pandar havei, hu bruk hagait ye gum pabah mbang pato gauk. Ndom puac daok dang haong amaik ame biak siam mekre. Tuk palei hu bruk tom gaok gauk, khol hulin bhian tacei tabiak kreih camin di ong muk Oi Nhít piah ka mikva maong tame, lac kreih camin hadah krah ka bruk dak padang boh sang ilamu./.