Pathau mikva saong taong abih gauk!

Di gah timur tỉnh Đắc Lắc, huyện Krông Bông dalam saman mesruh metak lac bhum căn cứ cách mạng khang kajap, lac labik menek tabiak ralo đơn vị saong urang anh hùng tapon nyom bol pan phao kraong bhap bini. Dalam bruk dak padang, Krông Bông hu jhul kadun likuk eik lipa kathaot rambah, saong daok ba gauk patagok, paglaong raidiuk ka mikva dom bangsa. Kadha vak di Minh Huệ - urang vak di rayo sap ndom VN daok di bhum  Tây Nguyên brei thau ka bruk nan.

Taha Y Jăm Hlong (bhian ieu lac Ama Nguôi), bangsa Mnông, daok di buôn Khanh, xã Cư Pui hadar veik: Tuk taneh ia peih paha, mikva dom bangsa tui jalan ngak di Đảng, trun ceik mai định cư định canh, ngak padai ia, pala cà phê, raong limo… Raidiuk di bhap bini bhum taneh cách mạng dak harei dak ginup meda jang. Taha Y Jăm Hlong lac: “Bhap bini di labik ini ginup mbang ye, meng hu Đảng Karja sangka, saong puk palei jeng hu daong gauk, pachreih ba mikva ngak mbang, lac ngak bein, ngak puh, ngak hamu…, urak ini hu dom sang padang hu sang danaok praong, siam.”

Ong Nguyễn Văn Tâm, akaok Uy ban bhap bini xã Cư Pui brei thau, xã hu tal 90% menuac sia lac urang bangsa takik. Urak ini raidiuk di mikva hu hadah hadai tagok, pandap ngak mbang, pala drak hu ginup, sang danaok  jeng hu tani tanat. Meng bruk sangka buh jien tame di karja, điện hu mai truac hadah dom puk palei, jalan mbak nao mai mbuan lagaih, sang bac hu ginup ka anek kamuan nao bac, 3 công trình thủy lợi sit hu daong ka bhap bini pala drak mbuan lagaih. Tui ong Nguyễn Văn Tâm: “Bruk salih bahrau praong abih di bhap bini lac bruk pala drak, mikva thau pandar ilamu bahrau, pilih ruah dom pajaih bahrau tame ngak, yau phun tangei lai brei năng suất bika glaong, bloh harei ini tabiak hamu ye ngak meng jamriak, meng ngak taneh tal pala drak, tok hu dom labik taneh tambok glaong meng pandar pren menuac. Bloh bruk salih phun pala tui bilan, sa thun mikva ngak takik di abih 2 vụ, meda lac  mùa halei phun nan, phun bei plom, phun tangei, ratak, bloh cà phê…”

Oh ta-eng hagait Cư Pui, bo abih bhum taneh cách mạng dahlau deih, meng Khuê Ngọc Điền, Cư Drăm, Yang Mao… jeng hu raidiuk trei sir. Tui ong Bạch Văn Mạnh, Bí thư Huyện ủy Krông Bông, meng sa bhum palei eik lipa luac thun, urak ini huyện hu ginup padai brah, ngan saong sản lượng jaik 100 ribau tấn. Baoh sang kan kathaot trun daok ala 18%. Yaom lac yau nan, min duk saong dom huyện karei di Đắc Lắc, Krông Bông jeng daok lac huyện kathaot. Jalan nao mai kan kandah, gah ceik gah kraong, taneh takik siam, lingik kan kandah, cơ sở hạ tầng oh hu hagait…, lac dom makna ngak brei Krông Bông daok suai tagok. Ngak habar ka bhum taneh cách mạng, ka angan anh hùng di Đắc Lắc tagok samar jang, mikva dom bangsa hu raidiuk siam jang, lac bruk suh sah di dom pakat daok ngành dalam huyen. Ông Bạch Văn Mạnh lac: “Krông Bông lac huyện bhum atah bayah, labik căn cứ cách mạng dalam dom thun bilan mesruh metak khang, bhap bini dom bangsa Krông Bông anh hùng, min mbiah tal harei ini jeng daok kan kathaot ralo, taneh saoh tapen mbon ceik, langik kan kandah, bruk xã hội hóa hu ieu dom doanh nghiệp buh jien tame ngak mbang, bhap bini ye pren khang di huyen oh ka glaong. Caong Đảng, karja, dom pakat dalam tỉnh sangka jang. Njauk pataom tame salih bharau janih phun pala, raong glang praong, raong pala kaya ikan, thau janih phun pala lagaih haong taneh riya, phun padai ia, tangei lai…, saong pala dom janih phun hu yaom glaong”.

Jum pataom sa hatung hatian dalam saman mesruh metak hu ngak jeng sa bhum taneh cách mạng Krông Bông anh hùng. Karja saong mikva dom bangsa di Krông Bông daok sa hatung hatain haong gauk, yam tapa kan kandah piah padang raidiuk trei sir, haniem phul./.