Bilan hè tal mai, jeng lac tuk dom amaik ame kuhria duah ka anek bik di drei sa labik mein siam lagaih. Langiu bruk bac pabak ilamu, ye dom mon nang khieu yau bac lagam lagu, daoh tamia, cih thaot binguk, the thao…jeng hu rilo amik ame caik hatai. Yau nan min, oh lac uranaih halei jeng hu labik mein, hu bac dom janih drei takre, abih di nyu nan lac uranaih di palei pala. Bruk ini hu urang vak di Rayo sap ndem Viet Nam daok di Ban raya Ho Chi Minh brei thau tapa kadha vak di tỉnh Đồng Nai:

Tame palei mikva bangsa Châu Ro daok di palei Tín Nghĩa, xã Xuân Thiện, huyện Thống Nhất, tỉnh Đồng Nai dalam dom harei padeih hè ini, khol dahlak biak caik hatai tal dom jalan hu tuh menyek meng pasak huyen tal pasak xa. Điện, jalan, sang bac, balai ielk ruak hu padang ngak khang kajap; sang ilamu, pasak bac megru di bhap bini palei ini jeng praong, siam, urak ini hu ngak labik nyaom pataom. Dom bruk main bui sambai ka uranaih ye takik hu peih ngak. Nao rah tapa jalan dalam palei, khol dahlak vaih tame labik halui tapen jalan, labik hu 5, 6 adei daok ma-in chat talei. Tuk khol dahlak tangi sua, bilan padeih hè ini khol adei ngak hagiat? Adei Điểu Thị Thùy Trang daok main jaik nan javap calei:

 "Hè ye adei nao bac Toán, sap Việt, blaoh daong amaik ame puh ramik sang danaok, lahaiy adei saong dom ayut main chat talei, ô quang pak ini"

Tal bilan padeih hè sa-ai Điểu Toa daok di palei Tín Nghĩa, xã Xuân Thiện, huyện Thống Nhất, tỉnh Đồng Nai having akaok duah labik bac hè ka dua urang anek di drei. Sa-ai Toa brei thau, meyah oh nao bac hè ye 2 bilan padeih hè 2 urang anek di sa-ai oh thau ngak hagait. Daok ngan saong dom mon nang khieu anek sa-ai takre  yau: caloi ia, caoh mbanh, daoh tamia ye di labik ini oh hu nan ye langiu tuk nao bac hè, dom kamuan tok thau tame tabiak, main vin val sang. Sa-ai Điểu Toa daok brei thau lac: "Bilan padeih hè drei brei kol anek nao bac hè, gam bac gam mein. Gah am nhac, kol nyu takre hagait drei brei bac nan. Min di labik ini oh hu pato dom janih ini, meyah caong bac brei nao tal Long Khánh atah rilo, jaik 10 mbaik jalan. Jeng khin ka dom anek bac gah langiu min kayua drei daok di bhum atah bayah nao mai kan kandah. Meyah di xã drei hu peih tal pato bac vi tính atau âm nhạc ye biak lagaih ka dom adei bangsa takik nao bac."

Jeng yau sang sa-ai Điểu Toa, sang sa-ai Đinh Công Tâm daok di palei Suối Dzui, xã Túc Trưng, huyện Định Quán, tỉnh Đồng Nai jeng having akaok duah labik ka anek bac hè. Sa-ai Tâm brei thau, anek taluac di sa-ai tapa thun tagok tal 6, nyu takre bac nhạc saong vi tính lo. Kayua nao biak atah nan ye sa-ai njauk caik ka kol nyu daok me-in di sang. "Dalam tuk padeih hè, ngak amaik ame dahlak jeng khin brei anek nao bac janih bo nyu khin min nao atah lô. Meng sang tal labik bac labaih atah labaih 10 mbiak jalan, biak kan kandah."

Bruk nan oh lac di bhum palei pala saoh bo di dom ban sit dalm tỉnh Đồng Nai jeng yau nan. Sa-ai Nguyễn Đình Thanh daok di khu phố 4, phường Quang Vinh, ban sit Biên Hòa brei thau; “Tal bilan padeih hè, dahlak nao mai jaik 10 mbaik jalan ba saong taduan 2 urang anek bac di Sang Uranaih Đồng Nai piah bac dom môn năng khiếu. Kayua jaik sang dahlak oh hu tal bac năng khiếu atau dom kalup kapul ka uranaih bac saong mein”. Sa-ai Thanh daok brei thau lac:

"Bilan hè ini jeng lac tukvak ka dom anek padeih padei min jeng caik ka kol nyu bac, pasram. Bac Ilamu oh maong trak,  daok năng khiếu ye caik ka anek pasram rup pabhap piah tapa nan thau anek joi janih hagait. Urak ini, dom anek dahlak daok bac cih thaot binguk, caloi ia, taong mbanh rổ, cầu long saong ảo thuật."

Yaom lac glaih glar hasit min dom urang anek di sa-ai Nguyễn Đình Thanh  daok di khu phố 4, phường Quang Vinh, ban sit Biên Hòa daok hu bilan padeih hè bui sambai bak sap ndom klao saong dom janih bac bo kol nyu takre. Daok dom uranaih di bhum palei atah bayah yau dom anek di sa-ai Điểu Toa di palei Tín Nghĩa, xã Xuân Thiện, huyện Thống Nhất; sa-ai Đinh Công Tâm daok palei Suối Dzui, xã Túc Trưng, huyện Định Quán ye bilan padeih hè oh hu bui sambai, tok thau main vil val dalam puk dalam palei, tapen dom baoh kraong, baoh craoh labik mbuan ba tal metai lihik kayua labuh blung ia..

Piah hu labik main siam ka uranaih bhum palei pala dalam bilan hè, langiu di bruk sangka di dom mban, ngành, kapul nyaom ye brei hu bruk ba tangin rik pren tame di dom amaik ame. Langiu di nan, brei pandar sang ilamu njauk bruk atau dom sang bac di bhap bini, pambuak saong dom gah liên quan piah peih labik sinh hoạt ka uranaih bhum palei pala atah bayah mai main sambai./.