Kuhria tal tukvak ini, ban sit La Gi, tỉnh Bình Thuận  padang hu 230 Kapol Covid bhap  bini, dalam nan phường Phước Hội hu 29 kapul. Tukvak tapa, dom “Kapol Covid bhap bini” phường Phước Hội ngak bruk abih hatai di drei, tuk dom urang dalam kapol tuk halei jeng kham merat jak ba bhap bini ngak catang dom jalan pacang caga jit di Mentri Y tế.

  Lac sa urang jakar di khu phố iek praong bruk ngak, ba akaok nao dahlau piah daong ka bhap bini, ka puk palei, tuk halei jeng pambuak saong bhap bini, nan ye ong Trần Đình Trọng - Akok khu phố 7, phường Phước Hội hu UBND phường jia tame pok ngak akaok “Kapol  Covid bhap bini” ka 1 pan akaok kapol bhap bini tự quản 1,2,3 di khu phố. Meng tuk hu jao bruk ngak, ong Trọng tuk halei jeng rami ramik tukvak lahe, bhian nao “ tal yaok yaok labik, yaok jalan, gok pabah mbang yaok sang” bhap bini di khu pho piah pathau khan, jak ba, kakei mikva brei ngak catang dom jalan pacang caga jit ruak Covid-19 tui  5 paka di Mentri Y te, lac: cuk pataih pacang pabah, rao tangin meng ia jru pametai anek ruak, daok atah di gauk; takik taom gaok gauk; daok di sang, oh nao tabiak gah langiu tuk oh hu bruk njauk nao saong pathau khan y tế. Gam haong nan, hu panuac iew saong tacei pato bhap bini tui iek prein yawa di drei, dut iek pandiak dalam rup yaok harei ka dom urang dalam sang;  brei laik phone piah bhap bini pathau khan y te chip tuk mboh rup drei jeng yau urang dalam sang patuk, pandiak, ruak…atau dom ruak dreih yau ruak Covid…Langiu di nan, ong Trọng daok bhian nao tal dom baoh sang pablei salih mbang menyum di ban sit…piah kakei dom po kuan brei ngak catang dom bruk pacang caga jit ruak Covid-19…Ong Trọng nan lac sa dalam dom urang di  “Kapul Covid bhap bini” ba abih hatai ngak bruk di sa urang dang akaok njauk tui bruk hu UB bhap bini phường Phước Hội jao brei.

Jeng lac sa urang dang akaok khu phố yau kareih camin, tuk halei jeng ba akaok nao dahlau dalam yaok bruk ngak bo pakat angaok jao, Amuk Dương Thị Thu Vân – Akok khu phố 9 - Akok “Kapol Covid bhap bini” ka 1 khik iek kapol bhap bini tự quản 6, phường Phước Hội oh huac di kan kandah, glaih glar, bhian nao tal yaok baoh sang bhap bini di khu pho drei khik iek piah pathau khan jeng yau pasang iek, samar thau dom urang mboh yau jaik ruak Covid-19 bo muk  hu mboh yau: patuk, pandiak, pandik tarakong, cảm cúm, glaih glar, ruak jalan suan yawa…dalam tuk muk “ nao tal yaok jalan, gok pabah mbang yaok sang” piah samar khan brei UB bhap bini saong Bilai Y tế Phường brei daok karei saong mek mau dut iek ruak sumu chip; saong duah mboh dom urang oh brei thau y te; oh ngak tui dom jalan pacang caga jit tui bruk ba tabiak di karja…samar brei UB bhap bini thau…Tapa nan hu daong ka UB bhap bini phường saong Balai Y tế phuong mbuan duah dom urang F1, F2, F3 tuk hu urang ruak pambuak tal jit di labik drei khik iek.

Ong Huỳnh Thanh Bình - Akok UBND phường Phước Hội – Akok Mban tacei jalan pacang caga Covid -19 phường Phước Hội brei thau: “ Patagok bruk ngak di dom kapol Covid bhap bini saong dom bruk ngak hu dalam pacang caga jit ruak Covid-19 dalam tukvak tapa. Anak tal, UB bhap bini phường Phước Hội daok brei jhul pakhang rilo jalan ngak piah pacang caga jit ruak Covid-19, caong khin rik daong karja palei jeng yau negar  jhul kadun likuk jit ruak mbuan metai ini”.

Meng bruk ngak di dom Kapol Covid bhap bini ngan saong yaok baoh sang di dom labik dalam ban sit La Gi saong meng hatung hatai adih drei ka bruk ngak di yaok urang dalam “Kapol Covid bhap bini”, daok rik daong biak siam ka karja palei peih ngak siam bruk pacang caga jit ruak Covid-19, ngak brei bhap bini mboh sahanang hatai, jia tame jalan tacei ba di dom pakat karja palei di taong abih gah dalam raidiuk./.

Urang lang: Ai Nghiem -6/6