Tuai damuai tuk yam tame pabah mbang brei cuk pataih pacang mbaok saong hu dut iek pandiak di rup pabhap

Yaok 15 minit, loa papar sap dalam Thảo Cầm Viên Sài Gòn tabiak sap ieu, kakei tuai damuai pacang caga jit Covid-19. Ini lac sa dalam dom jalan pacang caga jit bo labik ini hu peih tabiak ngak meng labaih 1 thun tapa. Lac 1 dalam dom labik dui pachreih hu rilo tuai mai me-in sambai, nan ye Thảo Cầm Viên Sài Gòn hu pruh jru pametai anek ruak yaok harei tuk mesup haong biar harei di dom labik ravang iek, labik me-in, labik pablei vé, lan can, tangin pan, khghe patau... piah pacang jit. Ong Phạm Văn Tân – Yam ndok Thảo Cầm Viên Sài Gòn brei thau, anak bruk Công viên nước Đầm Sen padeih ngak kayua oh caik hatai tal bruk pacang caga jit, labik di ong hu ginum biai piah ramik pasiam bruk pacang caga jit: “Kol dahlak hu papar sap pathau khan piah tuai ngak tui 5 paka di Mintri Y tế. Hu bảo vệ nao pasang iek, kakei pahadar tuai. Lingiu di nan, di pabah mbang tame, kol dahlak hu caik 2 mac pametai anek ruak. Dahlau di tuk tuai tame brei nao tapa 2 mac nan. Daok dom bruk pataom rilo menuac yau labik me-in ia, daoh tamia, múa lân ye kol dahlak brei padeih abih dom bruk ini”

Labik ravang me-in Suối Tiên, bruk pacang caga jit jeng hu ngak catang jang. Amuk Nguyễn Ngọc Ánh – Akaok jabat pablei salih CTy CP Du lịch Văn hóa Suối Tiên brei thau, lingiu di bruk ngak tui 5 paka di Mintri Y tế ye daok brei ngak pabak 5 bruk nan lac : “pasang iek – rami ramik – hacih sa-at – iek glang – caga ngak” piah meda ngak hu 2 bruk haong gauk lac gam taduan raok tuai damuai gam pacang caga jit. Anak bruk ieu brei daok karei dom tuai pandiak labaih 37,5 độ C di Sở Du lịch TPHCM, amuk Ánh brei thau, labik ravang me-in Suối Tiên jeng hu padang kapul ngak bruk samar drah saong labik brei daok karei piah pabak ka bruk ini: “Taong abih urang ngak saong tuai damuai tuk yam tame pabah mbang brei cuk pataih pacang mbaok saong hu dut iek pandiak di rup pabhap. Tuai tame me-in brei khan gah y tế. Labik ravang me-in jeng hu padang jalan talei pandiak, tuk tuai mboh rup pandiak atau mboh kan suak yava ye ieu tame dom hotline ini piah hu tacei jalan, daong ba. Kol dahlak jeng hu labik brei daok karei saong bilik y tế hu ginup pandap khik caga rup pabhap”

Daok di Mblang bein Đầm Sen kayua Cty CP Dịch vụ Du lịch Phú Thọ khik ramik, dom bruk ravang iek, ngak bui, me-in sambai jeng daok hu peih tabiak. Yaom lac yau nan, min ong Nguyễn Xuân Nghĩa, Phaok Yam ndok kinh doanh Cty Du lịch Phú Thọ brei thau, labik di ong jeng iek bruk di Công viên nước Đầm Sen lac bruk njauk caik hatai piah rami ramik saong paglaong jang bruk pacang caga jit: “Kol dahlak hu ngak bảng QR code piah ka tuai brei thau bruk y tế tapa phone. Di labik pablei vé hu dom vạch kẻ, tuai brei dang atah di gauk tuk blei vé. Urak ini, harei suk, harei car saong harei adit tal kol dahlak brei padeih dom bruk daoh tamia. Daok labik Đầm Sen square, lac labik pablei pandap tuk melam ye kol dahlak brei padeih meng harei 3/5 tui panuac tacei di ban raya”

Bruk ravang iek, me-in sambai lac bruk caong hu di bhap bini saong tapa dom bruk ravang me-in nyu pabak prein ka kinh tế di ban raya HCM, min di tukvak ini, bruk pacang caga jit Covid-19 meng lac bruk brei hu ngak dahlau./.

Urang lang: M. Phương – 08/05