Sang ong Trần Hiển daok di phường Hưng Long, ban Phan Thiết lac sang nao taong cap kaya ikan meng lavik saman. Ong saong dom anek di drei urak ini jeng daok taong cap ikan piah diuk rai. Ong Hiển brei thau, yau ralo baoh sang urang taong cap ikan karei di tasik ini, sang ong pambuak saong riyak lingik rayo sap ndom VN, iek baoh radio yau ayut sahabat nao gam. Angaok tasik, ong Hiển tui pang khau tin ka bruk lingik tasik yaok harei angaok riyak lingik rayo sap ndom VN, meng nan rabha lịch taong cap kaya ikan ka nyu lagaih, nyaik ngin ribuk. Ong Hiển lac:

 “Nao tasik, tuk halei ngak ye ngak, jeng hu tukvak, peih rayo piah pang tin tức, piah thau ngin gah halei piah ba kapal nyaik ribuk”.

Tapa rayo sap ndom VN, urang taong cap ikan samar thau ka jalan ngin, jalan ribuk, pakat nguy hiểm piah pacang plaih khat lahik meng drap ar tal suan yava. Ong Nguyễn Thanh Long daok di phường Bình Hưng, ban Phan Thiết lac urang  pang rayo sap ndom VN meng dom pluh thun ini mai brei thau:

“Jeng njauk pang, pang piah thau ka bruk langik tasik, piah khik siam mekre ka yaok mbang nao tasik ka urang taong cap ikan angaok pulao atah, tasik atah”.

Langiu tasik atah, riyak lingik rayo sap ndom VN biak hu yaom glaong. Dom danak dak di rayo hu urang taong cap ikan cang pang jeng bhian randap yau: danak dak thời sự di 6 tuk mesup, 12 tuk jala pandiak, 6 tuk biar harei, 9 tuk meteh melam hu khan ka bruk lingik tasik, dalam nan, hu bruk lingik tasik angaok tasik hadei di nan. Langiu di nan, angaok hệ thời sự - chính trị - tổng hợp VOV1, dom danak dak pambuak pagam saong labik taong cap ikan saong chủ quyền tasik pulao yau: thủy văn tasik, tasik pulao VN, danak dak Tâm tình biên giới saong pulao tasik…hu urang taong ikan biak takre. Ngan saong dom urang taong cap ikan ranaih umo, dom danak dak ka thể thao saong giải trí jeng ba mai bui sambai tuk nao atah sang. Ong Nguyễn Châu, urang taong cap ikan phường Bình Hưng, ban Phan Thiết lac:

 “Rayo sap ndom VN jeng hu dom danak dak yau caoh blaong, daoh takơ atau hu dom danak dak krei tray au tasik pulao palei pala… nan jeng lac lagaih ka urang taong cap ikan nao ngak bruk, taong cap dalam tuk lahaiy”.

Taphia di nan, khau tin meng rayo sap ndom VN daok hu tacei jalan ka urang taong cap ikan, brei mboh hatai anit ranam saong trách nhiệm di baoh taneh ngan saong tasik pulao di taneh ia palei negar, daong pren ka urang taong cap ikan nao tasik. Urang taong cap ikan angan Phạm Văn Đông, bhian nao taong cap ikan kaya iakn di labik pulao Trường Sa ndom lac, di tuk rah tabiak bruk TQ caik giàn khoan Hải Dương 981, saai jeng yau oh takik urang taong cap ikan karei oh klah duh hatai ka bruk srau kadau. Gam gam tui pang bruk dalam dom danak dak thời sự di rayo sap ndom VN, pang hu sarak di đảng saong rajaei, bruk kiên quyết di VN ka tasik pulao, saai saong dom ayut sahabat nao kapal mboh sahanang hatai jang piah nao tasik.

 “Tuk drei lahaiy drei peih tagok piah drei pang tasik pulao palei negar drei,daoh ka Hoàng Sa, Trường Sa; danak dak tin tức….ngan saong urang taong cap ikan kol dahlak, riyak lingik di rayo biak hu yaom glaong”.

Meng sajarah dak rai 70 thun dak padang saong patagok, rayo sap ndom VN tuk halei jeng nao gam haong bangsa, pambuak pagam pren yava, rai diuk di thời đại. Jeng tui jalan yau nan, rayo sap ndom VN daok patui jalan nao gam, tuk halei jeng lac ayut sahabat anit ranam saong urang taong cap ikan dalam dom mbang nao taong cap di kreh tasik atah, lavik harei./.