Mik va nao pak halei jeng pang mehit sap loa pathau khan bruk pacang caga jit ruak covid 

Dom harei ini, tuk saboh page haong biar harei sup, dom baoh loa papar sap oh hu talei dalam ban sit Đinh Văn, huyện Lâm Hà (t.Lâm Đồng) hu papar sap dom asal kadha praong ka bruk pilih urang ka QH mbang XV saong urang ka HĐ bhap bini dom pakat vaktu 2021-2026. Sa-ai Ka Liên, daok di palei Đam Pao 1, ban sit Đinh Văn brei thau, meng loa papar sap, sa-a haong mikva dalam palei jeng mehit saong thau cambaih ka bruk bầu cử, thau hu tiểu sử di yaok urang tabiak mbaok piah pilih ruah, yaom lac daok ngak bruk sang atau tuk tagok hamu puh. Sa-ai Ka Liên, lac: 

“Dom loa papar sap ini biak siam. Mikva meda pang hu tuk daok ngak bruk, atau nao pak halei jeng pang hu. Nan lac sa dalam dom jalan pathau khan siam lagaih”.

Ban sit Đinh Văn, huyện Lâm Hà hu 22 puk, palei, tổ dân phố ye hu 25 cụm loa papar sap oh hu talei. Ong Đinh Văn Khương, Chủ tịch UBND ban sit Đinh Văn brei thau, dom loa papar sap oh hu talei hu khik ramik saong patagok siam bruk pandar dalam rilo thun tapa. Meng bruk pathau khan dom sarak, jalan ngak di Đảng, hukum di Karja tal dom bruk KT-XH, salih janih phun pala, padang jalan diuk rai siam mekre, palei pala bahrau, pacang caga Covid-19, saong urak ini lac pathau khan ka bầu cử jeng hu nao tal bhap bini biak samar drah saong tantu, cambaih laih. Meng nan, paglaong hu siam lagaih di bruk pathau khan, lac talei pambuak bruk praong di Đảng, karja haong bhap bini.

“Meng dom loa papar sap oh hu talei di ban sit, meng kreh bilan 4 tal harei ini kol dahlak hu pathau khan ka bầu cử. Tapa nan mikva thau hu bruk pilih ruah dalam ban sit. Dahlak mboh lac bruk pathau khan meng dom loa papar sap dalam ban sit lac biak siam, biak kein, lagaih"

Oh njauk lac di ta-eng ban sit Đinh Văn, dom loa papar sap oh hu talei di 178 puk, palei, tổ dân phố di 16 xã, ban sit dalam huyện Lâm Hà, ngan saong 378 cụm loa, 4 bilai papar sap hu peih tabiak gam gam. Ong Nguyễn Huyến, Phaok akaok HĐND, Phaok akaok UB bầu cử huyện Lâm Hà mboh lac, di labik hu taneh riya praong, rahra takik saong daok atah di gauk, bruk srau kadau di jit Covid-19 yau urak ini, bruk khik ramik dom loa papar sap oh hu talei di huyện hu makna biak praong dalam pathau khan bruk pilih ruah urang ka QH mbang XV saong urang ka HĐ bhap bini dom pakat vaktu 2021-2026. Ong Nguyễn Huyến, lac:

“Hadei di tuk brei thau angan dom urang tabiak mbaok piah pilih ruah tui yaok labik ye dom loa papar sap di kol dahlak hu jhul khang bruk papar sap pathau khan. Tui nan dom loa papar sap oh hu talei di dalam huyện hu pathau khan, brei thau cambaih tiểu sử di yaok urang tabiak mbaok piah mikva thau piah pilih ruah. Gam haong nan jeng hu pathau khan dom adat ka bruk pilih ruah piah ka mikva cử tri thau hu, piah ngak siam  bruk di rahra”.

Gam haong dom jalan pathau khan karei yau pano, áp phích, blah rup cih jak ba, băng rôn, khẩu hiệu, radaih pathau khan nao mai… dom loa papar sap oh hu talei di huyện Lâm Hà (t. Lâm Đồng) daok jeng sa jalan pathau khan siam lagaih, rik daong praong tame jak jeng di bruk pilih ruah urang ka QH mbang XV saong urang ka HĐ bhap bini dom pakat vaktu 2021-2026 jaik tal./.

Urang lang : Mousaphuong -15/5