Dom doanh nghiệp caong khin hu samar drah peih talaih kan kandah, nao gam haong jalan ngak biak biai

Bruk tamuh khang di jit Covid-19 mbang ka 4 gam haong dom mbang brei daok atah di gauk gam gam dalam tukvak tapa ngak ka bruk ngak mbang pablei salih, pablei tabiak negar langiu thanh long dalam tỉnh gaok kan kandah trak. Nan lac yaom jien pajeng ba saong bruk pala drak, pablei salih tagok glaong, urang ngak lahik bruk ngak, phun jien njauk klaih klaoh. Rilo doanh nghiệp, hợp tác xã thanh long kurang phun jien piah ngak mbang, pablei salih kayua phun jien takik, prein thanh khoản di doanh nghiệp trun…   

Nan daok lac bruk pablei thanh long tabiak negar langiu di dom pabah mbang tapen negar haong Trung Quốc gaok kan kandah. Dom thun jaik di ini, negar ini bhian salih sarak, dahlau - hadei oh yau gauk ka dom bruk pasang mong, dalam nan hu Lệnh 248 ka bruk tut angan labik pablei tame Trung Quốc. Bruk ini ngak kan kandah tal doanh nghiệp pablei tabiak negar langiu, dalam nan hu baoh thanh long. Nan lac dom panuac brei thau di Hiệp hội thanh long Bình Thuận payua tal UBND tỉnh meng blaoh ka bruk langyah dom caong khin di doanh nghiệp, urang buh jien tame ngak.  

Kayua yau nan ye, piah ka dom doanh nghiệp sahanang hatai ngak  mbang, pablei salih tabiak negar langiu tapa jalan tapen negar gah Barak hu grap tanat, Hiệp hội thanh long Bình Thuận caong khin hu sarak, adat dahlau hadei oh salih karei ka bruk pablei tabiak negar langiu tui jalan tiểu ngạch di taong abih pabah mbang negar gah Barak suai lavik saong tani tanat.

Ong Võ Huy Hoàng – Akaok Hiệp hội thanh long Bình Thuận brei thau, dom doanh nghiệp caong khin hu samar drah peih talaih kan kandah, daong ba, nao gam haong jalan ngak biak biai. Gam haong nan daong ka doanh nghiệp salih tapa tukvak bahrau piah gam khik ramik bruk ngak mbang pablei salih siam mekre, gam pacang jit hu siam lagaih. Tui nan, Hiệp hội pok panuac  caong hu dom jalan ngak daong pasiam veik doanh nghiệp meng bruk daong jien padai tui jalan brei mesre patrun jien jhung jang, daong jien điện…

Daok gah  tỉnh, dom doanh nghiệp caong khin padang ngak saong tacei pato piah peih jalan nao ka doanh nghiệp peih bruk ngak mbang gilac, pasiam veik bruk ngak tabiak, pablei salih ka nyu laghaih haong bruk rah tabiak di jit ruak. Gam haong nan, patagok bruk daong doanh nghiệp gah xúc tiến thương mại, peih prong jang darak pasar pablei tabiak negar langiu. Blaoh ngak brei cakak trun jien ndo gah logistics, pajeng ba, pasang iek piah dui trun yaom pandap panda, khak drak, jru khik caga phun pala… Patagok bruk klauk vắc xin ka manuac urang ngak dalam dom doanh nghiệp, hợp tác xã, trang trại, sang pala ngak, pablei salih thanh long. Pambuak haong Mentri Công Thương hu jalan padang kapul nyaom pablei salih nao mai tal dom darak pasar Iran, UAE, Nhật Bản… piah peih prong jang darak pasar pablei tabiak negar langiu thanh long, plaih bruk pambak tame biak rilo darak pasar Trung Quốc yau urak ini.

Piah lang talaih kan kandah ka dom doanh nghiệp, hợp tác xã, urak ini gah Sở Ngak nong saong patagok palei pala daok pambuak bruk haong dom sở, ngành, puk palei bhian khan brei thau samar drah ka bruk pablei tabiak thanh long di dom pabah mbang negar, dom adat cambat di negar blei tame piah ka bhap bani thau saong ramik veik ka nyu siam bruk ngak tabiak. Langiu di nan, daok patagok siam bruk ngak di tổ tacei pato bruk ngak, pambuak pagam bruk pablei kaya nong di tỉnh dalam tukvak jit Covid-19. Piah samar drah langyah peih talaih dom kan kandah, tavak tave dalam bruk pala ngak, paik baoh, ngak tabiak saong pablei tabiak kaya nong, Sở Ngak nong saong patagok palei pala jeng hu panuac likau UBND tỉnh peih ngak samar drah dom pok daong ka urang ngak, doanh nghiệp, hợp tác xã gaok kan kandah kayua jit Covid-19 tui Sarak ka 68 di raja-ei.

Jang tuk halei karei, ini lac tukvak piah ka dom baoh sang ngak tabiak, hợp tác xã, doanh nghiệp pablei salih thanh long pasiam veik bruk ngak di drei piah duh ka darak pasar Tết Nguyên đán 2022. Urak ini Bình Thuận hu labaih 33.700 ha thanh long, daok tame tuk truac gom. Thanh long karei bilan janih siam urak ini hu yaom pablei tabiak jaik 15.000 đồng/kg, nan lac kadha njauk bui sambai. Yau nan min, bruk duh hatai jeng oh ka abih, tuk jit ruak Covid-19 jeng daok rah tabiak srau dhau, abih di nyu lac bruk hu mbaok di biến thể Omicron ngak ka rilo taneh aia daok sahneng kuhria ka bruk peih pabah mbang kinh tế./.                 

 Urang lang: Jasi – 02/01