Lễ hội Chùa Bà Thiện Hậu Thánh Mẫu rah tabiak di harei ia bulan bak baoh bilan sa tui saka ia bulan lac sa dalam dom lễ hội ilamu praong abih dalam thun di tỉnh Bình Dương, hu mbaok di yaok rituh ribau mbang tuai damuai. Ngan saong jaik 2 triệu tuai damuai mai tal, labik ini hu jeng labik ginreih bo ralo tuai damuai daok dalam saong langiu taneh ia brei mboh tín ngưỡng di drei. Ong David Jond – tuai taneh ia langiu hu mbaok tame lễ hội lac:

“Ini lac mbang akaok meti dahlak mai tal chùa bà Bình Dương saong diuk. Dahlak biak ấn tượng tuk mai ini, dahlak saneng lac menuac sia jeng hu hatai jia ka sa đấng thiêng liêng halei nan,  yau urang hu mai ini, dahlak caong hu siam mekre, salamat ka baoh sang drei”. 

Thun ini langik siam nan ye lễ rok cộ Bà rah tabiak njauk tukvak. Hadei di dom adat thỉnh kiệu bà, njauk 3 tuk biar harei, kiệu bà hu rok nao, jalan nao yau dom thun dahlau, nao tapa dom jalan labik pasak ban sit Thủ Dầu Một. Bruk rok kiệu bà thun ini rah tabiak dalam praong prang. Nao dahlau lac blah cih 4 haroh “"Thiên Hậu xuất du", patui nan lac kapul tamia Hẩu di urang Hoa dalam mbang Phúc Kiến. Hẩu ba akaok kapul rok yau hu makna lac khin pateok atau răn đe dom kanyah jhak… Hadei hẩu lac dom radaih bingu, tal dom pandap binh khí, bát bửu, dom blah bài đề Túc Tĩnh, Hồi Tị. Bruk rok cộ dak hu bui sambai jang saong dom kumei dara, dom naong bingu di dom uraniah brei mboh hatai caong pala drak njauk, hu trei sil.

Yaok rituh ribau urang hành hương hu mbaok tame rok kiệu bà jeng caong khin hu “thỉnh” lộc bà. Bruk thỉnh lộc meng đèn, nhang hu makna lac ba hadah tame pahe, tượng trưng ka bruk siam lagaih, hadah hadai, angan je saong dom patuak jamo ka baoh sang. Makna di bruk rok cộ lac piah bà rivang rah ra saong piah ka menuac sia maong iek, likau patuah, ngak jeng talei pambuak di bruk gireih saong đời thường. Amuk Nguyễn Thị Mão – sa urang daok di quận Bình Thạnh, ban raya HCM hu mbaok tame lễ hội lac:

 “Thun halei jeng nao, rằm ye nao. Daok harei 13, 14 dom kamuan hu padeih nyu nao dahlau.  Drei nao likau ka anek kamuan bac daa, kol nyu ngak mbang hu, drei khang kajap”.

Piah caga ka dom bruk lễ hội, ralo bilan dahlau tết saka ia bulan, urang dang akaok puk palei saong bhap bini urang Hoa bo lambaok nan lac 4 bang urang Hoa hu kuhria caga tani tanat ka dom bruk ngak rah tabiak dalam bilan lễ hội. Tapa lễ hội, thun ini bhap bini urang Hoa daok di tỉnh Bình Dương jeng hu buh tabiak jaik sa tỷ đồng piah peih ngak dom danak dak xã hội yau alin hadiah pandap, padang ngak, paiam veik sang danaok ka urang kan kathaot, alin hadiah paok jien bac ka anek saih kan kathaot, daong dom urang gaok kan kandah karei karei. Ini lac dom bruk ngak rik daong patagok jang makna ka lễ hội ilamu meng kan praong di abih dalam thun di Bình Dương. Ong Lý Lai Phát – akaok mban Phước Kiến, bhap bini urang Hoa daok di Bình Dương brei thau:

 “Kol dahalak mban peih bruk lakau ka taneh ia hu sron mbon, bhap bini hu salamat, hajan siam ngin lagaih, pala drak njauk. Tuai damuai hành hương ngak yau habar ka urang hu hatai jia, mai ini văn minh, lịch sử, an toàn”.

 Meng lễ hội thun ini hu peih ngak siam mekre, salamat, sa mbang tra tuai damuai atah jaik hu mboh cambaih jang jang ka sa Bình Dương salut mbut, chreih chrai saong rap ar tuai damuai./.