Ndam likhah di urang Thái dahlau deih hu biak rilo adat cambat, min meng dom adat cambat nan nyu kak kajap dom duik pasang veik, daong ngak ka bruk likhah caga hu khang kajap, suia lavik. Oh lac kak kajap dom duik pasang, bo nyu daok kak kajap talei rohim di amaik ame dua gah, kak kajap bhap bini, puk palei.

Harei ni, bruk pablak tame gauk di dom ilamu rah tabiak khang, ngak brei rilo janih ilamu meng kan di urang Thái song dom bangsa takik daok lahik nao. Oh lac dom adat cambat dalam likhah caga daok salih karei bo khan aow ngui cuh, ilamu ndom puac daok dang jeng oh dok tamo. Bruk suh sah di ong Lường Song Toàn jeng lac bruk duh hatai di rilo ong amuk taha bangsa Thái daok di Mai Châu.

Dahlau di abih lac ndam likhah, khol drei jhui ngak yau urak ini nyu lihik bruk anit ranam gauk. Likhah ye da-a biak ralo menuac. Dahlau deih amaik ame nao tal yaok baoh sang piah da-a likhah, tuk nan nyu karei, urak ni daa likhah urang randap atau oh randap jeng da-a abih, hu urang mai dong jien bloh nao sang jeng mboh oh hu makna hagait. Drei njauk ngak habar ka nyu linh thiêng dalam ndam likhah, hulin sahaneng lac lingiu di bruk patak pataom, kol drei njauk palih ruah tuai da-a.

Tui ong Toàn, urak ni urang oh patrun patakik adat cambat, bo bruk peih ngak ndam likhah jeng oh yau hei.

Hulin sahaneng lac adat rao takai biak siam. Lễ ăn thề ye njauk ngak kayua nyu ngak pamedeih hatai anit ranam, akaok sahaneng di menuac urang tuk nan. Dok urak ni, khol drei ngak yau gauk, pagap yau tagok hội trường, tuyên bố lý do, dom bruk bo hulin mboh oh njauk song  ilamu. Urak ni, dahlak nao mbang likhah di labik ni dahlak jeng mboh yau nan, daa 2 urang likei kumei tagok bloh cuk karah brei ka gauk, bloh kua gauk cum, lin mboh nyu oh jeng. Urang Thái kín đáo lo, urang oh ngak yau nan anak mbaok rilo menuac.

Oh lac duh hatai tuk dom adat cambat siam mekre, ndung bak ilamu  pato ngak menuac di bangsa drei dok lihik nao, ong Toàn dak duh hatai jang tuk mboh dom cô dâu lac urang Thái min oh takre cuk khan aow meng kan di bangsa drei tra. Harei likhah, oh cuk khan aow di bangsa drei, dom dam dara palih ruah ka drei dom khan aow di urang bhum taneran.

Ndam likhah harei ni di palei pala jeng yau nan, nao pah ao likhah cuk tame. Dom ong muk ndom lac habar cuh ngui yau nan, drei lac urang Thái brei angui cuh pandap Thái di drei nyu siam jang. Drei cuh nyu siam jang hasit mboh nyu biak mekre biak trịnh trọng, min daok nao tui mốt, daok nao pah aow, pah trang điểm. Trang điểm jeng hu min pah khan aow likhah lac bruk jhui ngak, njauk cuk khan aow meng kan di drei yau nyu pok prong ilamu bangsa drei jang.

Pathau mik va song tong abih gauk! Ba drei tame dunya song patagok, urang Thái jang yau dom bangsa karei meda gaok rilo kadha bahrau. Yaom lac khin atau oh khin, khol drei hua mboh di anak meta lac, dom ilamu, abih di nyu nan lac dom adat cambat ndung bak bruk pato pakai dalam ndam likhah di urang Thái daok di Mai Châu (Hòa Bình) rilo takik hu salih karei. Kadha bo khol hulin song urang roh duah ilamu bhap bini Lường Song Toàn khin ndom tal di labik ni lac, yaom lac ba drei tame song patagok tal halei, khol drei brei iek prong ilamu siam mekre bo ong muk di drei dom saman ini mai hu khik, kayua ilamu lac suan yava di yaok bangsa./.