Mbaok jalan 2 gah nao mai biak sit, rilo  lubang kluc nan ye ngak radaih container nao mai biak kan kandah, bhian rahtabiak bala

Pabah mbang negar Bình Hiệp lac pabah mbang pakat dunya jalan haluk daok di xã Bình Hiệp, ban sit Kiến Tường, tỉnh Long An, labik pajeng ba pandap panda pablei salih nao mai haong pabah mbang Prey Voa, huyện Kampong Rou, tỉnh Svay Rieng, Campuchia. Rilo thun tapa, labik ni tuk halei jeng joa gidang kayua dom radaih pajeng pandap panda nao mai biak takik. 

  Rilo doanh nghiệp brei thau, piah ba pandap meng dom pabah lamnge kraong, tasik, dom labik ngak kong di bhum Đông Nam bộ tal pabah mbang negar Bình Hiệp njauk nao meng jalan roya 62. Ni lac jalan praong abih saong tok hu sa jalan ini, min jalan daok khut biak trak. Mbaok jalan 2 gah nao mai biak sit, rilo  lubang kluc saong abih di nyu nan lac oh parabha gah nao mai ngak  ka dom sruh radaih pajeng pandap, radaih container nao mai biak kan kandah, bhian rahtabiak bala. Ong Lê Quốc Thắng, pô padang ngak Cảng dunya Long An ndem lac: “Long An ye pambanh lamnge jeng hu paje, jalan pambuak pabah lamnge jeng hu padang ngak. Yau Long An ye pajeng ba pandap pablei salih nao mai haong Campuchia, min dom jalan pambuak meng pabah lamnge tal pabah mbang negar pakat dunya daok biak kan kandah. Dahlak caong lac hu bruk sangka rilo jang.”

Tui ong Ngô Văn Nhân- Phaok akaok Chi cục Hải quan pabah mbang negar pakat dunya Bình Hiệp, langiu di bruk nao mai kan kandah, daok hu dom makna ngak ka pabah mbang ni trun prein di 1 pabah mbang negar pakat dunya. Dalam nan hu bruk radaih container jeng ka oh pajeng pandap nao mai tapa pabah mbang negar hu yaom lac hu Harak pambuak bruk pajeng ba jalan radaih di Việt Nam saong Campuchia. Langiu di nan, rilo bruk di labik ni daok ngak ka pabah mbang negar kurang bruk meriak gauk, yau ye: labik laboa, kho caik pandap lac hu min ka oh pabak hu hatai caong: “Daok hu dom bruk jeng ka oh pabak hu hatai caong yau ye labik manei, jaman vệ sinh, labik daok di tuai rivang main, doanh nghiệp pablei pandap tabiak negar langiu jeng ka oh hu. Bahrau ini, mban khik ramik bhum kinh tế jeng hu padang dom kapul mek jien dom radaih pajeng pandap pablei salih tame tabiak negar, min kayua kan kandah ka labik laboa nan ye njauk daok gam haong Chi cục Hải quan.” 

Bruk ba pabah mbang negar Bình Hiệp - Long An cak rok patagok njauk haong angan lac pabah mbang pakat dunya, hu daong salih bruk ngak biên mậu di bhum tapen negar Tây Nam saong daok jhul pachreih rilo labik di tapen negar, yau ye ban sit Kiến Tường, huyện Mộc Hoá, huyện Vĩnh Hưng gam cak rok patagok. Ong Nguyễn Văn Vũ, akaok UBND ban sit Kiến Tường, tỉnh Long An brei thau: ban sit hu bhum kinh tế pabah mbang negar saong labik ngak kong 168 ha. Mayah pasiam hu jalan mbak ye bruk nao mai meng TPHCM tal labik kinh tế, labik ngak kong pak ini hu dui katut veik, meng 3 maong trun daok sa maong mateh. Tuk nan, bruk ngak di pabah mbang negar Bình Hiệp chreih chrai jang, rilo radaih nao mai jang. Caong yau nan, min bruk samar drah lac jalan roya 62 brei hu samar buh jien tame ngak, peih praong: “Bruk kan kandah lac jalan mbak, labik laboa ka oh ginup. Khol dahlak hu thau dom danak dak njauk buh jien tame ye hu Trung ương ba tame saong caga padang ngak. Anak tal mayah lang talaih hu dom kan kandah gah jalan mbak ye meda langyah hu rilo bruk karei. Oh lac patagok biên mậu bo daok dui tui dom dịch vụ pablei salih, mbang manyum saong ban sit Kiến Tường meda hu cak rok patagok. Daok bruk di karja palei, khol dahlak jeng pambuak gauk ieu urang buh jien tame, duah urang pambuak bruk ka bhum kinh tế…”

Dalam thun bloh, kayua kan kandah di jit ruak Covid-19, piah trun meneing bruk gar pandap di pabah mbang negar Mộc Bài (tỉnh Tây Ninh), rilo doanh nghiệp hu ba rilo pandap pablei salih nao mai tapa pabah mbang negar Bình Hiệp, tui nan labik ni hu chreih chrai tagok. Min, meng hadei Tết nguyên đán tal urak ni, dom sruh radaih container nao tapa ni trun khang. Mayah oh samar buh jien tame ngak pasiam hạ tầng, abih di nyu nan lac ngak pasiam jalan mbak, anak tal meda lac pabah mbang negar ni meda joa gidang yau dahlau deih lac biak palai pajoa./.

 Urang lang: Thu Thảo – 15/03