Rah tapa dua mbang mesruh meblah độc lập bangsa, Long Hưng lac sa dalam dom labik njauk palai pajoa khang di kaol khamang. Dalam xã hu 102 Urang amaik Việt Nam Anh hùng luan aia meta tame dalam hatung piah palao pasang, palao anek tagok jalan… rik daong tame bruk peih paha bangsa. 521 liệt sĩ, 128 thương binh, bệnh binh, 103 Amaik Việt Nam Anh hùng… brei mboh bruk pandik harao dalam tuk mesruh metak di bol lin saong bhap bani Long Hưng, lac pren khang piah ka karja saong bhap bani Long Hưng yam tapa dom kan kandah hadei di harei taneh aia yasa piah dak padang saong cak rok patagok bruk ngak mbang kinh tế.

Tui ong Lê Văn Hoàng, dahlau diah ngak Bí thư Đảng ủy xã (dalam dom harei bahrau peih paha), lac bhum mesruh metak, daok jaik taphia Bình Đức nan ye Long Hưng njauk kaol khamang taong tayah tayac, bhap bani klaak hamu apuh nao labik karei duah bruk ngak mbang… Hadei di harei 30/4/1975, karja palei iew bhap bani mai veik palei peih pasiam veik bruk pala drak, kham merat yam tapa kan kandah piah hu Long Hưng yau harei ini. Meng sa xã biak kan kandah di huyện, tal harei ini Long Hưng hu yam tagok jeng 1 dalam dom xã ba akaok nao dahlau di huyện ka bruk dak padang saong cakrok patagok palei pala bahrau.

Lac xã harat ngak nong, Long Hưng hu padang bhum taneh pala phun mbang baoh angaok mblang taneh 1.000 ha ngan haong dom janih phun mbang baoh hu yaom glaong yau: baoh aia tasau Vĩnh Kim, sa pô chê, kruac bung kalik hijao, la-u,… Labik pala njam patam dom janih yau: akaok lasun, hẹ, baoh kadhaoh, ba-yein,… angaok labaih 200 ha. Gah raong glang jeng cak rok patagok haong tapon pabui labaih 5.000 drei, tapul limo 450 drei, tapon pabe 3.200 drei saong tapon menuk ada 55.000 drei. Meng labik lac jaik abih bhap bani jeng kan kathaot, kurang anak kurang likuk, gaok mai kurang mbang tuk cang bilan yuak, tal urak ini, xã Long Hưng trun hu baoh sang kathaot daok 2,1%, tapa 58% dut haong bruk ba tabiak.

Abih di nyu nan lac, tapa peih ngak 5 kadha "Xã ilamo palei pala bahrau",  bruk ngak mbang kinh tế, ilamo dalam xã hu cak rok patagok khang kajap; talei rohim puk paga dak harei dak kak kajap, khik ramik; ilamo meng kan hu cak rok patagok… Tapa bruk urang nong pakacah gauk ngak mbang pablei salih naih jioy, rik daong paglaong rai diuk bhap bani, ngan haong jien mek tame kuhria rah tapa tui akaok  menuac di xã tal harei ini hu jaik 40 triệu đồng sa thun, baoh sang kathaot trun daok 3%. Bruk y tế, xã Long Hưng mek hu tanut chuẩn Negar tunut chuẩn bahrau, pabak hu bruk iek ruak di bhap bani dalam xã; manuac urang blei bảo hiểm y tế hu 90%. Baoh sang pandar điện, aia hacih hu jaik 100%, dalam nan hu 90% baoh sang pandar aia hacih mek hu quy chuẩn di Mentri Y tế…  

Thun 2020, bruk brei radaih nao tapa tatua Long Hưng- baoh tatua tapa ribaong Nguyễn Tấn Thành pambuak pagam 3 palei bờ Tây haong 6 palei bờ Đông di xã hu daong ngak brei salih bahrau Long Hưng. Ini lac baoh tatua daok caong hu dalam yaok pluh thun tapa di xã Long Hưng. Ong Nguyễn Văn Mười, lac urang nong ngak mbang pablei salih naih jioy pakat tỉnh rilo thun gam khan brei thau: “Daok kanar dahlau diah tuk oh ka hu tatua, dahlak pajeng baoh kayau tapa darak Vĩnh Kim pablei ye labuh dom mbang, kayua melam langik sup trun tagok phà biak kan kandah, rambah rambup rilo. Dom pluh thun paje caong khin di bhap bani meng hu jeng biak. Urak ini, jalan duan, tatua nao mai siam laghaih”.

Harei ini, labik inem mek Nam kỳ khởi nghĩa di baha Long Hưng hu dak angan Inem mek sajarah pakat negar, lac labik mai veik halau, pato pakai ilamu cách mạng ka dom rai rah dam dara harei ini. Patagok pren khang di Khởi nghĩa Nam kỳ dahlau daih, Long Hưng daok cak rok patagok tui jalan ngak nong công nghệ glaong saong jalan ngak atah jang nan lac cakrok patagok bruk ngak mbang, pablei salih, công nghiệp, tiểu thủ công nghiệp./.

Urang lang: Jasi - 23/11/2021