Urang nao dahlau dalam bruk pandih hu pajaih phun bàng vuông angaok pulao Lý Sơn nan lac Trung tá Nguyễn Văn Đào, Chủ nhiệm Hậu cần, Ban Chỉ huy Quân sự huyện Lý Sơn, tỉnh Quảng Ngãi. Labaih meteh rai pambuak saong pulao Lý Sơn, mboh dom mbang ngin ribuk tuh tapa pulao, Trung tá Đào thau lac, tok hu phun bàng vuông lac pacang hu ngin ribuk saong ba mai sambo hijao ka pulao. Meng nan, trung tá Nguyễn Văn Đào saong dom urang lin dalam đơn vị peih bruk pandih pajaih phun bàng vuông angaok huyện pulao Lý Sơn.

“Thun camereip ngak iek, oh hu siam lagaih bloh patui pandih veik. Kol dahlak pandih saong ieu pataom tapon nyaom bol pan phao kraong gam pandih saong pala. Bhap bini mboh mai likau nao pala angaok pulao jeng ralo”.

Meng bein pandih di urang jakar, urang lin di mban chỉ huy quân sự huyện Lý Sơn, phun bàng vuông hu pacah meta dalam bein sang bhap bini, tapen dom jalan sit, tapen tasik, ngak jeng sambo hijao angaok pulao. Ralo baoh sang pandih yaok pluh ribau phun bàng vuông pabak ka mikva angaok pulao. Ong Nguyễn Văn Sinh, palei Tây, xã An Vĩnh, huyện Lý Sơn brei thau:

 “Lý Sơn meyah pala phun bàng vuông ye oh phun halei samu. Janih phun ini biak mbuan pala saong mbuan khik iek, tamuh hu dalam ngin ribuk”.

Trung úy Võ Duy Hoài Nam, Bí thư Đoàn dam dara Ban Chỉ huy Quân sự huyện Lý Sơn, tỉnh Quảng Ngãi ndom lac, phun bàng vuông pambuak saong Hải đội Hoàng Sa meng lavik samar ini mai, nyu brei mboh ka pren khang di bhap bini saong urang lin angaok pulao.

 “Ngan saong dom urang lin di huyện pulao ini, phun bàng vuông lac sa dalam dom janih phun biak karei pambuak saong rup binguk urang lin. Adei saai kol dahlak lingiu ini, tuk maong phun bàng vuông ye khang hatai jang piah pacang veik ngin ribuk jeng yau khik caga chủ quyền di taneh ia palei negar”.

Ong Trần Ngọc Nguyên, akaok UB bhap bini huyện Lý Sơn brei thau: huyện hu pambuak bruk saong bộ chỉ huy quân sự tỉnh Quảng Ngãi peih ngak dự án pala glai pacang caga pambuak saong cảnh quan môi trường, paglaong bruk pacang me-om glai angaok pulao Lý Sơn jaik 20%. Bàng vuông lac sa dalam dom janih phun hu palih ruah piah pala tui dự án ini. 

“Kol dahlak ieu pataom taong abih hệ thống chính trị di huyện, xã saong bhap bini, ngak jeng saneng glaong dalam bruk patagok pala phun piah pabak hijao angaok pulao. Kol dahlak thau lac, pulao Lý Sơn patagok tui jalan du lịch bo bruk pala phun oh ka patagok khang, oh ka hu hijao glai, dom bãi bồi tapen tasik, phun cảnh quan jeng oh ka ginup ye kurang pren dui pachreih saong oh khik kajap ka bruk patagok dalam harei hadei”.

Dự án pala glai pacang caga angaok huyện pulao Lý Sơn kayua bộ chỉ huy quân sự tỉnh Quảng Ngãi ngak po đầu tư ngan saong yaom jien abih tih labaih 20 tỷ đồng di angaok taneh praong 130 ha. Jak jeng di dự án rik daong pacang gluit jaleih taneh, khik kajap halau ia ngầm, pasiam điều kiện khí hậu, ngak jeng cảnh quan hijao, hacih, mekre, khik kajap an ninh, quốc phòng./.