Rilo danak dak padang ngak di tỉnh ban hu peih ngak 

Bruk caik hatai pathau khan hu daong ka urang ngak kuhria caga tanit tanat harak gar, ilamu, thau cambaih hatai caong khin di urang palih ruah piah javap jaleiy hu siam di abih tuk hu sua tangi di mbang giao dịch bruk ngak tapak angaok mạng. Sa-ai Trương Hải Đăng (23 thun), palei daok di tỉnh Hậu Giang, mai tal Pasak Dịch vụ bruk ngak ban Cần Thơ piah likau tame ngak di Công ty Cổ phần Tapuk saong pandap panda Cửu Long brei thau, sa-ai hu thau ka bruk palih ruah ini tapa blah web di Pasak Dịch vụ bruk ngak nan ye sa-ai samar drah tut angan tame. Bahrau bac tamat nan ye ini lac vaktu piah ka sa-ai taom gaok haong doanh nghiệp, duah thau cambaih abih bruk, blaoh sa-ai kuhria caga harak gar ginup abih:

Dahlau daih, dahlak jeng hu mbaok tame dom mbang sua tangi tapak angaok mạng, mboh jalan ngak yau nan jeng oh kan piah taom gaok, nyu jeng mbuan laghaih ka gah duah bruk ngak saong urang nao phỏng vấn tra. Dahlak jeng thau lac brei hu klauk jru pacang caga jit, hu klauk ginup blaohdahlak meng hu mbaok tame. Tapa mbang phỏng vấn ini dahlak caong khin duah hu bruk ngak yau hatai caong khin.   

Piah brei thau ka mbang Giao dịch, dom Pasak bhian brei thau gam gam (ka harei peih bruk, dom bruk ngak hu palih ruah, jalan piah hu mbaok tame,...) angaok Cổng thông tin điện tử di dom pasak Dịch vụ bruk ngak bhum ĐBSCL – TP HCM - Bình Dương. Langiu di nan, Pasak Cần Thơ hu peih mbang khan tapak angaok Blah facebook di pasak piah brei thau dom kadha, tacei pato urang hu mbaok tame sua tangi tapak saong online; Pasak Trà Vinh peih ngak tui jalan ngak radaih nao mai piah pathau khan ka bruk ini; di Tiền Giang, Bến Tre hu papar sap angaok Rayo papar sap – papar binguk di tỉnh; pak Kiên Giang ye peih bruk tuan băng rôn di dom canah jalan prong piah ka bhap bani thau saong hu mbaok tame.        

Di mbang giao dịch bruk ngak tapak angaok mạng, amuk Lê Thị Thu Ngân, urang ngak di jabat nhân sự, Công ty TNHH TeaKwang Cần Thơ biak bui sambai kayua hu mboh công ty di drei hu rilo mbuan lagaih piah palih ruah hu menuac ngak meng rilo gah karei di gauk. Gah Pasak dịch vụ bruk ngak Tiền Giang jeng pambuak hu 81 urang ngak haong 07 doanh nghiệp dalam mbang giao dịch bruk ngak tapak. Tapa nan, dom  doanh nghiệp palih ruah hu 22 urang ngak.

 Tui amuk Nguyễn Thị Dân Quyền, urang dang akaok Pasak Dịch vụ bruk ngak Tiền Giang, urak ini hatai caong khin palih ruah urang ngak di dom doanh nghiệp dalam tỉnh tut angan tame biak rilo, mboh rilo lac urang ngak phổ thông. Yau nan min, meng akaok thun tal ini, Pasak Dịch vụ bruk ngak Tiền Giang tok meyaih khan ka dom doanh nghiệp labaih 2.000 urang ngak, dalam nan hu 802 urang ngak hu palih ruah, tok mek hu 45% bruk ba tabiak dalam thun. Kayua yau nan ye, bruk peih giao dịch bruk ngak tapak angaok mạng pakat khu vực nan lac jalan ngak bahrau, biak siam dalam tukvak jit Covid -19 daok rah tabiak khang. Gah Pasak jeng pachreih tui saong daok hu mbaok tame danak dak ini:

Tỉnh drei meng dahlau mai oh ka peih ngak online mbang halei. Drei bahrau mbang akaok mereip peih ngak haong dom tỉnh ini min. Thun ini, hu biak rilo salih bahrau, hadei di tuk peih tabiak blaoh, yaok pasak pambuak pagam hu haong urang ngak, phỏng vấn hu urang ngak. Anak tal meda hu peih ngak di tỉnh Tiền Giang. Dom mbang giao dịch dahlau diah pataom urang mai tal min palih ruah oh hu hadom. Daok thun ini kayua bruk pathau khan di drei siam nan ye peih ngak hu siam jang. 

Meng jak jeng siam mekre di mbang giao dịch bruk ngak tapak angaok mạng mbang ka 1, tui kuhria dalam bilan 11 atau bilan 12/2021, Pasak Dịch vụ bruk ngak ban Cần Thơ daok brei pambuak bruk haong dom pasak dịch vụ bruk ngak di bhum ĐBSCL saong dom tỉnh ban prong gah Meraong peih mbang Giao dịch bruk ngak tapak angaok mạng mbang ka 2. Ini lac bruk ngak siam piah pabak brei ka doanh nghiệp dalam saong langiu negar urang ngak njauk haong hatai caong khin piah gilac ngak bruk hadei di tukvak atah njauk kan kandah di jit Covid-19./.

Urang lang: Jasi -5/11