Bhum 4 Hải quân hu caga dahlau bruk daong ka dom tinh, bal yau ye brei kapul nao daong  pruh jru pametai anek ruak

Taduan dom pandap mbang, kaya nong, pataih pacang mbaok, ia jru pametai anek ruak di dom urang jakar, urang lin Bhum 4 lin tasik saong quân dân huyện pulao Trường Sa payua brei bhap bini ban raya HCM pacang jit COVID-19, ong Phạm Minh Tuấn, Phó akaok UBMT negar ban raya drut droi lac: “Biak thau dhar phol urang jakar, urang lin saong bhap bini daok di kaoh pulao Trường Sa. Yaom lac raidiuk kan kandah min daok kham merat payua brei. Nan jeng lac bruk pachreih ba piah ka bhap bini ban raya HCM yam tapa jit praong.”

Tuk jit COVID-19 mboh yau tamuh khang di dom tỉnh Nam Trung Bộ, Bhum 4 Hải quân hu caga dahlau bruk daong ka dom tinh, bal yau ye brei kapul nao daong Phú Yên, Khánh Hòa pruh jru pametai anek ruak; brei kapul quân y nao ngak bruk di dom sang iek ruak njom mbak ka 4 di Mintri Quốc phòng saong hu mbaok tame pacang caga jit di ban raya HCM. Gam haong nan, jak ba urang jakar urang lin saong bol lin, bhap bini daok ngak bruk di Trường Sa rik daong pandap panda, rik jien piah blei pandap mbang, pandap pandar yaok harei, daong ka bhap bini dom tinh, bal saong peih tabiak danak dak nhắn tin daong "kadung jien vaccine pacang caga COVID-19". 

Bahrau ini urang jakar urang lin Bhum 4 Hải quân hu pataom blei kaya nong daong ka bhap bini huyện Đức Trọng, tỉnh Lâm Đồng, hadei di nan payua tal bhap bini ban Thủ Đức, ban raya HCM. Đại tá Lã Văn Hùng, Phó Chính ủy Bhum 4 Hải quân brei thau nan lac hatung hatain di urang jakar urang lin Bhum 4 Hải quân saong quân dân Trường Sa: “Khol dahlak padang ginup jalan ngak, caga siam meng menuac tal pandap, caga pabak  bruk pacang caga jit, khik siam mekre salamat ka labik quân sự Cam Ranh, abih di nyu nan lac kapul caga mesuh. Dom urang jakar urang lin Bhum 4 tuk halei jeng halain hatain daong ka bhap bini labik drei daok saong dom bhum kan kandah labik pasak jit ruak.”

Dalam dom harei taneh ia khang drei pacang jit COVID-19 ye di langiu tasik atah, quân dân Trường Sa jeng bhian duah thau ka bruk jit ruak piah hu jalan pacang caga. Labik kaoh pulao atah bayah, bruk pacang caga jit biak hu caik hatai sangka, abih di nyu nan lac ngan saong mikva urang taong ikan tuk tame pulao. Ong Trần Đình Xuyên, Phaok akaok UBND huyện Trường Sa daok brei thau lac: “Urang lin haong rahra huyện Trường Sa hu rik daong jien piah blei kaya nong, pandap mbang, saong pandap pandar yaok harei daong ka ban raya HCM. Abih gauk tuk halei jeng paglaong hatai saneng pacang caga jit, kham marat oh caik ka jit ruak njom mbak tame labik đóng quân saong di mangaok dom pulao”

Gam haong bruk pacang caga jit ruak di dom kaoh pulao atah bayah ye dalam labik quân sự Cam Ranh, abih di nyu nan lac dom kapul ngak bruk di mangaok tasik saong kaoh pulao Trường Sa, Bộ Tư lệnh Bhum 4 Hải quân hu ba tabiak ngak ginup, ngak catang dom bruk pacang caga jit,ngak njauk tui jalan pacang caga jit ruak di Mintri y te. Đại tá Nguyễn Thiên Quân, Phó Tư lệnh, akaok mban tacei pato pacang caga jit COVID-19 Bhum 4 Hải quân, lac: “Gam saong bruk daong khik quyen ngak po di kaoh pulao, caga mesuh, Bộ Tư lệnh Vùng thau lac bruk pacang caga jit COVID-19 lac bruk ngak hu makna praong. Kayua yau nan ye njauk peih ngak samu gauk dom jalan, abih di nyu nan lac khik prein yava ka bộ đội, ka dom kapul ngak bruk di dom pulao, bhap bini daok di dom pulao saong urang taong cap ikan”

Urang jakar, urang lin Bhum 4 Hải quân meng baoh taneh tal kaoh pulao atah bayah jeng thau paglaong hatai saneng dalam pacang caga jit, kham marat oh caik ka jit njom mbak tal dom pulao di kaoh pulao Trường Sa, daong ka bộ đội ginup prein yava, ngak hu siam bruk pasram, caga mesuh, daong khik caga quyen ngak po tasik, pulao di taneh ia./.

Urang lang: Thu Thao – 16/09