Thun ni, ong Lê Hải Thanh umo 71 thun, dok di palei Đá Bàn 1 meng  sit nan ye ong thau cambaih dom kan kandah di mikva dalam palei tuk oh hu sang ilamu piah taom gaok, ginum biai. Ong Thanh brei thau “Dahlau deih kayua oh hu sang ginum biai nan ye yaok mbang taom gaok, ginum biai, mikva nyim sang urang, gam sit giniuk gam oh lagaih ka sang nan. Lingiu di nan, rilo tal pato pasram ilamu kỹ thuật ba tal palei jeng hu ba tapa dom palei karei kayua oh nyim hu sang. Cong khin hu sa boh sang ilamu piah taom gaok, ginum biai, piah pathau khan dom ilamu, paglong akaok sahaneng, ba ilamu kỹ thuật tame bruk ngak mbang, rong glang lac bruk suh sah di mikva dalam palei.

Thun 2013, peih ngak danak dak padang ngak palei pala bahrau, palei Đá Bàn 1 hu dong 50% jien piah padang sang ilamu, yaom jien dok vei kayua bhap bini rik tame. Min di tuk vak nan, kayua kurang taneh nan ye labik padang sang ilamu di palei hu quy hoạch dok biak atah pasak, jalan nao oh lagaih, khin padang sang ilamu brei peih prong jalan, ngak tatua tapa chraoh, ngak yau nan jien drik dong di mikva brei hu rilo jang. Anak dom kan kandah nan, ong Thanh sahaneng bloh ginum biai song diuk anek, alin hadiah brei labaih 865 m2 taneh di sang drei dok di labik jalan prong di palei piah padang ngak sang ilamu.

Hadei di tuk alin brei taneh, ong Thanh song mikva dalam palei samar tak klaak phun cọ, phun keo dok tamuh siam angaok taneh mbuan di sang piah mek taneh ngak sang ilamu. Ong song urang jakar di xã, di palei nao tal dom jabat chức năng ngak dom harak gar alin hadiah taneh tui adat hukum. Tal bilan 1/2015, sang ilamu palei Đá Bàn 1 hu padang ngak praong siam di angaok taneh mbuan di sang ong Thanh dahlau deih. Sang hu ngak tui kiến trúc sang kayau prong 120 m2, hu ginup dom janih yau labik nao jaman, mblang bein, paga, trang thiết bị, pabak ka bruk taom gaok, ginum biai di bhap bini song yaom jien padang ngak abih tih labaih 380 triệu đồng. Dalam nan karja dong 150 triệu đồng, UB bhap bini xã dong 30 triệu đồng, dok veik kayua mik va dalam palei rik tame. Sang hu ngak salah bloh dalam chreih chrai bui sambai di mik va dalam palei, bruk cong khin hu sa boh sang ilamu di bhap bini palei Đá Bàn 1 meng lavik mai hu jeng biak. 

          Sang ong Lê Thanh Hải hu 7 urang daok dalam sa boh sang kayau hu ngak meng 40 thun dahlau. Rai duik di sang ong pagam pambak tame 6 sào hamu song rong dom drei menuk, dom drei pabui. Min tuk lahaiy bruk ngak nong, dom urang anek di ong Thanh nao ngak mbang pah piah duah jien ka boh sang. Meyah kuhria tabiak yaom jien taneh mbuan di tukvak sang ong alin brei piah padang ngak sang ilamu ye nyu hu yaom tal yaok rituh triệu đồng, nan lac yaom jien biak praong ngan saong sa baoh sang urang ngak nong. Min kayua kein laba di puk palei, di bhap bini, ong Thanh alin brei taneh ka palei bo oh kuhri kuhria hagait. Ong Thanh khan lac: brei taneh ngak sang ilamu lac bruk ngak hu makna oh lac piah duh ka rup drei bo daok piah brei ka anek taco harei hadei, mik va dalam palei hu labik taom gaok, ginum biai, tapa nan hu thau rilo kadha bahrau, hu labik main sambai , daong ngak ka bhap bini jum pataom gauk jang.

Langiu di bruk alin brei taneh ngak sang ilamu, sang ong Thanh dok kham merat rik dong jien padai piah ngak jalan bê tông di palei. Dom bruk ngak di ong Lê Hải Thanh jeng sa kreih camin hadah dalam bruk padang ngak palei pala bahrau di tỉnh Tuyên Quang./.