Mik va Cham Islam di ban raya HCM hu labaih 7.500 urang dok di 17 quận huyện. Dalam dom harei ni yam tame dom labik hu urang Chăm daok di ban raya, bruk mbuan mboh di abih nan lac mbaok meta mik va thei thei jeng chreih chrai. Sang halei jeng kuhria caga, puh ramik tual gom bingu. Piah caga ka harei roya, meng rilo harei dahlau, mik va ngak dom janih har meng kan yau nâm-keng, sa-ka-ya, ha-bum piah taduan raya song piah payak tuai damuai, ayhut sahabah.

          Melam dahlau harei roya, sang halei jeng medeih tal kreih melam, yau urang Yuan daok cang giao thừa. Ni jeng lac tuk piah ka dom urang dalam sang ndom nyai nao mai song gauk, klah rabha ka gauk dom bruk ngak hu, jang yau dom bruk oh ka ngak hu dalam thun.

          Bui sambai harei roya di mik va Chăm Islam ban roya yau hu tagok jang 2 tuk bahrau ni, bhap bini Chăm Islam ban roya peih ngak hu siam Nyaom roya urang lambaok bhap bini Chăm Islam ban raya. Nyaom roya hu palih tabiak 16 urang lambaok vakil ka mik va mbang ka 5 (2015-2020), piah pambuak talei rohim di mik va song dom mban, ngành, iek glang rai duik ka mik va dak harei dak siam mekre jang. Ong Muhammad Musa, sa urang hu angan je dalam bhap bini Chăm Islam dok di Quận 5, ban raya HCM brei thau bruk bui sambai tuk bhap bini Chăm bahrau hu mban Đại diện bahrau njauk di tuk Roya haji, ong lac: Raya thun ni biak sambai, khol hulin bahrau palih ruah hu mban Đại diện ka bhap bini, tapa nan khol hulin hu sap ndom haong karja ban raya, dom mban, ngành, piah sangka iek glang jang ka bhap bini khol hulin dak harei dak patagok, rik dong pren yava tame padang ngak ban raya angan Wa anit ranam.

Sa bruk bui sambai tra hu mai tal mik va Chăm Islam di ban raya HCM nan lac dalam harei Roya Aidl Adha ni, Kapul ngak pahla IHH (Thổ Nhĩ Kỳ), kapul ngak pahla Wamy (Saudi Arabia), kapaul Jakim Ekram (MaLaysia) hu dong jien piah ka Mban đại diện bhap bini Chăm Islam ban raya HCM blei limo, pabe, atau pabo ngak Qurban, brei rilaow ka urang kan kathaot taduan raok Roya. Tui nan, thun ni, ban raya HCM hu 324 drei limo. Ong Haji Mach Dares Ismaen, Phó Ban Đại diện urang Islam raya Hồ Chí Minh lac:

Tui adat cambat, harei roya haji, lac harei urang Chăm Islam ngak Qurban sa drei limo, pabe, atau pabo. Hadei di tuk sik ngak ralo bloh, ralo nan hu paraba ka mik va kan kathaot dalam Jamaah. Tui urang Chăm, tuk tame harei Roya Haji sang halei jeng hu rilaow limo piah mbang. Taphia di nan, dom boh sang ngak mbang hu dalam thun, tal harei ni hu kaoh tabiak hasit jien, nao tal sang halei kan kathaot piah dong brei. Meng nan, bhap bini urang Chăm yau kak gam gauk jang, jum pataom, anit ranam gauk jang.

Harei roya Haji jeng lac tuk dom urang dalam sang taom gaok gauk, atau nao rivang sirah gauk gar, likau maaf gauk song tadhau ayuh gauk hu rilo pren yava… Dom adei saai kamei Chăm cuh ngui khan aow bahrau saong blah khan meom angaok kaok biak mekre, urang likei nao  sang megris sambahyang cuk ngui biak siam. Ni lac harei Roya bo taong abih mikva Chăm Islam chreih chrai taduan cang. Amuk Salymah dok di phường 13, quận 3 lac:

          Bruk chreih chrai uan raok harei Roya Haji hu mboh di grauk labik dalam dom jamaah Chăm, saong bui sambai jang tuk rai duik di mik va Chăm dak harei dak hu salih bahrau. Mik va Chăm ban raya oh var hu bruk dong ba di Đảng song karja, ba gauk jum pataom duikrai siam ka dunya, mekre ka agama./.