Pathau mikva… Bhap bini chăm tỉnh Ninh Thuận daok rok kate thun 2015. Thun ini, kate hu peih tabiak meng harei 11/10 tal harei 13/10 tui saka ia harei. Dalam bui sambai nan, rilo palei chăm hu peih bruk daoh tamia, me-in thể thao piah pamơrơ bhap bini. Thúy Linh, urang vak di rayo sap ndom VN daok di ban raya HCM hu kadha vak brei thau brukc chreih chrai uanraok kate thun ini di dom palei chăm dalam tỉnh Ninh Thuận. Daa mikva saong taong abih gauk tui pang:

Dom harei ini, bhap bini chăm daok di palei Hiếu Lễ, xã Phước Hậu, huyện Ninh Phước, tỉnh Ninh Thuận padeih bruk ngak hamu puh yaok harei di drei piah rok kate dalam bui sambai kayua rai diuk dak harei dak ginup meda jang. Oh lac tari tarieng ngak mbang, patagok kinh tê baoh sang, mikva dalam aplei thau jum pataom gauk, daong ba gauk dalam rai diuk saong hu mbaok tame dom bruk ngak di puk palei. Barau ini, pandiak bhang dui atah ngak kan kandah bruk ngak nông min mikva chăm kham merat duah dom jalan ngak pacang cakak pandiak bhang hu kein lagaih, tani tanat bruk ngak mbang, raong glang. Mikva gam jak gauk rik daong labaih 200 triệu đồng piah ngak pabah mbang palei, tuh bê tông dom jalan palei.. Piah pok meyaom dom bruk ngak hu di bhap bini dalam tukvak tapa saong pamơrơ kate ini, dom nghệ nhân dalam klup kapul alat ragam Chăm Phước Hậu hu mai yuk saranai, taong ginăng, taong baranưng. Ong Vạn Sổ - chủ nhiệm klup kapul alat ragam chăm xã Phước Hậu lac:

Sap Chăm  

Ong Hán Ánh – akaok palei Hiếu Lễ, xã Phước Hậu, huyện Ninh Phước, tỉnh Ninh Thuận lac:

Sap Chăm

Dalam chreih chrai uan rok kate di bhap bini, piah ngak brei kate hu bui sambai jang, mban adat cambat bimaong Poklong Girai hu peih pakacah daoh tamia bhap bini chăm mbang ka 3, rah tabiak di 2 labik lac xã Phước Hậu, huyện Ninh Phước saong bimaong Pôklong Girai. Hu jaik 100 nghệ nhân lambaok ka 5 palei chăm hu mbaok tame pakacah 4 asal kadha nan lac: hòa tấu ginang, yuk kèn saranai, tamia kadik meng kan, cuak ariya. Tapa bruk pakacah nan piah daong ka nghệ nhân chăm patagok talei pambuak bruk jum pataom; khik ramik saong patagok dom yaom glaong ilamu meng kan siam mekre di bhap bini chăm; saong piah daong yaih khan rup binguk, pandap ilamu hadah krah Chăm Ninh Thuận tal ayut dalam taneh ia saong lingiu dunya. Yaom lac bruk pakacah rah tabiak dalam tukvak katut panak min dom kapul jeng brei mboh bruk gheih, mekre. Tapa nan, hu ngak jeng harei pataom pakacah ilamu daoh tamia bhap bini Chăm biak gheih, ndung bak ilamu bangsa. 

Saai Lưu Thị Thùy Linh - nghệ nhân tamia daok di palei Phước Đồng, xã Phước Hậu biak bui sambai tuk hu mbaok tame pakacah saong hu tamia meng kan. Saai chreih chrai lac:

Sap Chăm

Sa mbang kate tra hu mai tal, dalam chreih chrai uan rok kate, rilo palei chăm tỉnh Ninh Thuận daok bui sambai chreih chrai saong dom jak jeng gah kinh tế - ilamu – XH./.