Dom harei Chôl Chnăm Thmây ini, khol dahlak mai xã Đại Tâm, bhum palei hu labaih 80% mikva urang bangsa Khmer diukrai di huyện Mỹ Xuyên, tỉnh Sóc Trăng. Nao tal labik halei jeng mboh mikva chreih chrai yaih khan lac, hu Karja dui điện, ngak jalan, padang sang bac, daong phun jien ngak mbang, daong taneh daok, sang daok…, bo rai diuk di bhap bini hu ginup meda jang, puk palei dak harei dak salih birau.

Ba khol dahlak nao tui jalan betong samu tapak birau ngak blaoh di puac thun dahlau, pambuak meng palei Đại Thành, xã Đại Tâm tal xã Phú Mỹ, huyện Mỹ Tú; ong Trần Văn Cường bangsa Khmer brei thau, meng tuk jalan ini hu ngak blaoh, mikva nao mai jeng yau pajeng ba pandap panda hu mbuan lagaih jang; anek kamuan nao bac hu mbuan lagaih jang, raidiuk mikva hu patagok. Meng hu jalan bêtông birau nan bo bruk pajeng ba kaya nong di sang ong jeng hu mbuan lagaih jang.

       “ Hu karja buh jien tame ngak jalan, bhap bini nao mai mbuan jang biak ralo. Bruk ngak mbang di sang jeng hu jang dahlau. Dahlau diah kaya nong dahlak pajeng ka mikva jeng du nan min abih 1 harei meng blaoh, urak ini hu jalan ini ye ngak abih 2- 3 tuk ye salah”.

Tỉnh Sóc Trăng hu 85 dalam 109 xã, phường, ban sit hu bol bhap Khmer, dalam nan  hu 39 xã biak kan kandah. Dom thun tapa, tỉnh hu ngak siam sarak di Đảng, Karja, buh tame yaok rituh tỷ đồng ka bruk patruh iek patrun kathaot; padang cơ sở hạ tầng, paglaong raidiuk di mikva urang bangsa, bhum palei pala atah bayah. Meng nan, raidiuk di bhap bini oh padeih cak rok patagok; uranaih tal thun nao bac tame bac dak thun dak ralo, anek bhik sang kan kathaot  hu daong jien bac; urang ruak hu samar ba tame iek ruak. Tal urak tal ini, labih 90% mikva Khmer hu điện pandar, jaik 80% dom baoh sang urang Khmer hu pandar ia hacih. Sa-ai La Thị Hiền daok di xã Đại Tâm brei thau, jaik abih dom baoh sang urang Khmer hu tivi piah iek, hu radaih patuh piah nao mai…

“Sang dahlak kan kathaot nan ye hu Karja daong jien bac ka anek bik, brei limo raong, sang daok, tame điện oh abih jien. Hu Karja daong dahlak sahanang hatai ngak mbang, urak ini dahlak kham merat raong glang limo ini”.

Yaok thun tal harei Chol Chnam Thmay, dom gah pakat negar saong bhum palei hu mai rivang sirah, tadhau yuh thun birau, alin hadiah pandap ka dom baha, dom ong bhik, dom sang sarak karja, phật tử Khmer, daong ngak ka bruk uan raok thun bahrau hu chreih chrai bui sambai jang.

Bruk sangka iek glang ini nyu daong ka mikva mboh jia tame, ngak siam dom sarak di Đảng, hukum di Karja, kham merat buh pren yava tabiak dak padang puk palei dak harei dak siam mekre jang. Hòa thượng Dương Nhơn, Akok Kapul Jum ptaom sư sãi anit ranam taneh ia tỉnh Sóc Trăng brei thau:

“ Dom rija  roya  meng kan di mikva Khmer yau ye Đôn-ta, atau Chol Chnam Thmay tuk halei jeng hu Karja daong saong ba mbuan lagaih ka dom sư sãi saong mikva phật tử peih ngak. Dom harei roya nan, dom pakat, dom gah jeng hu mai rivang, tadhau ayuh Tết, sư sãi saong mikva urang phật tử Khmer biak sambai”.

Bruk sangka iek glang raidiuk bhap bini bangsa Khmer di Karja, daong ngak ka bruk uan raok thun bharau Chol Chnam Thmay dak bui sambai jang, chreih chrai jang./.