Dom mbang khuah rah tabiak bahrau ni di ban raya HCM ngak khat lihik rilo drap ar song suan yava menuac urang. Hu mbang khuah ngak ka rilo urang metai biak pandik pandua, yau mbang khuah sang 416 jalan Nguyễn Trãi, phường 8, quận 5 harei 16/9 meng bloh ngak ka 7 urang metai. Tapa nan brei mboh, bruk paglaong hatai pacang caga khuah patuh ka bhap bini brei hu iek prong iek glong. Pahadar harei “Tong abih bhap bini pacang khuah song padami khuah” 4/10, Đoàn Sỹ urang vak di rayo sap ndom VN dok di ban raya HCM hu kadha vak brei thau ka hatai pacang caga khuah patuh dalam bhap bini urang Chăm ban raya HCM.

Saai Hanipheh sang dok di labik 315/31A jalan Lê Văn Sĩ, phường 13, quận 3 ban raya Hồ Chí Minh brei thau, kayua sang dok dalam hẽm sit nan ye meng di tuk bahrau padang sang, saai biak sangka tal bruk pacang khuah, abih di nyu nan lac labik tanek lisei ngak mbang huak. Piah thau jang ka bruk pacang caga khuah patuh di sang, saai hu mbaok tame mbang pathau khan, tacei pato ilamu pacang khuah, padam khuah, bruk pandar gas dalam sang, bruk am glau kanyan song dom jalan pandar điện khik hu siam mekre dalam sang… Saai Hanipheh brei thau

(Băng tiếng Chăm)

Jeng yau saai Hanipheh dok di quận 3, ong Mohamad Thanh sang dok di labik 33 jalan Bình Tiên, phường 7, quận 6 ban raya Hồ Chí Minh jeng biak caik hatai sangka tal bruk pacang caga khuah patuh dalam sang. Langiu bruk tut angan tame harak sinya khik caga siam mekre dalam bruk pacang caga khuah patuh dalam sang, ong dok hu blei ka boh sang drei sa bình padam pui song duah thau ka tính năng di yaok janih bình padam pui. Ong brei thau: siam di abih nan lac tuk pui khuah ye brei padam chip, jhui caik ka nyu pambak tapa labik karei bloh jeng khuah praong. Ong Mohamad Thanh lac:

(Băng tiếng Chăm)

Langiu di bruk brei ka dom labik pablei salih, dom boh sang di bhap bini ngak harak sinya ngak catang bruk pacang caga pui khuah, gam song karja palei. Mban quản trị dom sang megrik, labik sambahyang yaok harei di urang Cam Islam, lhu peih bruk pathau khan, jak ba bhap bini Chăm paglaong hatai sangka tuk pandar pui, pandar dom pandap điện song dom janih mbuan khuah patuh, meng nan dong paglaong hatai sahaneng di bhap bini dalam bruk pacang cakak song jhul lihik bruk khuah patuh. Min meyah hu khuah patuh ye brei bình tĩnh saong duah jalan langyah. Ndom ka bruk ni, ong Mohamad Thanh daok brei thau lac:

 (Băng tiếng Chăm)

“ Ia atah oh dong hu apui jiak” Kayua yau nan ye, bruk pacang khuah song padam khuah pak di labik, drah samar, siam mekre hu makna biak prong ngan saong bhap bini ban raya HCM jeng yau mikva urang Chăm. Piah patrun patakik bruk khuah patuh, langiu di bruk khik ramik song pathau khan di dom gah chức năng, yaok menuac urang najuk paglong hatai sangka, hu tinh thần trách nhiệm, sami samar dalam bruk pacang caga khuah patuh, gam khik drap ar  di drei, gam patrun bala ka menuac sia, puk palei./.