Bruk parabha bilan pala angaok sa mblang taneh pala phun mbang baoh nan jeng lac jalan ngak siam

Rilo thun ini mai, bhap bani daok di xã Sông Bình, huyện Bắc Bình pandar aia di ribaong Châu Tá 812 piah jhul pakhang bruk pala phun mbang baoh. Urak ini, dalam xã hu labaih 800 ha phun mbang baoh dom janih yau pa-aok, pa-nat, kruac bhung… Dut haong dom thun dahlau, thun 2021 lac sa thun rilo kan kandah ngan haong urang nong pala phun mbang baoh di labik ini. Kayua  jit Covid -19 nan ye baoh kayau hadei di paik baoh blaoh oh pablei tabiak negar langiu hu, meyah hu jeng lac biak takik. Dalam tuk nan, darak pasar dalam negar yaom kaom trun biar, hu oh takik sang bein njauk ba baoh kayau nao tuh klaak. Meng dom bruk mboh di anak meta yau nan, urang nong brei kuhri kuhria veik bilan pala drak.

Ong Nguyễn Văn Thơm, xã Sông Bình, huyện Bắc Bình, tỉnh Bình Thuận hu labaih 1,5 ha taneh. Angaok mblang taneh ini, ong Thơm pala 450 phun kruac bhung hu jaik 6 thun ini mai. Ong Thơm brei thau, tukvak ini dom thun dahlau, dalam bein hu tal 80% baoh pablei ka darak pasar Tết Nguyên đán. Yau nan min, thun ini, huac takik pablei hu kayua jit Covid -19 nan ye ong ngak ka baoh tabiak tui bilan piah hu baoh pablei dahlau di nan, urak ini baoh kruac bhung  pablei ka darak pasar tết daok 30 -40% min.

Ong Thơm brei thau: “Tapa pala ngak, mboh kruac bhung tabiak baoh dalam sa tukvak haong gauk, yaom kaom oh tani tanat. Dahlak brei ngak ka ka baoh nyu parai tabiak tui bilan angaok mblang taneh pala kruac bhung di sang drei. Tui nan, dahlak pandar dom ilamu kỹ thuật saong jru cavao, khak drak piah ka phun kruac bhung tabiak bingu karei bilan. Blaoh di nan mboh hu kein laba”.

Jeng tui ong Thơm, urak ini yaom kruac bhung pablei tabiak darak pasar daok biar kayua kan pablei. Nan ye, bilan kruac bhung pablei ka darak pasar Tết Nguyên đán thun ini, dom sang bein oh tuh phun jien pataom paik sa tukvak haong gauk, bo ngak ka nyu tabiak baoh dahlau hadei di gauk piah paik baoh pablei.

Jeng dreih yau nan, rilo sang urang nong pala pa-aok di palei Suối Sâu, xã Suối Kiết, huyện Tánh Linh, tỉnh Bình Thuận jeng oh khang hatai caik baoh piah paik pablei tết yau dom thun dahlau. Langiu di nan, langik tasik thun ini oh laghaih, dalam tuk pa-aok tabiak bingu gaok hajan saong aia kakuan sara nan ye ndam baoh oh rilo.

Sa-ai Trần Thị Bích Trâm – Akaok UBND xã Suối Kiết brei thau, dalam xã hu labaih 400 ha phun mbang baoh dom janih yau pa-aok, quýt, mận… Meng khang hatai pandar ilamu - kỹ thuật tame bruk pala drak, salih janih phun pala ka nyu laghaih, gam haong bruk hu aia piah pruh nan ye rai diuk di bhap bani labik ini hu salih bahrau mboh di anak meta. Min thun ini bilan pa-aok tết baoh oh hu rilo. “Anak meta mboh lac, dalam dom thun tapa, puk palei tuk halei jeng jak ba, pathau khan urang nong ngak brei baoh kayau tui jalan parai tabiak mbang paik baoh. Ini lac sa dalam dom jalan ngak piah plaih bruk “pala njauk lahik yaom, hu yaom, pala oh hu”. Meng nan, rai diuk di bhap bani dak harei dak ginup meda jang”, sa-ai Trâm daok brei thau lac yau nan.

Bruk ngak brei phun mbang baoh tabiak baoh karei bilan hu daong ka urang nong mbuan pablei saong pablei hu yaom, patagok kein laba, taphia di nan daok pabak hu kaya nong hu gam gam ka darak pasar. Urang nong ngak tui jalan brei ka baoh parai tabiak tui bilan meda lac jalan ngak kein laba dalam tukvak pasiam veik bruk kinh tế urak ini./.

Urang lang: Jasi – 02/01