Umo labaih 60 thun, daok lac thương binh 2/4, pren yava oh khang kadang min ong Đoàn Văn Khanh – po doanh nghiệp tư nhân Long Thuận hu gah ngak mbang pablei salih taong yaom lac sa doanh nhân naih gheih, sami samar,  ba jien tỷ  mai ka baoh sang. Ini lac doanh nghiệp ngak mbang biak gheih, pandar dom pandap meng phun kruoc bung yau: bingu kruoc bung, baoh kruoc bung piah ngak tabiak dom janih ia menyum, dom mỹ phẩm.. hu yaom glaong.

Di thun 2005, tuk bruk pala phun kruoc bung di bhum taneran kraong Cửu Long tamuh tabiak khang min bruk pablei tabiak oh mbuan lagaih. Mboh hu bruk ini, ong Đoàn Văn Khanh saneng lac brei duah jalan ngak halei piah pandar dom pandap meng phun kruoc bung ngak tabiak janih hu yaom gam lac patagok kinh tế baoh sang gam pablei tabiak pandap ka dom bein dalam palei. Meng nan ong ruah duah, buh jien tabiak blei dom trang, thiết bị piah ngak sang mac, padang doanh nghiệp Long Thuận piah ngak tabiak dom pandap meng phun kruoc bung; pasiam mẫu mã, patagok bruk yaih khan pandap, peih praong darak pasar pablei tabiak. Tal urak ini, doanh nghiệp Long Thuận hu buh jien padang sang mac ngak tabiak 27 janih pandap meng phun kruoc bung ngan saong phun jien jaik 3 tỷ đồng.

Dom pandap di doanh nghiệp jeng hu dom jabat meng pakat tỉnh tal TƯ brei harak chứng nhận mek hu tanut ba tabiak, doanh nghiệp Long Thuận hu padang angan pablei salih độc quyền pakat negar. Pandap di doanh nghiệp ini hu brei angan lac: Pandap VN chất lượng glaong”, hu ba tame “Top 500 angan pablei salih dang akaok VN”. Dalam nan dom pandap barau biak hu urang takre yau: jabol menei ia hala kruoc bung, tea bingu kruoc bung, menyek bingu kruoc bung khử mùi, ia ép kruoc bung… Urak ini doanh nghiệp di ong Tư KHÁnh hu pambuak bruk saong dom labik dalam negar peih hu 44 đại lý pablei  pandap. Rilo pandap di doanh nghiệp daok hu pablei tabiak negar langiu tui jalan tiểu ngạch. Dalam thun bloh, doanh nghiệp Long Thuận mek hu labaih 5 tỷ đồng, laba jaik 3 tỷ đồng. Ndom tal bruk kham merat dalam ngak mbang pablei salih, ong Đoàn Văn Khanh khan lac:

 “Tuk tame Đảng drei hu panuac sanya lac kham merat tal abih rai, urak ini drei kham merat abih drei. Meng bruk kham merat nan, drei ruah duah ngak tabiak dom pandap, abih di nyu nan lac dom pandap duh ka rai diuk bhap bini,blei dom kaya nông di urang nông”.

Lac po sa doanh nghiệp ngak mbang hu kein laba, ong Đoàn Văn Khanh oh var hu dom urang kan kathaot, abih di nyu nan lac dom urang dahlau daih ngak bol lin, urang đảng gaok kan kandah. Ong bhian rik daong saong jak ba dom urang ngak pahala daong ngak sang anit ranam, sang tình nghĩa ka baoh sang sarak karja, baoh sang kan kathaot, padang ngak kabo ka liệt sĩ, alin hadiah pandap ka baoh sang kan kathaot tuk lễ, tết. Tok kuhria dalam thun bloh, po doanh nghiệp ini hu ngak bruk xã hội jaik 500 triệu đồng. Ong Nguyễn Văn Đời, phaok akaok kapul urang dahlau daihngak bol lin xã Song Thuận, huyện Châu Thành, tỉnh Tiền Giang brei thau: 

 “Sa-ai Tư Khanh dalam tukvak ngak kinh tế, ngak doanh nghiệp mboh kaya meda lo. Hadei di tuk ngak kinh tế  hu daong padang ngak sang “nghĩa tình đồng đội, “geng đồng đội”, daong ka anek kamuan urang hội hu bruk ngak, daong ka bhap bini kan kathaot dalam xã hu pandap tết. Meng bloh dahlak jak ba ngak sang nghĩa tình đồng đội, saai Tư jeng brei 80 m khối kaik, saai  anit ranam adei saai lo”.

Urak ini, yaom lac umo taha, bruk ngak mbang pablei salih oh padeih salih barau, paglaong chất lượng pandap, patagok pren merak gauk di drak pasar, min ong Đoàn Văn Khanh oh huac saong oh dang veik di bruk ngak hu nan. Urang đảng, urang dahlau daih ngak bol lin ini daok tacei pato doanh nghiệp, kham merat ba pandap pablei tabiak ralo negar langiu angaok dunya:

 “Anak tal, kol dahlak peih bruk ngak mbao bì ka nyu siam, paglaong chất lượng. Jalan pablei tabiak negar langiu di doanh nghiệp Long Thuận lac harei ini harei page  min. Dahlak kham merat ba doanh nghiệp ini nao tagok, hu angan je jang piah hu jien mek tame ka baoh sang saong rik daong ka XH”.

Bruk yam tagok ngak kaya meda saong kham merat dalam bruk XH di ong Đoàn Văn Khanh – sa urang đảng ưu tú, sa doanh nghiệp hadah krah di tỉnh Tiền Giang brei mboh hu hatung hatian siam mekre di urang đảng, tuk halei jeng ba akaok nao dahlau dalam yaok bruk ngak, hu bhap bini iek praong, biak njauk pok meyaom saong pambak praong./.