Dom harei tapa, kỹ sư Lê Anh Xuân brei harui mek hadang di dom danao hu raong tui ilamu cong nghe Biofloc di  xã Vĩnh Trạch Đông, ban sit Bạc Liêu, tỉnh Bạc Liêu. Ini lac, bruk cak rok patagok tui jalan brei sumu gauk tỷ lệ cacbon saong nitơ piah ka hadang praong cak rok. Ky su Lê Anh Xuân brei thau: Bruk raong hadang tui jalan ini hu 2 tukvak nan lac: Camereip palao hadang tame raong dalam halam nyul, ngan saong 1.000 drei raong dalam sa mét vuong danao, raong meng 20 tal 25 harei, hadei di nan, palao hadang tame danao raong langiu ngan saong 100 tal 120 drei dalam tha mét vuông danao. Hadei di labaih 2 bilan raong, hadang praong jaik 3 tấn angaok 100 met vuông. “ Tuk khol drei ngak njauk tui jalan ini, ye rilo hadang biak catang, kanduh hadang  hijao juk, hatai hadang jeng juk oh katam kanjik, yau nan ka meng pablei hu ka darak pasar Chau Au, Chau My, abih di nyu nan lac Nhật Bản khin hadang drei tamo that yaom galong jang darak karei meng 10 tal 15 ribau đồng, tui tukvak. Langiu di nan, khol drei takik njauk khat lahik, mek hu rilo hadang saong padang hu  angan  drei hadang, oh pandar jru khang sinh halei..”

Palei daok di  tỉnh Thanh Hóa, labaih 10 thun dahlau, hadei di tuk bac tamat đại học gah raong kaya ikan dalm ia pak Nha Trang, kỹ sư Lê Anh Xuân  likau tame ngak bruk ka công ty công nghệ sinh học di bhum taneran kraong Cửu Long. Hadei di 3 thun kak kajap saong dom palei tapen tasik, sa-ai Xuân palih ruah bhum tasik Bạc Liêu ngak palei ka 2 di drei. Sa-ai likau padeih bruk di cong ty bloh mai palei Công Điền, xã Vĩnh Trạch, ban sit Bạc Liêu  apah taneh paraong jaik 8 hecta piah raong hadang công nghiệp, saong padang Công ty Trúc Anh, gam ngak yam ndoc, gam ngak nhân viên, tuk dalam kadung tok hu 20 ribau đồng. Meng Ilamu bac megru di sang bac saong dalam tukvak ngak bruk saong mikva raong hadang di Bạc Liêu, mbang raong hadang camereip 180 ribau drei hadang pajaih, hadei di jaik 4 bilan palo raong sa-ai mek hu labih 4,6 tấn hadang, praong 25 drei sa kilo. Meng pablei hu yaom glaong, bilan hadang ini sa-ai Xuan laba hu jaik 400 triệu đồng, ginup bayar jien apah taneh tui harak pambuak bruk 5 thun saong dom jien nyim mesre di urang karei dahlau di nan piah buh tame raong hadang. 5 thun hadei di nan, bilan raong hadang halei sa-ai Xuan jeng laba hu dom rituh trieu đồng, tapa nan bruk ngak mbag di Cong ty jeng hu cak rok patagok. Ilamu raong hadang hu jak jeng di sa-ai Xuân nan lac raong hadang tui jalan khép kín. Oh brei ia dalam danao nerak tachrauk suai lavik, sa-ai raong hadang meng dom pandap ngak meng vi sinh yau: TA- Pondpro, TA-Gold... kayua sa-ai ngak tabiak. Ong Huỳnh Minh Hoàng, Giám đốc Sở Ilamu saong  Công nghệ tỉnh Bạc Liêu brei thau: “ Công ty Trúc Anh lac sa doanh nghiep ilamu công nghệ di tỉnh Bạc Liêu, rilo thun tapa, hu rik daong ka gah khoa học biak ralo meng dom roh duah ka bruk di anak meta tal dom yaom glaong gah khoa học, ba tame pandar dalam bruk raong kaya ikan dalam ia, daong pasiam hu ia raong hadang, patagok pren pacang caga ruak di hadan , patrun nerak tachrauk alam moi truong, khik hu bruk cak rok khang kajap di bhum raong hadang tapen tasik Bac Lieu.”

Urak ini, kỹ sư Lê Anh Xuân raong hadang sú saong hadang thẻ atah di tasik Bạc Liêu 5 km saong thun halei jeng hu laba labaih meng 3 tal 4 tỷ đồng. Oh lac pabak hadang pajaih siam saong tacei jalan raong hadang hacih ka mikva urang nong dalam tinh, tuk mehit baoh sang halei raong hadang njauk ruak, kỹ sư  Lê Anh Xuan jeng nao tal danao raong hadang piah “iek ruak” oh mek jien saong dauh jaln pasiam ruak ka hadang, nan ye bhap bini Bac Lieu bhian iew sa-ai lac “bac si hadang”. Ong Truong Văn Điểm daok di palei Cái Nước, xã Phú Tân, huyện Phú Tân, tỉnh Cà Màu brei thau:“ Dahlak raong tui cong nghiep 2 thun paje biak hu jak jeng, kayau dahlak ngak tui jaln di cong ty Trúc Anh, ngak tui jalan sinh hoc nan, dahlak raong biak hu jak jeng.”

  Padang mbang ngui meng dua plak tangin saoh, thun ini umo 39 thun, Lê Anh Xuân ngak Giám đốc doanh nghiệp hu labaih 80 urang jakar, urang ngak bruk, dalam nan hu labaih 50% kỹ sư hu bac tamat đại học tagok. Urak ini Công ty hu labaih 300 đại lý saong labaih 10 ribau baoh sang raong hadang dalam negar jia takre blei pandap vi sinh di sa-ai. Urang Giam đốc umo daok ranaih ini brei thau:“ Cong ty daok peih praong bruk ngak mbang di sang mac labaih 2 ribau met vuong tui tanut chuan GMP- WHO, ISO 22000:2005 piah khik hu sa-at pandap mbang menyum, khik hu dom tanut chuan saong ieu da-a dom urang ilamu dalam saong langiu negar pambuak saong cong ty ngak tabiak dom janih pandapgam hu hàm lượng khoa hoc gam pandar siam dalam bruk ngak piah takik khat lahik ka mikva urang nong, saong trun yaom phun dut saong hadang negar langiu ba tame. “  

Oh lac daong ka mikva raong hadang hu kein laba, tuvak tapa, “ bac sĩ hadang” Lê Anh Xuân daok hu mbaok tame bruk an sinh xa hoi. Langiu bruk daong pandap vi sinh, brei urang jakar trun tacei pato ilamu ky thuat ka mikva raong hadang, Cong ty di sa-ai daok apmbuak saong dom sang bac, sang iek ruak peih bruk iek ruak, brei jru ka urang kan kathaot, padang kadung jien “ Trúc Anh Vàng”  yaok thun brei paok jien bac ka anek di urang  dalam Kapul urang nong kan kathaot dalam saong langiu tinh. Tui kuhria jien Cong ty rik tame ngak bruk daong xa hoi dalam tukvak tapa labaih 10 tỷ đồng. Cong ty di  Le Anh Xuan saong rup sa-ai taduan hu rilo gỉai thưởng ameh ka chất lượng saong cong nghe, dalam nan hu ahrak brei angan lac “Doanh nghiệp ngak nong pandar Công nghệ glaong” kayua Mentri Ngak nong saong patagok palei pala pok brei; Giải thưởng  “Lương Định Của” brei ka dam dara ngak mbang naih joi thun 2011; Giải thưởng TOP 20 “kaya nong siam  thun 2013” saong  harak Bằng khen “Giải vàng asar siam pakat negar thun 2014” kayuaThủ tướng rajaei alin brei./.