Atah di ni labaih 20 thun, meng hatai takre Đờn ca tài tử Nam Bộ, Kim Thanh eng drei bac megru tapa băng đĩa song tapa dom danak dak angaok rayo. Hu dom nghệ sỹ hu angan dalam bhum yau Nghệ sỹ Ưu tú Hoàng Huệ, Nghệ nhân Dân gian Bảy Vân, Nhạc sư - Nghệ sĩ Ưu tú Ba Tu … abih hatai tacei pato song hu mbaok tame dom mbang Đờn ca tài tử di puk palei, sap doh di saai dak harei dak bingi pang. Thun 1990, saai mek hu Huy chương Bạc di Harei pataom pakacah Đờn ca tài tử Nam Bộ tỉnh Long An. Sa-ai Kim Thanh khan lac

Kim Thanh hu mbaok dalam rilo mbang liên hoan dom pakat song mek hu dom jayah praong. Nan jeng lac meng bruk kham merat pasram megru di rup drei song bruk abih hatai tacei pato di dom cei, dom gru nao dahlau. Dak harei Kim Thanh dak kham merat pasram megru, roh duah dom kadha daoh bahrau patagok bahrau hadei di ni langiu 20 bản tổ, piah ka lagu doh Đờn ca tài tử hadei ni patagok khang jang. 

Labaih 10 thun ni mai, Kim Thanh mai ngak bruk di Pasak ilamu tỉnh Long An song iek gah pato pakai Đờn ca tài tử Nam Bộ. Ngak bruk ni, saai hu nao tal rilo puk palei dalam tỉnh, hu ba hatai takre Đờn ca tài tử di drei pato tacei ka dom rai rah anek saih. Tal harei ni, saai hu pato tacei ka labaih 420 anek saih, dalam nan hu dom sap doh triển vọng yau Võ Thanh Phê, Hồ Nhựt Tài…  Dom anek saih di sa-ai rilo meng lac dom tài tử urak ni hu mbaok dalam dom  mban Đờn ca tài tử Nam Bộ di tỉnh Long An.

Yaok pluh thun kak kajap haong nghệ thuật meng kan, tài tử Kim Thanh parang me-in hu siam rilo tác phẩm, kandaong veik dalam hatung hatian di  khán thính giả takre janih nghệ thuật ni. Thun 2014, saai hu pok brei angan Nghệ nhân Dân gian:

Kim Thanh biak bui sambai tuk hu Hội Nghệ nhân dân gian Việt Nam pok brei angan ni. Tuk mek hu angan ni, drei brei kham merat ngak habar piah daong hu siam jang ka phong trào ni. Anak meta, Kim Thanh hu mbuan lagaih piah dong ka dom huyện dalam tỉnh patagok dom tal pasram ka Đờn ca tài tử. Kim Thanh cong khin lac, meng bruk rik dong di drei meda daong khik ramik song patagok nghệ thuật Đờn ca tài tử ni.)

Meda lac, sap doh di Nghệ nhân Dân gian Kim Thanh  oh lac hu urang takre Đờn ca tài tử  dalam tỉnh Long An bo abih khu vực Nam Bộ tong yaom glong. Ong Võ Trường Kỳ, Akaok Chi hội Văn nghệ dân gian tỉnh Long An lac:

Anai Kim Thanh hu rilo jak jeng. Anai hu biak rilo mbang tame pakacah Đờn ca tài tử song cải lương.. Anai hu nao tal Pari ye hu khán giả di Prang pok meyaom. Sap doh di anai biak lai li-an. Rilo menuac thau tal anai. Dom kadha doh lễ ye anai doh hu song doh biak gheih. Kayua yau nan ye bo hulin tong yaom lac gah tài tử ye Kim Thanh biak gheih, biak joi)  

Likau tadhau yhuh ka saai miat miat  khik hu hatai anit ranam Đờn ca tài tử Nam Bộ, saong pato tacei ka rilo anek saih jang piah dong khik ramik song patagok yaom glong di sa janih ilamu nghệ thuật hu UNESCO pok brei angan lac inem krung ilamu phi vật thể lambaok ka menuac sia dunya./.