Nghị định 27 di Raja-ei tacei tabiak cambaih laih dom kadha di Hukum Lao động ngan haong urang daong bruk sang meda hu ba tabiak ngak tui meng harei 25/5/2014. Ini hu mong yau sa kadha biak siam piah "chuẩn hóa” bruk mbang pah daong bruk sang. Pak bal raya Hồ Chí Minh, bruk daong bruk sang hu mong yau sa dalam dom bruk ngak ralo di urang kamei saong gaok tuk mai manuac ngak jeng oh pabak ginup. Yau nan Nghị định 27 meda ba mai dom kein laba hagait ka urang ngak saong meda oeih ngak hu halei oh tuk ba tame pandar?

Sa-ai Nguyễn Thị Thanh Hồng palei daok pak Đồng Tháp, umo 26 thun, urak ini lac urang daong bruk ka sa baoh sang daok pak quận Bình Thạnh ngan haong yaom jien bilan 3 triệu đồng. kayua  sang hu urang taha saong uranaih ala 1 thun nan ye bruk ngak di sa-ai Hồng biak glaih glar, ngak bruk meng page mesup tal livik melam, tuk po sang nao ndih ye bruk ngak di sa-ai meng blaoh. Yaom lac po sang ndom puac haong sa-ai biak siam, min sa-ai Hồng jeng mboh bruk ngak di drei oh hu karo, oh grap tanat. Yau nan ye, tuk mahit lac hu quy định bahrau ka bruk khik caga quyền lợi di urang daong bruk sang jaik hu ba tame pandar, sa-ai Hồng biak uan tabuan. Sa-ai Nguyễn Thị Thanh Hồng lac: Bruk ngak di dahlak jeng biak ralo. Dahlak jeng mahit lac hu quy định khik caga urang daong bruk sang, hu ralo quyền lợi. Dahlak jeng mboh uan tabuan, kayua gaok tuk mai mong tivi mboh hu ralo urang daong bruk sang min po sang oha bayar jien atau brei padeih bruk oh khan brei thau dahlau. Hu quy định ye dahlak mboh bruk ngak ini hu yaom saong hu iek prong. Tuk ngak bruk siam ye po sang jeng njauk hu trách nhiệm haong urang ngak.

Tui pasang iek, duah thau di Pasak kuhria mboh dahlau hatai caong khin manuac ngak saong thong tin darak pasar urang ngak bal raya Hồ Chí Minh– Falmi ye hatai caong khin urang daong bruk sang di bal raya meng jaik 9 ribau tal 10 ribau urang dalam thun. Gaok tuk mai, hu ralo sang gaok oh takik kan kandah tuk duah urang daong bruk sang. Bal raya urak ini hu labaih 10 pasak meyaih khan bruk ngak hu chức năng pato pakai, pabak urang daong bruk sang, tacei pato học viên ilamu dalam bruk ngak yau: rami ramik tukvak ngak bruk, pandar dom pandap panda dalam sang hiện đại, dom kadha njauk ngak saong juai ngak di urang daong bruk sang, đạo đức nghề nghiệp saong langyah talei quan hệ tế nhị ngan haong po sang. Jaik abih dom học viên tamat blaoh dom khóa pato pakai ini thei jeng thau cambaih laih bruk ngak di drei, hu po sang jia saong njauk hatai ka bruk ngak, abih di nyu nan lac po sang urang negar langiu. Yau nan min, labaih 80% manuac urang daong bruk sang jeng tok ngak bruk tui hợp đồng meng camboi saong oh hu bảo hiểm, gaok rủi ro glaong meyah po sang oh siam hatai. Kayua nan ye, bruk hu quy định cambaih laih piah hu jalan khik ramik bruk daong bruk sang nan lac bruk njauk ngak. Ong Trần Anh Tuấn,  Phaoak akaok pasak kuhria mboh dahlau hatai caong khin urang ngak saong  thông tin darak urang ngak bal raya Hồ Chí Minh lac: Khaok drei hu dom labik pato pakai chuyên sâu piah daong ka urang daong ngak bruk sang hu ilamu siam jang. Sa bruk ngak laik haong xu thế patagok ye njauk hu cơ chế khik iek. Tuk hu chế tài quản lý, khik kajap quyền lợi ka urang ngak saong urang pandar urang ngak ye bruk khik ramik  meda hu siam jang dut haong dahlau diah.

Nghị định 27 tacei tabiak cambaih laih ka hợp đồng lao động, tuk vak ngak bruk, tukvak padeih padei, sarak pato pakai saong bảo hiểm xã hội. Urang daong bruk sang meda “danh chính ngôn thuận” saong hu dom quyền lợi chính đáng yau dom urang ngak di dom gah karei. Ngan haong dom quyền lợi bo urang ngak hu mbang tui njauk adat hukum, Nghị định 27 hu mong yau panuac ndom khang ka “Luật hóa” bruk daong bruk sang, ba mai ralo kein laba gah kinh tế, xã hội ka dom baoh sang pah urang daong bruk sang  jang yau ka urang daong bruk sang. Min anak meta, ngan haong sa bruk ngak bo lavik ini mai jeng daok peih ngak tui jalan “thuận mua, vừa bán”, thỏa thuận tui hatai jia nao mai haong gauk di 2 gah: pô sang saong urang daong bruk sang, ye dom quy định dalam Nghị định hu phần cứng nhắc. Kadha nan ngak kan kandah tuk ba tame pandar, mbuan ngak ka po sang saong urang daong bruk jeng huac kanda. Amuk Lê Thị Tấn Lộc, Akaok Kalup kapul Dịch vụ gia đình, kapul urang kamei quận 10 lac: Dom điều khoản di Nghị định 27 hu kein laba ka urang ngak, yau nan min jeng daok ralo labik oh ka lagaih. Urak ini, daong bruk sang tok lac thỏa thuận di po sang haong urang ngak. Adat hukum ini meyah hu điều kiện ràng buộc ralo ye po sang meda salih tapa pah bán thời gian ye trách nhiệm nyu njuan jang.

Cambaih laih, Nghị định 27 peih tabiak jalan patagok bruk daong bruk sang njauk haong darak pasar urang ngak urak ini. Bruk daok veik nan lac tuk peih ngak njauk hu ngak tui jalan linh hoạt, ngak habar piah ka urang  pô saong urang ngak halar hatian peih ngak tui jalan anit ranam gauk, iek praong gauk  piah quyền lợi dua gah hu khik caga./.      

Bích Huyền-VOVHCM