Metui amaik ame, daok haong ong gah ame meng sit min Nguyễn Thị Bích Phượng daok di huyện bhum ceik Trà Bồng, tỉnh Quảng Ngãi thau kham merat yam tapa kan kandah, jeng thủ khoa khối C dalam mbang pakacah đại học meng bloh. Nguyệt Ánh, urang pambuak bruk daok di bhum kreih negar hu kadha vak brei thau ka bruk kham merat di urang kamei thủ khoa hu rai diuk biak kan kandah ini: 

Điểm di 3 bài thi di thủ khoa Nguyễn thị Bích Phượng tame gah Sư phạm Ngữ văn – Đại học Phạm Văn Đồng nan lac: môn lịch sử saong địa lý hu 9 điểm meteh yau gauk, môn ngữ văn hu 8 điểm. Abih tih điểm pakacah di adei hu 27 điểm, cộng điểm ưu tiên khu vực bhum ceik jeng 28 điểm meteh. Nguyễn Thị Bích Phượng jeng thủ khoa khối C glaong di abih dalam taneh ia urak ini.

 Baoh sang sit di dua ong taco thủ khoa daok dalam hẻm sit di khu dân cư 4, ban sit Trà Xuân, huyện bhum ceik Trà Bồng, tỉnh Quảng Ngãi. Baoh sang taik tahak oh ka tal 50m2 oh hu hagait hu yaom. Mehit lac Phượng jeng thủ khoa, mikva ba gauk mai klah rabha bui sambai. Amuk Lâm Thị Hạnh, daok jaik sang Phượng hu panuac pok meyaom lac:

“Kamuan rambah lô, muk gah ame ruak bloh metai,, bloh amaik ruak metai, patui di nan tal ame ruak metai, 3 mbang yau nan bo kamuan bac hu yau nan biak uan tabuan, mikva thei jeng uan. Mboh anit lô, di labik ini oh ka hu thei bac yau nyu, oh ka hu thei lac thủ khoa, Trà Bồng meng lavik mai oh ka hu thei”.

Amaik metai kayua ruak ung thư tuk Phượng tagok tal 9. Dua thun hadei, ame jeng metai kayua ruak baoh hatai. Phượng praong tagok dalam gavang tangin anit ranam di ong nội. Piah hu jien raong 2 taco mbang bac, ong Nguyễn Tào (ong nội Phượng) thun ini umo 76 thun mbang cai biak kli kalih. Drap ar di ong tok hu 2 sào padai saong 2 sào keo nan ye huak lisei bhian mbang me-sin, mbang njam. Thủ khoa Nguyễn Thị Bích Phượng khan lac, tuk thau lac drei jeng thủ khoa khối C glaong abih dalam taneh ia, adei haok ia meta”

“Thun bac tal 12 adei oh nao bac thêm, adei bac hagait jeng brei hu cơ sở. Adei bac dom kiến thức cơ bản dalam tapuk bloh ruah duah gilac dom bruk thời sự gam saong ong nội tra”.

Gru Huỳnh Đình Long, gru pato di sang bac THPT Trà Bồng, tỉnh Quảng Ngãi uan tabuan kayua “anek saih ranam” di drei jeng thủ khoa: 

“Adei ini rai diuk kan kandah di abih dalam sang bac min biak kham merat bac da-a, lac anek saih joi pakat sang bac 3 thun, anek saih joi văn pakat tỉnh. Oh mbuan duah hu anek saih  bac hu yau nan”

Kamuan đậu đại học, ông nội di Phượng uan tabuan lô. Min hadei di tuk bui sambai nan, ong mboh duh hatai lô kayua oh thau duah halei jien brei taco dalam 4 thun bac đại học anak tal. Kayua saai likei di Phượng jeng daok bac thun 3 sang bac Đại học Kinh tế- Đại học Huế:

“Uan tabuan min jeng duh hatai oh thau harei hadei nyu yau habar. Kayua urak ini saai likei di Phượng daok nao bac langiu daih, gam nao bac gam nao ngak bruk duah jien mbang bac. Biak di nyu ong nội kuhria oh truh”. 

           Metui amaik ame; dom pandik harao nan hu tuk ngak ka thủ khoa Nguyễn Thị Bích Phương yau oh yam tagok truh. Min hu bruk pachreih ba di saai likei, di ong nội, di gauk gar, ayut sahabat saong gru pato, nyu daong ka Nguyễn Thị Bích Phượng yam tapa saong dak harei dak hu hatai kham merat bac biak naih joi./.