Sang bac THPT Phạm Văn Đồng lac labik ka dua hu UBND huyện Ninh Phước mek ngak labik brei daok karei pataom sa labik di huyện. Ini lac labik brei daok karei akaok meti di huyện hu jao ka UB bhap bani pakat xã mong iek saong peih bruk taduan raok bhap bani meng dom tỉnh, ban mai veik palei, meda taduan raok hu 220 urang min labik brei daok karei ini hu taduan raok 279 urang hu hộ khẩu daok di huyện Ninh Phước mai daok karei. Trượng Nữ Hồng Diễm Phúc meng bal raya Hồ Chí Minh mai veik palei, urak ini daok karei pak ini khan lac: “Adei mboh Ninh Thuận taduan raok khaol dahlak biak tani tanat, kuhria ka dom adei hu labik daok biak siam. Caong khin daok karei 7 harei blaoh dom adei hu nao veik sang di drei. Adei ndua dhal phol tỉnh drei hu daong ka dom adei labik mbang, labik ndih daok biak siam”.     

Taong abih dom urang mai veik palei hu ramik brei labik mbang, ndih, dom janih pandap panda piah pandar yaok harei dalam labik brei daok karei  pataom sa labik. Pasak Y tế huyện Ninh Phước hu brei kapul urang y, bác sỹ hu mbaok luac harei melam di labik brei daok karei piah pasang iek pren yava, dut iek pandiak rup pabhap saong duah thau ka bruk brei thau y tế, cih vak  tame siphau piah tui iek. Dom urang tapa pasang iek, oh mboh hu pandiak, patuk, kan luai suan ye jao veik ka Mban điều hành taduan raok. Daok dom urang mboh yau ruak ye pandar radaih y tế ba tame Pasak Y tế huyện Ninh Phước brei daok karei, pasang iek ruak saong taong ruak samar drah.

Urak ini, kayua manuac urang mai biak rilo di labik brei daok karei, Mban điều hành labik brei daok karei gaok kan kandah dalam bruk caga labik ndih saong dom janih pandap panda pandar yaok harei nan ye bhap bani hu daong brei gam meneng ndih, pandap panda kaya mbang payua tame dalam labik brei daok karei; dom urang halar hatian jeng abih hatai daong ka bhap bani tal abih tukvak brei daok karei tui njauk adat hukum.

Bruk sangka mong iek ka taong abih bhap bani Ninh Thuận meng dom tỉnh, bal mai veik puk palei meda daok gaok rilo kan kandah min dom puk palei saong dom urang jakar jeng ba abih pren yava di drei piah khik siam pren yava ka bhap bani. Bác sỹ Chuyên khoa II Quảng Đại Hương, Akaok Pasak y tế huyện Ninh Phước, tỉnh Ninh Thuận brei thau: “Dom urang halei bo test samar mboh dương tính, ye neh tabiak brei daok karei sa duk, khan brei ka Pasak y tế thau piah pandar radaih mai pajeng dom urang dương tính mai veik Pasak y tế Ninh Phước piah tui iek saong dut iek PCR piah thau cambaih lac ruak halei oh. Meyah mboh lac ruak, Mentri y tế pakat brei mã ye khaol drei ba urang ruak tame taong ruak di Pasak y tế Ninh Phước.”

Labik brei daok karei pataom sa labik di Sang bac THCS Huỳnh Phước, xã Phước Hữu, huyện Ninh Phước hu 161 bhap bani meng dom tỉnh gah Meraong mai palei daok karei. Ong Đổng Duy Công, iek gah y tế Labik brei daok karei di Sang bac THCS Huỳnh Phước, huyện Ninh Phước, Ninh Thuận brei thau, tapa dut iek mbang ka 1, labik brei daok karei ini hu dom urang medhil lac njauk Covid -19. Taong abih dom F1 saong dom urang taom gaok haong F0 jeng hu mek mẫu dut iek mbang ka 2 saong peih bruk pasang iek jit dịch tễ yaok harei dalam labik brei daok karei: “Yaok harei dom menuac y tế pak ini nao tal yaok duk piah pasang iek ka yaok urang daok brei daok karei, pasang iek pren yava ka yaok urang ruak. Pambuak bruk haong MBan điều hành labik brei daok karei oh brei ka urang ruak nao mai meng duk ini tapa duk diah. Urang ruak daok dalam duk jeng njauk khik brei daok atah di gauk, tuk halei jeng cuk siuk pabang mbaok saong bhian rao tangin. Kayua yau nan ye bruk njaom mbak nao mai dalam dom labik brei daok karei jeng daok pasang iek hu siam.”

Bruk pasang iek catang dịch tễ daok hu dom labik brei daok karei di dom xã dalam huyện Ninh Phước peih ngak siam, piah plaih bruk njaom mbak nao mai dalam labik brei daok karei. Meng nan, rik daong pasang iek hu saong jhul kadun likuk jit ruak./.

Urang lang: Jasi – 16/08/2021