Ninh Thuận ba aia brei ka bhap bani labik njauk pandiak bhang

Urak ini, xã Phước Trung lac palei bhum ceik gaok kan kandah trak abih kayua tua riya pandiak bhang ba mai dalam huyện Bác Ái - tỉnh Ninh Thuận. Tal tukvak ini, dom binek kavei, dom kraong craoh dalam xã thu abih aia. Piah daong ka bhap bini dalam palei hu aia hacih piah pandar, dom urang dang akaok huyện Bác Ái –tỉnh Ninh Thuận hu ieu pataom radaih pajeng aia mai brei ka mikva tui jalan ngak lac, oh caik ka baoh sang halei kurang aia pandar dalam tukvak pandiak bhang. Kadha vak di urang pambuak bruk Văn Cảnh-A Sơn:

Di xã Phước Trung, huyện Bác Ái, tal tukvak ini aia pandar saong ia pala drak di bhap bini thu jaik abih. Kavei Phước Trung urak ini aia daok biak takik, daok kavei Phước Nhơn ye thu abih aia. Vụ Đông Xuân meng blaoh, dalam xã trun pajaih labaih 53 ha phun pala dom janih, kayua kurang aia  nan ye ralo mblang taneh phun metai jaik abih saong dom mblang taneh daok veik tui kuhria năng suất biak biar.

Kayua aia angaok dom craoh thu abih, dalam xã Phước Trung oh ka hu công trình ba aia pandar halei nan ye aia hacih nan daok lac kadha praong dang akaok di bhap bani xã Phước Trung anak bruk tua riya pandiak bhang yau urak ini. Nan ye yaok harei, mikva pak ini tok mong aia pandar meng dom sruh radaih bồn hu pajeng meng labik karei mai. Ong Hồ Thả, xã Phước Trung lac: Meng akaok thun tal ini oh hu aia pandar, bilan 8 thun dahlau daok hu hasit aia pak kraong craoh, tal urak ini lac thu abih, oh hu aia piah pandar, harei halei hu radaih pajeng aia mai ye hu aia pandar, harei halei oh hu radaih pajeng ia ye oh hu aia pandar”

        Yaok harei bhap bani dua palei  Tham Dú saong Đồng Dày taduan hu 4 radaih aia hacih, yaok radaih hu 5m khối. Ia ini parabha ka yaok baoh sang hu 2 kan 50 lít aia dalam sa harei piah ngak mbang ngak huak. Daok aia menei, ia papah khan ao hu mek meng dom danao takac tapen dom baoh craoh. Sa-ai Chamaleá Thị Sơ- xã Phước Trung lac: Pak ini kan kandah ralo, oh hu aia piah pandar, jeng hu Karja daong meyah oh hu ye mikva metai abih, mikva pak ini kan kandah ralo kayua tua riya pandiak bhang blaoh daok kan kandah kayua kurang aia tra).

Tui jalan ngak lac oh caik ka bhap bani kurang aia menyum, karja xã Phước Trung tuk halei jeng hu mbaok pak dom palei, jak ba dom po radaih pajeng aia samar drah, ba aia mai di tuk tabung glaong, pajeng rilo mbang jang dalam dom harei caong pandar aia tagok glaong. Taphia di nan, ba tabiak jalan khik caga dom danao hu takac blaoh piah mek aia brei ka athur raong menyum, oh caik rah tabiak bruk meblah gauk mek aia ngak srau kadau dalam xã. Ong Nguyễn Quý Dương – Akaok Ủy ban bhap bani xã Phước Trung, huyện Bác Ái- Ninh Thuận brei thau:“Anak bruk kan kandah ini, jeng hu pok panuac tagok dom gah chức năng di tỉnh saong huyện njauk patagok dom sarak daong tapak ka mikva. Kayua oh hu bruk ngak mbang halei karei nan ye mikva biak kan kandah dalam rai diuk, kadua nan lac daong aia hacih brei ka bhap bani, ka klau daong jien piah takac danao aia ”

Tui kuhria mboh dahlau di jabat chức năng, dom harei anak tal bruk pandiak bhang pak Phước Trung daok catang jang, nan ye dalam tukvak urak ini taphia bruk kuhria caga dom jru pacang caga jit ruak, patagok bruk pajeng ba aia brei ka bhap bani, Ủy ban bhap bani huyện Bác Ái saong xã Phước Trung hu kuhria tal bruk daong brei brah ka bhap bani, taphia di nan jak ba mikva khik piah pong nerang ka athur raong dalam tuk tabung glaong bilan thu; brei urang jakar thú y tacei pato jalan pacang caga ruak ka tapul athur raong piah patrun khat lahik tal tanut biar di abih kayua tua riya pandiak bhang./.