Bruk tame tabiak puk palei hu khik iek biak catang

Tui Phó cả sư Lưu Sanh Thanh, meng kan mai, urang Cam bhian randap haong bruk rilo rai dalam sang daok dalam mblang bein sang haong gauk. Jalan diukrai pataom gauk ini lagaih ka mikva hu daong gauk dalam cakrok bruk ngak mbang, pala drak saong khik ramik adat cambat, tanarakun. Min tuk jit Covid-19 tamuh tabiak, bruk daok haong gauk yau nan ngak brei jit ruak njaom mbak samar. Phó cả sư Lưu Sanh Thanh daok di xã Phước Thái, huyện Ninh Phước, Ninh Thuận, khan lac:

" Puk palei dahlak biak iek prong bruk tame tabiak di bhap bini biak catang...."

Dalam abih tih 169 urang njauk Covid-19 dalam ban sit Phước Dân, hu tal 140 urang daok di palei Cam Bàu Trúc. Bahrau ini, tuk mboh dom menuac yau njauk Covid-19 di palei Hiếu Lễ, xã Phước Hậu, huyện Ninh Phước, UBND tỉnh Ninh Thuận hu tabiak bruk brei padang bhum pacang veik labik brei daok karei taong abih palei Hiếu Lễ gam haong 901 sang, 4.035 menuac. Bruk njauk biai nan lac dalam tuk duah thau, mek mẫu dut iek, mboh hu sang abih menuac jeng njauk Covid -19. Ini lac sang daok dalam mblang bein sang, hu rilo rai daok haong gauk.

Lac Thư ký Hội đồng chức sắc Chăm Bàlamôn tỉnh Ninh Thuận, ong Quảng Đại Hùng bhian jak ba dom halau janeng, rahra dalam tỉnh oh peih ngak dom adat meng kan di bhap bini Cam piah plaih pataom rilo menuac. Gam haong nan, meng bruk bhian randap daok meng 2 tal 3 rai dalam mblang bein sang, harei harei bhian pataom gauk nan ye jit ruak biak mbuan njam mbak:

"Tuk jit ruak khang mik va hu dong brei pandap panda...." 

Bruk bhian randap  daok pataom gauk hu jeng ilamu siam mekre dalam raidiuk urang Cam meng kan mai. Min tuk jit ruak rah tabiak, bruk bhian randap ini njauk salih karei piah mikva oh pataom rilo menuac, takik taom gaok jaik gauk piah pacang caga jit Covid-19 hu siam, lagaih. Bác sỹ Quảng Đại Hương – Yam ndok Pasak y tế huyện Ninh Phước, t. Ninh Thuận brei thau:

  " Tỉnh dok ngak pakhang bruk tame tabiak ..."

Piah pacang cakak jit ruak, di palei Hiếu Lễ, xã Phước Hậu, taphia bruk peih praong pasang iek jit ruak, huyện Ninh Phước daok ba tabiak bruk dak padang “bhum hijao” – bhum oh hu jit di taong abih 20 palei Cam dalam huyện; patagok bruk ngak di Kapul pasang iek jit di puk palei saong dom urang hu angan je piah pathau khan daong ka mikva salih bruk bhian randap, meng nan pacang caga hu siam. Ong Bạch Văn Nguyên - Chủ tịch UB bhap bini huyện Ninh Phước, t. Ninh Thuận ndom lac:

“Tukvak tapa, hadei di tuk hu dom sruh jit di Bàu Trúc saong bahrau ini, lac Hiếu Lễ ye bruk daok pataom gauk mblo tabiak dom kadha oh lagaih. Nan lac njom mbak rilo jang kayua taom gaok rilo jang. Saong mbuan njaom mbak dalam bhap bini lac biak praong. Bruk urak ini lac piah pataom tame padam jit di Hiếu Lễ dalam 14 harei tui tacei pato di tỉnh. Mikva brei caik hatai sangka nan lac hu hatai sahneng bharau ka bruk daok pataom gauk.”

Piah ka Ninh Thuận samar jhul kadun likuk jit ruak, piah ka raidiuk di dom palei Cam samar mai veik siam mekre bahrau, bruk salih bhian randap dalam daok dang yaok harei, bhian randap daok pataom gauk saong thau paglaong hatai sahneng ngak njauk dom jalan pacang caga jit Covid-19 di rahra lac kadha praong di abih./.

Urang lang: Mousaphuong -3/10