Amuk Thuận Thị Trào, urang kak kajap haong palei menyim Mỹ Nghiệp

Khaol dahlak mai tal bal sit Phước Dân, huyện Ninh Phước dalam sa harei pandiak mekre. Ini lac labik di dua palei ngak meng tangin daneiy angan di urang Cam nan lac palei ngak lan am Hamu Craok saong palei menyim jih dalah Caklaing. Yau nan min, cagar veik haong akaok saneng di khaol dahlak, labik ini tok daok dom janih pandap panda ba parang tabiak dalam 2 labik hợp tác xã prong di dua palei saong rah rah di dom baoh sang pablei salih sit sot.

Amuk Thuận Thị Trào, urang kak kajap haong palei menyim Mỹ Nghiệp labaih 50 thun brei thau: “Bruk menyim jih dalah palei Caklaing hu meng labaih 400 thun ini mai, hu patoa veik meng dom urang kamei Cam tapa dom rai rah. Meng palak tangin gheih ngak saong akaok sahneng hadah krah di yaok rai rah urang ngak, yaok blah jih dalah di palei Caklaing jeng hu dom siam mekre karei. Yau nan min, urak ini oh daok hu rilo menuac daok iek prong bruk ngak meng kan”.

Dreih yau nan, di palei Hamu Craok, urang ngak Lộ Thị Kết gam ngak ka khaol dahlak mong iek jalan ngak tabiak sa bình, gam khan lac: bruk ngak lan di palei Hamu Craok hu meng dom rituh thun, sang dahlak hu patoa gilac meng rilo rai. Ta-eng dahlak meng umo 12 thun hu bac ngak dom janih mbuan ngak piah daong amaik ngak lan yau: jan haluk, srau haluk… Piah ngak jeng sa janih pandap lan, njauk tapa rilo bruk. Abih di nyu, tuk tapat lan piah ngak jeng pandap, urang ngak njauk paglaong hatai sangka. Janih biak karei di lan am Hamu Craok nan lac taong abih jeng hu ngak meng tangin . Sambo màu lan jeng tabiak meng sambo tự nhiên tui jalan tram dom janih gha phun haong aia la-ar, hadei di nan luk tagok rup lan…

Lac gheih mekre biak karei yau nan, min jeng dreih yau dom palei ngak karei, palei ngak lan urak ini daok kurang menuac tui bruk ngak lan.

Dalam dom thun tapa, piah cak rok patagok dom palei ngak meng kan di bhap bani Chăm, tỉnh Ninh Thuận hu ba tabiak rilo jalan ngak. Tok kuhria vaktu 2008 - 2010, meng phun jien di Raja-ei, tỉnh Ninh Thuận hu padang ngak hạ tầng dom palei ngak angaok huyện Ninh Phước yau jalan mbak nao mai, pabah mbang tame palei ngak, điện, aia, sang parang iek ngan haong phun jien buh tame labaih 25,5 tỷ đồng. Tapa nan, ba mbuan laghaih ka bruk nao mai di bhap bani palei ngak, abih di nyu lac tuai damuai mai rivang palei ngak jeng yau bruk ngak tabiak, pablei salih pandap di palei ngak…

Yau nan min, meng bruk cak rok patagok tal having akaok di raidiuk bahrau, tuk hatai caong khin nyu glaong jang ye jien mek tame meng dom bruk ngak meng tangin meng kan di bhap bani oh daok ginup jien ndo piah cai pandar dalam sang. Amuk Đàng Thị Mượn hu labaih 60 thun pambuak pagam haong bruk menyim jih dalah saong jeng lac urang daok khik veik biak rilo mẫu bingu la klak khan lac: “Dahlau diah, dalam sang hu sa kik menyim, sa drei ngak radeic radeic jeng ginup jien raong abih urang dalam sang. Min urak ini, yaok harei ngak tabiak hu 1m jih dalah, pablei tabiak jeng tok hu labaih 50 ribau đồng yau nan ngak habar ginup piah cai pandar dalam sang. Kaol ranaih urak ini jeng daok hu pato saong bac bruk menyim, urang halei jeng thau manyim min kaol nyu nao ngak công ty, xí nghiệp abih paje…”.

Likau la palei Caklaing saong Hamu Craok, khaol dahlak gilac veik mai sang ngan haong dom janih pandap ngak meng tangin di dua palei ngak piah ngak pandap alin hadiah ka ayut sahabat. Dom panuac meyaom gam haong hatai takre ka dom janih pandap ini ngak ka khaol dahlak mboh duh hatai. Kayua lac, takik menuac thau lac, piah hu sa blah siuk pacang takoi meng jih dalah, urang ngak daok la jik jaik 2 harei meng blaoh, min yaom pablei tok 150 ribau đồng. Atau bình lan hu ngak tapa rilo jalan ngak meng hu thaik binguk yau nan, min yaom pablei tok samu sa ly tea aia tasau. Bruk huac lahik palei ngak jeng daok gam dalam hatai sahneng./.

Urang lang: Jasi – 31/05