Piah ka dom sarak daong di karja patagok hu kein laba dalam bruk daong ka mikva Raglai patruh kan kathaot, dom urang jakar iek gah ngak nông bhian nao tacei pato mikva bangsa Raglai pala drak pak di hamu. Meng jalan ngak ini, dom kan kandah di mikva dalam tuk pala tangei lai jeng hu peih ngak angaok mblang taneh di baoh sang drei. Saai Đàng Thị My – urang jakar danak dak 30a huyện Bác Ái – tỉnh Ninh Thuận brei thau:

“Kol drei nao tacei pato yau ini, hadei di ini tuk mikva ba tame pandar dalam hamu di drei ye mikva ngak njauk ilamu, năng suất glaong, daong ngak brei salih barau rai diuk mbang ngui di mikva”.

Ong Katơ Dũng  – urang nông xã Phước Bình – huyện Bác Ái – tỉnh Ninh Thuận lac:

 “Kol dahlak tuk halei jeng kham merat, hu urang jakar kỹ thuật mai tacei pato tapak ka mikva tal puh”.

Yaok adit sa mbang, saai Huỳnh Long Nhật, urang jakar danak dak 30a di huyện Bác Ái nao tal dom palei piah duah thau baoh sang kan kathaot saong padang angan mikva caong peih bruk ngak piah xã pablak tame dom danak dak daong di karja daok peih ngak di huyện. Bruk urang jakar hu trách nhiệm daong ka bhap bini ngak mbang pala drak, tabiak truh kan kathaot hu urang dang akaok xã ngak brei cambaih laih meng sarak di đảng ủy, caong tal abih nhiệm kỳ, baoh sang kan kathaot di Phước Bình daok labaih 8% min. Saai Huỳnh Long Nhật – urang jakar danak dak 30a huyện Bác Ái – tỉnh Ninh Thuận khan lac:

 “Dalam tuk ngak, meng hu dom mô hình di karja, dự án ba mai, pambuak bruk saong adei saai labik ini. Kol dahlak hu daong ka mikva labik ini peih ngak dom mô hình nan. Dalam 3 thun dahlak mai ini, mboh mikva labik ini hu agok, baoh sang kan kathaot trun biak cambaih laih”.

 Bruk palih ruah phun pala, janih raong lagaih saong bruk ngak mbang pala drak di mikva Raglai nan lac bruk praong di hệ thống chính trị di puk palei. Kayua yau nan ye, xã Phước Bình daok pataom pren yava tame peih taneh bilau, peih praong taneh pala drak di dom labik hu ia, ngak jeng hamu bậc thang di bhum quy hoạch pala phun katut panak harei yau patei, tangei lai, ratak naih. Ong Nguyễn Văn Cảnh – Bí thư Đảng ủy xã Phước Bình – huyện Bác Ái – tỉnh Ninh Thuận brei thau ilamu:

   “Kol dahlak tacei pato dom mban ngành kapul nyaom, UB bhap bini xã, brei urang jakar, abih di nyu nan lac urang jakar kỹ thuật gah ngak nông saong patagok raong glang, trun tapak tal yaok baoh sang pato pasram di mblang hamu saong patagok bruk pasang iek, tui iek. Meng nan, patagok hu kein lagaih bo sarak kol dahlak hu ba tabiak”.

Meng bruk hu mbaok tame di abih hệ thống chính trị, rai diuk mbang ngui daok dang di mikva Raglai xã Phước Bình dak harei dak tani tanat, baoh sang kan kathaot yaok thun trun meng 8 tal 10%. Sarak patruh kathaot daok patagok hu kein lagaih meng jalan ngak naih gheih di urang jakar puk palei. Bhap bini hu paglaong akaok saneng, salih jalan ngak klak oh daok lagaih, yam tagok ngak kaya meda./.