Dom thun tapa, dom gah, dom pakat di tỉnh Ninh Thuan tuk halei jeng caik hatai sangka tal bruk pato bruk ngak ka urang daok di palei pala saong ba mai rilo siam lagaih, daong ngak brei salih bahrau jalan ngak mbang pala drak, paglaong asar bruk ngak, parilo bruk ngak, peih praong bruk ngak, daong patruh eik patrun kan kathaot di dom bhum atah bayah, bhum palei pala.

Urang Raglai daok di huyen bhum ceik Bac Ai, tinh Ninh Thuan bhian randap haong bruk pala drak di angaok ceik ptau glaong, pambak tui ia lingik, năng suất oh hu hadom. Min dom thun jaik di ini, hu bac megru ilamu ngak mbang birau,  abih di nyu nan lac dom tal pato bruk ngak ka urang di palei pala, yau: ilamu pala tabau cao sản, tangei hlai, padai ia ka mikva hu ngak salih birau jalan ngak meng kan, thau ba ilamu ky thuat birau tame pala drak, raong glang, mek hu kein laba dalam bruk ngak mbang jeng yau trun takik bruk jak tak, am cuh glai ngak apuh.  Pagap yau sang sa-ai Pi  Năng Thị Bún daok di xa bhum ceik Phước Thành hadei di tuk bac tal pato ilamu pala drak, sa-ai salih tapa ngak padai ia. Meng ngak njauk tui tacei pato di urang jakar pachreih nong, nan ye mbang yuak padai halei jeng hu meng 4 tal 4 tạ meteh sa sao hamu. Tui sa Bún, ngak padai ia nyu mbuan iek glang, padai hu rilo jang, meng nan raidiuk sang sa-ai hu tani tanat jang. “Khol dahlak hu bac tal pato pasram piah thau jalan ngak padai ia, thau jalan buh khak, thau ngak hareik, thau palih ruah pajaih, meng nan phun padai di khol dahlak tamuh siam jang,  hu rilo padai jang”.

Kayua trun pajaih njauk tukvak, palih pajaih, buh khak, pruh jru njauk tukvak, nan ye dua vụ gam sang sa-ai KaTơ Ngớ di xã Phước Thành, huyện Bác Ái, tỉnh Ninh Thuận njauk tangei lai, mek jien tame hu labaih 10 trieu dong. Sa-ai Ka tơ Ngớ brei thau, meng hu bac tal pato burk ngak ka urang di palei pala, hu tacei pato ilamu pala drak nyu daong ka sa-ai pala tangei hlai hu kein laba, patak pataom hu prein ngak saong abih takik jien buh tame. “Karja sangka pato burk ngak ka urang di palei pala hu daong ka khol dahlak thau jalan pala tangei hlai, tacei pato ilamu pala,  talei ini atah talei diah 20 tal 25 cm. tuk phun tangei glaong hadom meng brei buh khak, buh njauk tukvak piah ka phun tangei nyu cak rok samar brei rilo ndo rilo asar”.

Meng thun 2011 mbaih tal ini, tỉnh Ninh Thuận peih hu labaih 230 tal pato bruk ngak ka 9.000 urang ngak di palei, dalam nan hu labaih 6.000 urang hu bac gah bruk ngak nong yau raong glang, pala drak saong raong kaya ikan dalam ia, meblah labaih 75%. Tapa pasang iek mboh lac, taong abih urang ngak di palei pala hadei di tuk tame dom tal bac bruk ngak gah ngak nong bloh,  jeng thau ba ilamu bac megru hu tame bruk raong glang, pala drak saong eng drei ba  bruk ngak tani tanat, paglaong jien mek tame ka sang drei. Ong Bùi Quốc Việt, Akok jabat Lao động – Thương binh  saong  Xã hội huyện Bác Ái, tỉnh Ninh Thuận khan lac: “Hadei di tuk bac blaoh mikva thau sahaneng kuhria saong ba ialmu birau tame pala drak, raong glang, thau palih ruah pajaih siam, thau pruh jru caga halak halin, ruak kik ka dom phun pala, thau pacang caga ruak ka taphom athur raong, manuk ada, nan lac bruk bui sambai di huyen, lingiu di nan daok hu daong ka mikva  duah hu jien tame, hadei meng bac bruk ngak blaoh mikva hu mesre phun jien yaom laba lap piah pala darak, raong glang di angaok mbang taneh di drei,patrun hu bruk jah tak glai  ngak apuh”.

 Piah ka bruk pato bruk ngak ka urang di palei pala hu khang kajap, mek hu kein laba, dom tal pato bruk ngak brei khik hu chat luong, dom gah chức năng brei pasang iek, duah thau bruk caong khin bac bruk nngak di palei pala. Meng nan, peih dom tal pato ka nyu lagaih saong bruk ngak mbang di puk palei, pachreih urang buh jien tame ngak, ba mbuan lagaih ka dom doanh nghiep, palei ngak cak rok patagok, peih praong bruk ngak mbang pambuak saong ba bruk ngak tani tanat ka urang ngak, dalam nan hu urang ngak lingiu bruk ngak nong di bhum palei pala./.