Saai Pi Năng Học daok di xã Phước Tân, huyện Bác Ái barau mai palei veik hadei di 3 thun nao ngak bruk di Malaysia. Meng bruk xây dựng hu pato di palei saong kham merat ngak bruk, ahdei di tuk abih tukvak ngak bruk tui hợp đồng, saai Học hu payua jien mai ka baoh sang bayar abih sraiy saong patak pataom hu labaih 70 triệu đồng. Saai Pi Năng Học lac:

 “Jien bilan di adei hu 8 triệu đồng sa bilan, nao tapa Malaysia 6, 7 bilan jeng bayar abih sraiy, urak ini patak pataom hu 60, 70 triệu. nao ngak bruk di negar langiu, drei jeng hu kein lagaih, patak pataom hu hasit phun jien mai ngak sang daok urak ini jeng abih”.

Dom thun tapa, huyện bhum ceik Bác Ái hu pataom tame jhul pakhang bruk pato bruk ngak saong ba bruk ngak ka urang ngak palei pala tui jalan giới thiệu urang nao ngak bruk di dom doanh nghiệp praong langiu tỉnh atau jhul pakhang bruk ba urang ngak nao ngak bruk di negar langiu. Tapa taong yaom, ralo urang ngak hu ba bruk ngak hu jien mek tame tani tanat, rik daong patrun patakik baoh sang kan kathaot dalam huyện. Min, anak meta mboh lac, dom urang ngak hu mbaok tame danak dak nao ngak bruk di negar langiu yaok thun jeng daok biar. Dom urang ngak bruk di dom doanh nghiệp langiu tỉnh klak bruk meteh dhi. Ilamu saong chất lượng ngak bruk daok biar, oh ka lagaih saong labik ngak bruk công nghiệp. Akaok saneng cang bruk daong di karja daok trak damak jeng lac makna ngak ka bruk ba bruk ngak ka urang ngak palei pala di huyện Bác Ái daok gaok ralo kan kandah. Saai Pi Năng Thị My daok di xã Phước Thắng, huyện Bác Ái brei thau:

 “Adei ngak di công ty jhik hu 4 thun, jien bilan di adei labaih 4 triệu, yaom lac hu jien bilan min adei khin mai sang piah jaik amaik ame. Adei khang hatai mai sang piah bac bruk ngak, harei hadei adei hu bruk ngak karei ka drei”.

Urang dang akaok jabat lao động huyện Bác Ái jeng ndom lac: gah urang ngak kayua akaok saneng jeng yau adat cambat tanarakun di puk palei nan ye oh khin nao ngak mbang atah, takik khin nao ngak bruk di negar lingiu atau nao ngak langiu tỉnh. Daok karja palei ye taong abih urang jakar ngak bruk pathau khan jak ba jeng lac kiêm nhiệm, oh ka hu sarak cambaih laih nan ye oh ka ngak abih trách nhiệm. Piah bruk ba urang ngak nao ngak bruk di negar langiu, ba bruk ngak ka urang ngak palei pala dalam huyện bhum ceik Bác Ái hu kein lagaih jang saong hu khang kajap, ong Bùi Quốc Việt – akaok jabat lao động huyện Bác Ái, tỉnh Ninh Thuận brei thau:

 “Kol dahlak jeng hu tham mưu ka UB bhap bini huyện hu biak ralo kiến nghị, abih di nyu nan lac ngan saong tỉnh, UB bhap bini tỉnh jeng yau dom sở, ban, ngành kapul nyaom jeng sangka pachreih ba, atau daong yaih khan dom doanh nghiệp daok ngak bruk dalam huyện, piah pachreih urang ngak ini ngak bruk pak di labik, oh lac nao atah, ka dua nan lac jeng hu jien mek tame ka puk palei”.

Taphia bruk jhul pakhang pathau khan sarak pato bruk ngak, ba bruk ngak dalam dom rai rah bhap bini; palih ruah bruk pato pakai ka nyu lagaih piah patagok pren khang di puk palei, ye bruk praong nan lac brei hu bruk ba tngin tame di dom pakat karja, dom gah chức năng saong talei pambuak bruk, daong ba di doanh nghiệp dalam saong langiu tỉnh. Hu yau nan, bruk ba bruk ngak ka urang ngak palei pala di Ninh Thuận meng hu kein laba./.