Pandap kaya nong hu ngak tabiak dalam tỉnh hu urang mai blei 

Sa sào nho hijao di ong Nguyễn Trường Chế daok di phường Mỹ Hải, ban  Phan Rang – Tháp Chàm hu pala tui  jalan Vietgap, min tal harei paik baoh njauk di tuk langik hajan gam gam song jit ruak  Covid-19 rah tabiak khang ngak ka ong mbang ndih oh jeng. Nan ye, tuk hu HTX Nho Evergreen Ninh Thuận blei veik taong abih baoh nho yaom 27.000 đồng sa kg, ong Chế biak bui sambai

“Tal bilan paik gaok hajan ngin, blaoh jit ruak Covid tra nan ye yaom drak pasa oh tani tanat. Kayua dahlak lac urang dalam  HTX ye  HTX blei abih ka dahlak yaom 27.000 đồng sa kg. Hu  HTX blei urang nong oh daok duh hatai.”

Dalam tuk rilo kaya pandap dalam  tỉnh gaok kan kandah ka bruk pablei tabiak kayua jit Covid-19 rilo bilan ni mai, HTX Dịch vụ tổng hợp Tuấn Tú di  xã An Hải, huyện Ninh Phước jeng daok khik bruk blei  măng tây xanh ka dom urang dalam HTX  yaom meng 35.000 tal 40.000 đồng sa kg. Tui kuhria yaok harei, HTX Dịch vụ tổng hợp Tuấn Tú, xã An Hải, huyện Ninh Phước jeng dok blei meng  300 - 400 kg măng tây xanh ka dom urang dalam HTX. Ong Hùng Ky, Yam ndoc  HTX Dịch vụ tổng hợp Tuấn Tú, brei thau:

“ MBan yam ndoc HTX biak kham merat dong ka mik va ngak habar duah hu jien yaok harei. Mikva jia tame  HTX song  HTX hu dong ka mik va. Kayua kan kandah di jit, min khat lihik oh rilo, harei halei jeng paik rabung, oh caik brei klaih klaoh.”

HTX Dịch vụ tổng hợp Tuấn Tú hu 64 urang, piah ka dom urang di  HTX hu jien buh tame ngak dalam tuk jit ruak  Covid-19, HTX hu nyim dahlau di dom doanh nghiệp labaih 150 triệu đồng piah dong mik va pala măng tây xanh tui tanut VietGap, khik kajap chất lượng, hacih saat pandap mbang piah ba dom kaya pandap tame  dom siêu thị. Meng 7 triệu đồng dong di HTX, ong Từ Văn Hay brei cakak klaak dhar taha, raong phun măng tây piah iek glang phun meda. Meng hu yau nan, yaok harei sang ong hu jien tame tani tanat  meng phun măng tây xanh.

“ Dalam jit Covid 19 ni, bruk pablei măng tây kan kandah, HTX jeng duah jalan pablei ka mik va. Urang di HTX tuk jit ruak dui atah yau nan , jeng dok blei yaok harei ka mik va. Meng jalan ngak ni bo  dalam tuk jit ruak oh kan kandah rilo tal rai duik yaok boh sang”

Urak ni, tong abih mblang taneh pala măng tây xanh di huyện Ninh Phước hu labaih 130ha, rilo meng lac di 2 xã An Hải song Phước Hải. Kayua dom HTX sami samar dalam bruk dong ka urang nong pablei pandap nan ye mik va pala  phun măng tây xanh duah hu jien tame, tani tanat rai duik. Ndom ka labik dang di HTX, ong Nguyễn Hữu Đức, Phaok akaok  UB bhap bini  huyện Ninh Phước, t.Ninh Thuận brei thau:

“Phun măng tây brei paik mek yaok harei  meyah oh hu HTX dong, blei veik ka mik va xã viên jeng lac biak kan. Kayua yau nan ye, labik dang di HTX lac biak prong dalam bruk pambuak gauk, pablei kaya pandap dalam tuk jit biak kan kandah yau nan . HTX blei veik abih, dong ka mik va urang nong.Dalam tuk jit ruak, min mik va jeng duah hu jien biak tani tanat dalam tuk kan kandah yau urak ni “.

Dalam tuk kan kandah kayua jit ruak  Covid-19, bruk sami samar di dom  HTX dalam bruk pambuak gauk hong  doanh nghiệp piah pablei kaya pandap, abih di nyu lac dom pandap di tỉnh hu dong ka mik va urang nong pablei hu kaya nong, meng nan hu jalan dong gauk dalam pala, ngak song rai duik , ba gauk yam tapa kan kandah kayua jit ruak  Covid-19./.

Urang lang: Hanipha- 4/11