Pasak Ilamu – Padhih xã Phước Thuận, huyện Ninh Phước lac labik hu UB bhap bini xã Phước Thuận mek ngak labik klauk jru vaccine Covid-19. Kayua xã ini oh parabha mong klauk jru karei di gauk yau nan ye yaok rituh  urang tame pataom dalam hội trường sa tuk haong gauk piah klauk jru, ba tal bruk pataom rilo manuac, oh pa-atah gauk, nan ye mbuan tamuh jit ruak. Rilo urang mai klauk jru khin xã Phước Thuận parabha tukvak klauk jru ka nyu lagaih plaik njiak njom mbak ruak. Ong Tô Văn Sinh, Bí thư Chi bộ palei Phước Khánh, xã Phước Thuận, huyện Ninh Phước, tỉnh Ninh Thuận ndom lac:

  “ Dahlak mboh klauk jru mbang ini biak ralo, oh daok atah gauk. Nan ye huac jit ruak tamuh tabiak. Khin UB bhap bini xã brei parabha tukvak klauk jru plaik njiak jit njom mbak.”

 “ Oh pa-atah gauk dalam tuk peih bruk klauk jru vaccine 19, di labik klauk jru nan jeng oh hu labik piah cang tui iek prein yawa  ka mikva hadei di tuk klauk jru tui bruk ba tabiak. Laneing talauk caik labik nao mai dalam hội trường, dom urang hadei di tuk klauk jru blaoh daok jiak gauk di dua gah langiu hoi truong. Muk Nguyễn Thị Lành daok di palei Thuận Hòa, xã Phước Thuận, huyện Ninh Phước mboh lac bruk mikva nao mai ndem meyai haong gauk tui hatai di drei, daok jiak gauk, kan pacang hu jit ruak.

 “Cambaic laic tuk oh pa-atah gauk yau nan bo hu urang F0 ye buk njom ruak lac oh plaih hu. F0 pambak ruak ka urang dalam bhap bini, bruk patagok kinh te jeng yau raidiuk mikva gaok kan kandah.”

Di pabah mbang tame hội trường, dom urang ngak pahala jeng tok pataom tame bruk vak angan urang mai klauk jru boh oh thei sangka ieu kakei mikva brei dang atah di gauk, plaik pataom rilo manuac dalam tuk klauk jru vaccine Covid-19.

Tal urak ini, xã Phước Thuận, huyện Ninh Phước hu 9.780 urang hu klauk ginup 2 mbang vaccine Covid -19, sumu jaik 90%. Yaom lac jit Covid-19 di xã Phước Thuận pacang hu siam, min xã ini bhian lac labik tamuh jit ruak ngan saong 262 urang njom Covid-19. Langiu di nan, Phước Thuận hu rilo urang klauk ginup 2 mbang vaccine  pacang Covid-19 blaoh min jeng F0. Kayua yau nan ye, karja palei saong bhap bini oh iek biar tuk hu klauk ginup blaoh 2 mbang vaccine , kayua ruak daok mbuan njom mbak , abih di nyu lac di dom labik peih bruk klauk jru  vaccine Covid-19 pataom ralo manuac. Ong Trương Văn Hậu, Phaok akaok  UB bhap bini xã Phước Thuận, huyện Ninh Phước brei thau:

  “ Bruk klauk jru vaccine ye peih ngak hu siam. Yau nan min, hu dom mbang, urang klauk jru oh ka ngak njauk dom bruk ba tabiak ka bruk klauk jru. Khol dahlak brei menuac ieu kakei mikva, tacei pato mikva ngak njauk tui bruk ba tabiak pacang caga jit.”

Meng bruk klauk vaccine pacang Covid-19 di xã Phước Thuận, huyện Ninh Phước, tỉnh Ninh Thuận brei mboh lac, bhap bini daok iek biar, oh sangka, pacang khik rup, oh ngak njauk tui dom panuac kakei pacang caga jit tui 5 paka. Pacang oh brei jit ruak tamuh dalam bhap bini tuk salih tapa tukvak siam mekre birau lac kan, pacang hu siam jit ruak di bhum palei dak kan jang. Bruk nan njauk brei hu bruk caik hatai sahaneng di bhap bini saong bruk khik iek, pacang caga di karja palei dalam bruk ngak njauk tui dom paka di Mentri Y tế ka khik kajap salamat tuk klauk jru vaccine Covid-19 di dom palei./.

Urang lang: A.Nghiem – 3/1/2022